Ermənistanın Baş naziri Nikol Paşinyan ölkə hakimiyyətinin Türkiyə ilə münasibətləri normallaşdırmağa hazır olduğunu bəyan edib. Erməni mediasının verdiyi xəbərə görə, N.Paşinyan bu barədə hökumətin iclasında bildirib.
Onun sözlərinə görə, Türkiyə Prezidenti Rəcəb Tayyib Ərdoğan Ermənistanla münasibətlərinin normallaşmasının mümkünlüyü barədə açıq şəkildə danışıb: “Biz bu açıqlamalarda Ermənistan-Türkiyə münasibətlərinin normallaşmasının, avtomobil və dəmiryolu əlaqələrinin bərpasının mümkünlüyünü müzakirə etmək üçün bir fürsət görürük”. Ermənistanın Baş naziri daha geniş nəticələr əldə etməyə imkan verəcək danışıqlara hazır olduqlarını bəyan edib. O vurğulayıb ki, söhbət regionu Şimalı Cənubla, Şərqi Qərblə bağlayacaq bir qovşağa çevirməkdən gedir.
N. Paşinyan qeyd edib ki, Rusiya bu prosesə kömək etməyə hazırdır. Çox maraqlıdır ki, Paşinyan artıq neçənci dəfədir, Azərbaycandan əvvəl Türkiyə ilə sərhədlərin açılmasından, kommunikasiyaların bərpasından danışır. Paşinyanın bu niyyəti nədən xəbər verir?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, son zamanlar Ermənistan rəhbərinin Türkiyə ilə münasibətlərin normalaşması istiqamətində verdiyi açıqlamalar bunun onlara hava və su kimi lazım olduğu qənaətini yaratmış olur: “2009-cu ildə Sürixdə imzalanan protokollarda sərhədlərin açılması nəzərdə tutulurdu. Bunda yalnız Ermənistan yox, həm də ABŞ və Avropa ölkələri maraqlıydı. Həmin proses Qarabağ münaqişəsinə görə alınmadı. Çünki Türkiyə Ermənistan qarşısında işğala son qoymaq tələbini qəti qoyurdu. Sonra isə Ermənistanın müəyyən instansiyaları həmin razılaşmanı ləğv etdi. Yəni Ermənistan prosesi sabotaj etmiş oldu. Həmin vaxt Rusiya bunu istəmirdi. Onda iki ölkə arsındakı sərhədlərin açılması bizim özümüzün də maraqlarımıza uyğun deyildi. Qarabağ məsələsi həll edildiyi üçün sərhədlərin açılması, kommunikasiyaların işləməsi, demarkasiya və delimitasiyanın həlli bizim üçün də prioritetdir. Paşinyan artıq Rusiya amilini nəzərə almadan Türkiyənin varlığını özü qəbul edir. Başa düşür ki, sonda bölgəyə qarant olan dövlət Türkiyə olacaq. Ermənistan həm də çalışır ki, Türkiyə vasitəsilə Avropaya çıxsın. Artıq Ermənistanın daxili auditoriyası da bu açılımı istəyir. Ermənistandakı son mitinqdə “biz daha müharibə istəmirik”, “uşaqlarımızın ölməyinə qarşıyıq” kimi şüarlar səslənirdi. Bütün bu proseslər göstərir ki, əlaqələrin bərpası bütün region ölkələrinin marağındadır. Artıq bu qaçılmaz prosesdir. Erməni xalqının da müqaviməti tükənib”.
Partiya sədrinin sözlərinə görə, bu proseslərdə Türkiyə ilə Azərbaycan birlikdə hərəkət edir: “Laçında keçirilən birgə hərbi təlimlər bunu bir daha sübut edir. Bundan sonra bütün ölkələr bizimlə bölgədə əməkdaşlıq etməyə məcburdur. Ermənistan anlayır ki, qeyri-konstruktivlik nümayiş etdirməklə bölgədəki imkanlardan yararlanmaq şansını itirə bilər. Türkiyə ilə əlaqələrin açılması Azərbaycanın başı üzərindən ola bilməz. Bu o deməkdir ki, Mehridən Naxçıvana yol da açılmalıdır. Çünki dəmiryolu həmin ərazidən keçir. Türkiyənin reallığını qəbul etmək elə bizimlə hesablaşmaq anlamına gəlir. Paşinyan bilir ki, gələcəyini Qərblə bağlayacaq, ona görə də üzünü Rusiyaya yox, həmin istiqamətə tutur. Bunun də ən qısa yolu Türkiyə üzərindəndir. Türkiyə hər zaman Ermənistanla münasibətlərdə Azərbaycan amilini önə çəkib. Bu dəfə də elə olacaq”.
Məhəmmədəli QƏRİBLİ
