Hazırda Ermənistanın işğalında olan Naxçıvan Muxtar Respublikasının Sədərək rayonunun Kərki kəndinin Azərbaycana qaytarılması məsələsi uzun müddətdir ki, aktualdır.
Ermənistan mətbuatı iddia edir ki, Nikol Paşinyan Naxçıvanla sərhədə bitişik olan Kərki kəndini Azərbaycana verməyə razılaşıb. Onlar iddia edirlər ki, Paşinyan artıq bununla bağlı rəsmi sənəd imzalayıb.
Erməni mətbuatının yaydığı bu məlumat həqiqəti əks etdirə bilərmi, yoxsa bu da Ermənistan KİV-nin növbəti təxribatıdır?
“İndi Ermənistanda həmin məsələni gündəmə gətirən revanşçı siyasi dairələr hər vəchlə Nikol Paşinyana növbəti xəyanətkar damğasını vurmağa çalışırlar”
Siyasi ekspert Rövşən Rəsulov “Bakı-Xəbər”ə şərhində bildirdi ki, Ermənistanda olan müxtəlif revanşist qüvvələr bir çox hallarda təxribatçı məlumatları mediaya sızdırırlar: “Bildiyimiz kimi, hazırda Ermənistanda siyasi mühit qarmaqarışıq vəziyyətdədir və söz yox ki, bu vəziyyətdən öz məqsədləri üçün istifadə edən revanşçı qüvvələr də var. Onlar əhalinin narazı hissəsini Nikol Paşinyana qarşı daha da qıcıqlandırmaq üçün zaman-zaman müxtəlif təxribat xarakterli informasiyaları media və sosial şəbəkə məkanlarına sızdırırlar.
Lakin onu da unutmamalıyıq ki, Azərbaycan, Rusiya və Ermənistan arasında imzalanmış 10 noyabr 2020-ci il üçtərəfli bəyanatına görə, Azərbaycanla Ermənistanın sərhədləri delimitasiya və demarkasiya olunmalıdır, eləcə də Ermənistan tərəfindən işğala məruz qalmış Qazaxdakı yeddi kəndimiz, həmçinin Naxçıvan Muxtar Respublikasının Kərki kəndi suveren ərazilərimizə geri qaytarılmalıdır. Gec, ya da tez bu prosesin həyata keçiriləcəyinə isə şübhə yoxdur.
Kərki kəndinin geriyə qaytarılmasına gəlincə, bu kəndin istər kommunikasiya-nəqliyyat, istərsə də strateji-coğrafi üstünlükləri baxımından bir sıra əlverişli vasitələri, şəraitləri mövcuddur. Məhz bu yanaşmadan çıxış edərsək, indi Ermənistanda həmin məsələni gündəmə gətirən revanşçı siyasi dairələr hər vəchlə Nikol Paşinyana növbəti xəyanətkar damğasını vurmağa çalışırlar”.
R.Rəsulov hesab edir ki, artıq Ermənistanda proseslər bizim xeyrimizə gedir: “Ancaq bu arada daha bir məqamı da xatırlatmaq yerinə düşərdi. Bu gün Ermənistanın mövcud iqtidarı gec də olsa anlamağa başlayıb ki, sərhədlərin delimitasiyası və demarkasiyası prosesini uzatmaq ölkənin vəziyyətini daha da ağırlaşdırır. Əbəs deyil ki, o, bir müddət əvvəl hökumət iclası zamanı Zəngəzurdakı əzəli Azərbaycan kəndləri olan Eyvazlı və Çayzəminin adlarını ermənilərin indiyədək söylədikləri, yazdıqları kimi "Karmrakar" və "Şurnux" kimi çəkmədi.
O cümlədən, Nikol Paşinyan sonuncu hökumət toplantısında Azərbaycanın özünün Qərb rayonları ilə Naxçıvan arasındakı kommunikasiyaları açmaq istədiyini deməklə, əslində Qarabağın Azərbaycan ərazisi olduğunu etiraf edib. Bu isə o deməkdir ki, İrəvanın başqa çıxış yolu qalmayıb və indi Paşinyanın daha vacib işlərindən biri revanşçı güclərin ona qarşı başlatdığı təxribatların qarşısını almaqdan ibarət olacaq. Söz yox ki, Ermənistan iqtidarı sağlam düşüncəyə sahib olmağı bacaracaqsa, həqiqəti etiraf və qəbul edəcəksə, qonşu torpaqlarına iddiaları olmayacaqsa, revanşçı qüvvələrin öhdəsindən gəlməyi bacaracaqsa, bu zaman ölkənin inkişafı, sülhün bərqərar olması haqqında danışmağa dəyər. Əks halda, Ermənistanın hər hansı inkişafından, güclənməsindən danışmaq qeyri-mümkündür. Vaxt isə daralır, üçtərəfli bəyanatda qeyd edilən bəndlərin hər birinin yerinə yetirilməsi prosesi çoxdan həyata keçirilməli idi, amma biz bunu müşahidə etmirik. Qısacası, saatlar İrəvanın xeyrinə deyil, zərərinə işləyir və onun əqrəblərini düzəltmək də hələlik onun öhdəsindədir”.
İradə SARIYEVA
