Rəşad Bayramov: “Ümidvaram ki, həm Zabelinə, həm də icra başçısına bu vəziyyətlə bağlı lazımi xəbərdarlıqlar olunacaq”
Gəncə Şəhər İcra Hakimiyyətinin keçirdiyi bir tədbirlə bağlı yayılan fotolar böyük müzakirələrə səbəb olub. Söhbət Gəncə şəhərində “Uşaqların məktəbə hazırlığına dəstək ol!” aksiyası çərçivəsində keçirilən tədbirdən gedir.
Tədbirdə Gəncə Şəhər İcra Hakimiyyətinin başçısı Niyazi Bayramov, Azərbaycanın Rus İcmasının sədri, Milli Məclisin deputatı Mixail Zabelin və digərləri iştirak edib. Tədbirdən yayımlanan fotolarda Gəncə Şəhər İcra Hakimiyyətinin başçısı Niyazi Bayramov və Azərbaycanın Rus İcmasının sədri, Milli Məclisin deputatı Mixail Zabelinin qarşısında Azərbaycan və Rusiya bayraqları qoyulub.
Mixail Zabelin Azərbaycanda, Bakı şəhərində doğulub, hakim Yeni Azərbaycan Partiyasının yaradıcılarından biridir. Zabelin Azərbaycan Rus İcmasının sədri olsa belə, Milli Məclisdə Qaradağ-Binəqədi-Yasamal seçki dairəsini təmsil edir. Zabelin hətta Rusiyada rəsmi səfərdə olsa, onun qarşısına Rusiya yox, məhz Azərbaycan bayrağı qoyulmalıdır və qoyulur da. Çünki Zabelin Azərbaycanı təmsil edir, Rusiyanı yox. Məgər Niyazi Bayramov bilmir ki, Zabelin Rusiya Dövlət Dumasının yox, Azərbaycan Milli Məclisinin deputatıdır? Bununla icra başçısı texniki, ya siyasi səhv buraxmış olub?
Politoloq Rəşad Bayramov “Bakı-Xəbər”ə açıqlamasında bildirdi ki, burada kobud siyasi səhv var: “Ola bilər ki, icra başçısı bunun heç fərqinə varmayıb. Ancaq icra başçısı vəzifəsi həm də siyasi yük daşıyır. Çünki Prezidentin yerlərdəki nümayəndəsi sayılır. Hələ nəzərə alsaq ki, bu adam Azərbaycanın ikinci böyük şəhərinə rəhbərlik edir, onda məsuliyyət bir qədər də artmış olur. Həmin tədbirdə iştirak edən Zabelin milliyyətçə rus olsa da, Azərbaycan vətəndaşıdır. Elə həmin icra başçısı ilə eyni vətəndaşlıq haqlarına sahibdir. Yaxasında Rusiyanın yox, Azərbaycanın bayrağının əks olunduğu deputat nişanını gəzdirir. Onun qabağına niyə Rusiya bayrağı qoyulmalıdır? Ola bilər ki, həmin tədbirdə Rusiyanı təmsil edən hansısa bir şirkət də iştirak edib. Hətta belə olsa da, bu mənzərə yaradılmamalıydı. Protokol qaydalarına görə paritet gözlənilməlidir. Həmin bayraq icra başçısı Rusiyanın hansısa rəsmi şəxsini qəbul etsəydi masaya qoyula bilərdi. Fotoda isə biz icra başçısının Zabelinlə yanaşı oturduğunu görürük, hansısa üçüncü şəxsin şəkli yoxdur ki, səhvə don geyindirilsin. İcra başçısı ilə yanaşı Zabelinin özü də bu mənzərəyə etiraz etməlidir. Təəssüf ki, məmnunluqla foto çəkdirib. Mən bir neçə tədbirdə Zabelinin rus dilində çıxış etdiyini görmüşəm. Bu adam uzun müddətdir ki, parlamentdə təmsil olunur, ancaq hələ də təmsil olunduğu ölkənin dövlət dilini lazımi şəkildə öyrənməyib”.
Ekspertin sözlərinə görə, Gəncəyə rəhbərlik edən şəxs bilməlidir ki, o, həm də tarixi Azərbaycan şəhərinə başçılıq edir: “Həmin şəhərdən Cavad xan kimi sərkərdələr çıxıb və son nəfəsinə kimi yadelli işğalçılara qarşı vuruşub. Bu məsuliyyəti dərk etmək lazımdır ki, belə siyasi səhvlərə yol verməyəsən. Ümidvaram ki, həm Zabelinə, həm də icra başçısına bu vəziyyətlə bağlı lazımi xəbərdarlıqlar olunacaq”.
Məhəmmədəli QƏRİBLİ
