Ermənistan KİV-nin separatçıların hərbi rəhbərliyinə istinadla yaydığı məlumatlarda deyilir ki, Azərbaycan hərbçiləri Şuşa şəhəri yaxınlığında yerləşən mövqelərdən Ermənistanın yaşayış məntəqələrini və hərbi mövqelərini atəşə tutub. Azərbaycan Müdafiə Nazirliyi bu məlumatlara reaksiya verməyib.
Eyni zamanda, Ermənistan XİN Azərbaycan və Türkiyə xüsusi təyinatlılarının Laçında keçirilən birgə təlimlərini “regional təhlükəsizliyə təhdid” kimi qiymətləndirərək, Azərbaycanı vəziyyəti gərginləşdirməkdə və təcavüzdə ittiham edib. Azərbaycan Respublikası Xarici İşlər Nazirliyindən isə bildirilib ki, beynəlxalq sərhədləri çərçivəsindəki ərazisində müxtəlif təlimlər keçirmək hər bir dövlətin suveren hüququdur: “Azərbaycan bugünədək ərazisində çoxsaylı hərbi təlimlər, o cümlədən tərəfdaş ölkələrin iştirakı ilə birgə təlimlər keçirib. Laçın rayonunda başlanılan birgə taktiki təlim də məhz bu qəbildən olan və bölgədə sabitliyin təmin olunmasına xidmət edən addımdır. Ermənistan XİN-in diqqətinə çatdırırıq ki, regional sülhə və təhlükəsizliyə təhdid dövlətin öz ərazisində hərbi təlim keçirməsi yox, Ermənistanın uzun illər ərzində tətbiq etdiyi kimi digər dövlətin ərazilərinə iddialar irəli sürmək, hərbi təcavüz siyasəti yürütmək, digər dövlətin ərazilərini işğal altıda saxlamaq və nəhayət, beynəlxalq hüququn prinsiplərini tapdalamaqdır. Əgər Ermənistan bölgədə sülh və təhlükəsizliyin təmin olunmasını istəyirsə, o zaman özünün də imza atdığı öhdəliklərin icrasına riayət etməlidir”.
Ermənistanın Azərbaycanın keçirdiyi hərbi təlimlərə etiraz etmək hüququ varmı?
Hərbi-siyasi ekspert İbrahim Rüstəmli “Bakı-Xəbər”ə açıqlamasında bildirdi ki, Ermənistan tərəfdən səslənən bu ittihamların heç bir hüquqi və məntiqi əsası yoxdur: “Azərbaycan müstəqil bir ölkədir. Buna görə də bizim öz ərazimizdə istənilən tədbirləri və hərbi təlimləri həyata keçirmək səlahiyyətimiz var. Azərbaycanla Türkiyə arasında həm də Strateji Əməkdaşlıq Sazişi imzalanıb. Bu saziş 2010-cu ilin dekabr ayında Azərbaycanın Milli Məclisi, 2011-ci ilin fevral ayında isə Türkiyə Böyük Millət Məclisi tərəfindən qəbul olunub. Azərbaycan tərəfdən həmin Sazişi Prezident İlham Əliyev, Türkiyə tərəfdən isə Türkiyənin sabiq prezidenti Abdullah Gül imzalayıb. 2018-ci ildə isə hərbi sənaye sahəsində Azərbaycan –Türkiyə əlaqələrini daha da möhkəmlədən çox mühüm bir sənəd imzalanıb. Bununla bağlı Azərbaycan Respublikasında qanunvericilik aktı da qüvvəyə minib. Yəni Azərbaycan yalnız Türkiyə ilə deyil, dünyanın 30-dan çox ölkəsilə ikitərəfli hərbi əməkdaşlıq edir. Bu istiqamətdə sazişlər, memorandumlar imzalanıb. Bütün bunlar Azərbaycanın öz hüququdur. Ermənistanın bu təlimlərə bu cür reaksiya verməyə ixtiyarı çatmır. Bunu birmənalı şəkildə növbəti erməni təxribatı adlandırıram. Azərbaycan öz ərazisində çoxlu sayda təlimlər keçirib. Nə vaxtsa Naxçıvanda və digər bölgələrimizdə keçirilən təlimlər bu gün də Laçında keçirilirsə, burada qeyri-adi nə var ki? Sabah eyni cür təlimi biz Kəlbəcərdə və ya Şuşada da keçirə bilərik. Bu cür erməni sabotajlarına fikir vermək lazım deyil. Biz heç vaxt ərazimizdəki hansısa tədbirlə bağlı Ermənistanın nə düşündüyünü əsas götürməməliyik. Yaxşı olardı ki, Ermənistan bütün bunlardan özü üçün doğru nəticələr hasil etsin, nəinki demaqogiya ilə məşğul olsun”.
Məhəmmədəli QƏRİBLİ
