Bu gün Ermənistanda Azərbaycan dilinin öyrənilməsinə böyük maraq müşahidə edilir. İndiyə qədər bu ölkədə bir neçə Azərbaycan dili mərkəzi açılıb. Bu günlərdə isə Ermənistanda yeni Azərbaycan Dili Mərkəzi açıldığı haqqında informasiya yayılıb. “Azerbaijani Language Center” adlı mərkəzin rəhbərliyi erməni mətbuatına bildirib ki, mərkəzdə dil öyrənməklə yanaşı, müxtəlif axtarış sistemləri və robotlarlarla məlumat toplamağı da öyrədiləcək.
O həmçinin deyib ki, Ermənistanda Azərbaycan dilinə maraq var, nəinki xüsusi xidmət orqanlarının əməkdaşları, hətta sadə vətəndaşlar da bu dilə maraq göstərir, öyrənmək istəyir. Onun sözlərinə görə, Azərbaycan dilini bütün sadə vətndaşlar da, mütəxəssislər də öyrənməlidir, bilməlidir.
Son zamanlar Ermənistanda Azərbaycan dilinə maraq hardan qaynaqlanır?
“Onlar istəyirlər ki, bu ölkədə hər kəs Azərbaycan dilini bilsin və sadə vətəndaşlar səviyyəsində belə rahatlıqla təxrubatçılıqla məşğul olsunlar”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin kiçik elmi işçisi, ermənişünas Aynur Əzimzadə “Bakı-Xəbər”ə bildirdi ki, Ermənistanda Azərbaycan dilini öyrədən kursların, mərkəzlərin yaradılması, bura gənclərin dəvət edilməsi təsadüfi deyil. A.Əzimzadənin sözlərinə görə, Ermənistanda Azərbaycan dilinin bu şəkildə təbliği heç də xoş niyyətlərə söykənmir, burada məqsəd aydındır: “Ermənistanda Azərbaycan dilinin öyrənilməsi prosesinə Sovet dövründən başlanılıb. Bu da, təbii ki, birmənalı olaraq məkrli niyyətlərə xidmət edib. 44 günlük Vətən savaşında Azərbaycanın Ermənistana sarsıdıcı zərbə vurub onu diz çökdürməsi bu ölkədə hər şeyə təsir göstərib. Ermənistanda Azərbaycan dilinin öyrədilməsində məqsəd odur ki, bizim dilimizi öyrənib, bizim daxilimizdə təxribatlar törətsinlər. Onlar istəyirlər ki, bu ölkədə hər kəs Azərbaycan dilini bilsin və sadə vətəndaşlar səviyyəsində belə rahatlıqla təxrubatçılıqla məşğul olsunlar. Azərbaycan dili Ermənistan ali təhsil müəssisələrində də öyrədilir, onlar Azərbaycanşünas mütəxəssislər yetişdirirlər ki, gələcəkdə bizə qarşı informasiya müharibəsində istifadə etsinlər. Maraqlıdır ki, Ermənistanda Azərbaycan dilinin öyrədilməsinə dövlət səviyyəsində şərait yaradılır. Bu da, dediyim kimi, təsadüfi deyil və Ermənistanın gələcəkdə öz məkrli planlarını daha da genişləndirmək istəyinə xidmət edir”.
A.Əzimzadə hesab edir ki, ermənilərin Azərbaycan dilinə meyl göstərməsi həmçinin bizim tariximizi saxtalaşdırmaq niyyəti də güdür. O hesab edir ki, Azərbaycan dilini öyrədən mərkəzlərdə xüsusi olaraq Azərbaycanla bağlı hər şey öyrədilir. “Ermənistanda Azərbaycan dilinin öyrənilməsinə meylin günü-gündən artmasının səbəbləri çoxdur. Onlardan biri də odur ki, ermənilər gələcəkdə Azərbaycan dilini bilmədən regionda hərəkət etməyin çətin olacağını bilir. Çünki Azərbaycan regionun lider dövlətidir və onun rəsmi dövlət dili də önəmli əhəmiyyət daşıyır” - deyə A.Əzimzadə qeyd etdi.
İradə SARIYEVA
