Rusiya Prezidenti Vladimir Putinin keçmiş müşaviri, politoloq Andrey İllarionovun 44 günlük müharibənin nəticələri ilə bağlı verdiyi müsahibə böyük marağa səbəb olub. Onun sözlərinə görə, baş verənlər onu göstərir ki, Azərbaycan müharibədə real olaraq yalnız qalib deyil, həm də diqtə edən tərəfdir.
A.İllarionov bunu belə əsaslandırıb: “Bəyannamənin bəndlərini məhz Əliyev oxudu, Putin yox! Diqqət edin - Əliyev! Əliyev onu oxudusa, deməli, əsas müəllif də Əliyevdir. Kreml mətbuatı Putin və Lavrovun sənədi işləməsi barədə çox şey yaza bilər. Amma oxuyan Əliyev idi, diqtə edən də o idi. Bu onu sübut edir ki, danışıqların əsas şəxsi Əliyev idi. Əliyev öz məqsədinə çatdıqdan sonra Putinlə razılaşdı. Razılaşma olmasaydı, Azərbaycan ordusu Xankəndini ala bilərdi, bu, sual doğurmur. Lakin görünür, Əliyevə bu lazım deyildi. Ona Azərbaycan xalqının simvolu olan Şuşa lazım idi. Şuşanı götürməklə o, əsas strateji yolu götürdü, Qarabağı Ermənistanla birləşdirən yolu ələ aldı. Daha sonra ikinci yolu Kəlbəcəri götürməklə əldə etdi. Bununla da bütün Qarabağı torbaya saldı. Bu, Əliyev üçün bütün Qarabağı ələ keçirməkdən daha vacib, daha sərfəli idi, nəinki bütün Qarabağda Azərbaycan Ordusunun oturması. Ona Qarabağı mühasirəyə almaq lazım idi. Bu mühasirə Ermənistan üçün yox, Rusiya üçün idi. O da bunu aldı və nümayiş etdirdi. O bəyanatı da nə Putin, nə Ərdoğan, məhz Əliyev diqtə etdi”.
Bütün bunlar bir daha Azərbaycanın ciddi uğur əldə etməsinin xaricilər tərədfindən də etiraf olunmasıdır. O mənada ki, Prezident İlham Əliyev necə böyük siyasi güc ortaya qoyub
“Əminəm ki, tezliklə həmin ərazilər də Bakının nəzarətinə keçəcək”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin sözlərinə görə, bütün bunlar Prezident İlham Əliyevin necə böyük bir siyasətçi olduğunu bir daha sübut edir: “Bəli, Azərbaycan qalib gələn tərəf olmaqla yanaşı, həm də diqtə edən tərəf idi. Xarici ekspertlərin bunu görməsi və dəyərləndirməsi müsbət haldır. Bunu şərtləndirən bir sıra faktorlar var. Məsələ ondadır ki, 30 ilə yaxın idi ərazilərimiz işğal altında idi. Ancaq yaranmış vəziyyəti Prezident İlham Əliyevin düzgün qiymətləndirməsi sayəsində işğal altında olan ərazilərin böyük hissəsi iki ay ərzində tam azad edildi. Söhbət ondan gedir ki, işğaldan azad olunan 10 min kvadrat kilometrə qədər ərazinin 5 min kvadrat kilometri doyüş yolu ilə, bir o qədəri də döyüşsüz azad edildi. Daha dəqiq desək, Ordumuzun parlaq qələbələri düşməni buna məcbur etdi. Ağdam və Kəlbəcərdən sonra dekabrın 1-də Laçın işğaldan azad olundu. Bununla belə, 10 noyabra qədər Zəngilan və Qubadlının bəzi əraziləri ermənilərin işğalı altında idi. Prezidentin siyasi iradəsi sayəsində həmin ərazilər də tam azad edildi. Qarabağın az bir hissəsi rus sülhməramlılarının əlindədir. Ancaq əminəm ki, tezliklə həmin ərazilər də Bakının nəzarətinə keçəcək. Ən azı ona görə ki, sözügedən ərazi Azərbaycan Ordusunun mühasirəsindədir. O baxımdan A.İllarionovun dəyərləndirməsi reallığa söykənir”.
V.Rəhimzadə hesab edir ki, bundan sonra Azərbaycan daha güclü dövlət olacaq.
Vidadi ORDAHALLI
