Gələn il dövlət büdcəsinin xərclərinin 15,5 faizi müdafiə və milli təhlükəsizlik xərclərinə ayrılacaq. Bu barədə Maliyyə Nazirliyinin 2022-ci il üçün icmal büdcəsinin proqnozunda qeyd olunub.
Azərbaycan Respublikasının 2022-ci il üçün icmal büdcəsinin proqnozuna əsasən, gələn il müdafiə və təhlükəsizlik xərcləri 4 milyard 499 milyon 238,9 min manat olacaq. Qeyd edək ki, gələn il dövlət büdcəsinin xərcləri 28 milyard 974 milyon manat proqnozlaşdırılır. Onu da bildirək ki, Azərbaycanın hərbi büdcəsini artırması ildən-ilə artan dinamika üzrə dəyişir. Bunu birmənalı qəbul etməyən təşkilatlar və ölkələr olub və indi də var. Ancaq Azərbaycan heç vaxt bu iradlara məhəl qoymadan, öz müdafiə və təhlükəsizlik qüdrətini artırıb. Builki büdcədə də bu istiqamətlər üzrə xərclərin artırıldığının şahidi oluruq. Azərbaycan bunu hansı zərurətdən irəli gələrək edir?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Azərbaycanın dövlət büdcəsində ən böyük xərclər məhz ordu quruculuğu üçün nəzərdə tutulub: “Son illər ərzində dövlət büdcəsində ordu üçün nəzərdə tutulan xərclər dəfələrlə artıb. Müqayisə üçün deyək ki, Azərbaycanda orduya ayrılan xərclər Ermənistanın dövlət büdcəsini bir neçə dəfə üstələyir. Bundan əndişələnən bəzi beynəlxalq təşkilatlar və dövlətlər var. Bəzi hallarda bu məsələ ilə əlaqəsi olmayan qurumlar, yaxud da Ermənistanın dəyirmanına su tökən siyasətçilər bizi tənqid etməyə çalışırlar ki, nə üçün Azərbaycan hərbi büdcəsini artırır. Bunu elə ölkələrin nümayəndələri deyir ki, onların hərbi büdcəsi milyardlarla yox, triliyonlarla ölçülür. Bu bizim təbii hüququmuzdur, biz öz hərbi potensialımızı artırırıq, artıracağıq. İllər uzunu Qarabağ məsələsinin ədalətli, beynəlxalq normalara uyğun şəkildə həll edilməsi yubadıldı. Azərbaycanın bu problemi öz gücünə həll etməsində bizim hərbi gücümüz həlledici rol oynadı. İllər əvvəl biz bunu əraziləri işğala məruz qalan ölkə kimi torpaqlarımızın 20 faizi işğal altında olması, bir milyon 200 mindən çox vətəndaşımızın doğma ocaqlarından aralı qaçqın və məcburi köçkün vəziyyətində yaşaması ilə izah edirdik. Belə olan halda, təbii ki, ordu quruculuğu, müdafiə potensialının möhkəmlənməsi və güclü ordunun olması dövlət üçün, hər bir vətəndaş üçün əsas vəzifə sayılırdı. Məhz elə bunlara görə ordu quruculuğu prosesi uğurla davam etdi və biz bunun ən bariz nümunəsini 44 günlük müharibədə gördük. Artıq hər bir Azərbaycan vətəndaşı inanır ki, hazırda ordumuzun arsenalında olan ən müasir tanklar, artilleriya qurğuları, döyüş təyyarələri və digər texnikalar düşmənin istənilən hədəfini məhv etməyə qadirdir. Azərbaycanın iqtisadi tərəqqisi fonunda müdafiə qüdrətinin artırılması labüddür. Biz hər zaman deyirdik ki, aparılan sülh danışıqları səmərə vermədiyi təqdirdə Azərbaycan işğal altında olan torpaqlarını hərb yolu ilə azad etmək gücündədir. Bunu sübut etdik. Hazırda Ermənistan yenə müharibə ritorikası, revanşist bəyanatlarından əl çəkmir. Buna görə də, Azərbaycan hər an müharibəyə hazır olmalıdır. Biz sülh tərəfdarıyıq, ancaq görürük ki, Ermənistan bunu istəmir, üzərinə düşən öhdəlikləri yerinə yetirməkdən boyun qaçırır. Prezident demişdi ki, biz XXII əsrin müharibəsinə belə hazır olmalıyıq. Bu o deməkdir ki, arsenalımızı müasir silahlarla zənginləşdirməliyik. Kimin nə və necə düşünməsindən, deməsindən asılı olmayaraq müdafiə qüdrətimizin artırılması, bu sahəyə kifayət qədər vəsait ayrılması Azərbaycan dövlətinin daxili məsələsidir. Ordumuzda peşəkarlıq, döyüş qabiliyyəti artır, Silahlı Qüvvələrdə ruh yüksəkliyi var. Ordu quruculuğu sahəsində həyata keçirilən islahatların ilk günündən müdafiə xərclərinin artırılması əsas prioritet kimi dövlət siyəsətinin əsasında dayanır. Müharibə şəraitində yaşayan bir ölkədə dövlət büdcəsində hərbi təyinatlı xərclər üçün ayırmalara, ordu quruculuğuna bu cür diqqət və qayğı təbiidir. Bundan əlavə, Rusiya açıq şəkildə Ermənistanı silahlandırırsa, biz regionda güc nisbətinin dəyişməsinə imkan verməməliyik. Bunun da yolu müdafiə və təhlükəsizlik xərclərini artırmaqdan keçir”.
Məhəmmədəli QƏRİBLİ
