Məlum olduğu kimi, Xarici İşlər Nazirliyi 10 noyabr razılaşması ilə bağlı tvitterdə paylaşım edib. Paylaşımda 10 noyabrdan sonra görülən işlərdən bəhs olunub.
Məlumatda qeyd olunur ki, Azərbaycan hökuməti məcburi köçkünlərin işğaldan azad edilən ərazilərə təhlükəsiz və layiqli geri dönməsi üçün işləri davam etdirir: “Azərbaycan, Ermənistan və Rusiya arasında 10 noyabr sazişinin imzalanmasından 300 gün keçir. Bu müddət ərzində azad edilmiş ərazilərdə 15510 hektardan çox sahədən 46486-dan çox mina və partlamamış hərbi sursat təmizlənib. İşğal dövründə Ermənistan tərəfindən basdırılan minaların partlaması nəticəsində 160 Azərbaycan vətəndaşı həlak olub və ya yaralanıb.
İşğaldan azad edilmiş Füzuli rayonunda ilk beynəlxalq hava limanı test uçuşlarına başlayıb. Bununla yanaşı, Zəngilan və Laçın rayonlarında iki beynəlxalq hava limanının tikintisi davam etdirilir. Ağdamın baş planı təsdiq edilib və Şuşada çox sayda mədəni binalar və tarixi abidələr bərpa edilib. Zəngilan rayonunun Ağalı kəndində “Ağıllı kənd” layihəsinin həyata keçirilməsinə başlanılıb və layihənin 2022-ci ilin əvvəlində tamamlanması planlaşdırılır”.
Görünən odur ki, Azərbsaycan XİN-i 10 noyabrdan sonra görülən işlərlə bağlı bir növ hesabat xarakterli məlumat yaydı. Maraqlıdır, üçtərəfli razılaşmada tərəf olan Rusiya və Ermənistan XİN-ləri niyə belə hesabatla çıxış etmir?
“Bütün bunlar onu göstərir ki, 300 gün ərzində Qarabağda görülən işlərə görə nə Ermənistan, nə də Rusiya sevinir”
Sözügedən məsələyə aydınlıq gətirən sabiq diplomat, politoloq Fikrət Sadıqov Ermənistan və Rusiya XİN-lərinin bənzər hesabatla çıxış etməməsini bir sıra amillərlə əlaqələndirdi: “Əvvəla, Ermənistan məğlubiyyətə uğrayan, uduzan tərəfdir. Qarabağın hələ də ermənilərin nəzarətində olan hissəsi hüquqi baxımdan Azərbaycanın tərkib hissəsidir. Bu, bütün beynəlxalq sənədlərdə öz əksini tapıb. Təbii ki, bütün bunlardan çıxış edərək Ermənistan görülən işlərlə bağlı hesabat vermək istəmir. Rusiya 10 noyabr razılaşmasında tərəf olsa da, sülhməramlıları müvəqqəti olaraq ora yerləşdirib. Bütün bunlarla yanaşı yaddan çıxarmaq olmaz ki, Rusiya Ermənistanın yaxın hərbi müttəfiqidir. Bütün bunlar onu göstərir ki, 300 gün ərzində Qarabağda görülən işlərə görə nə Ermənistan, nə də Rusiya sevinir. Sadəcə, onlar bunu bir reallıq kimi qəbul edirlər və bununla məcburən barışırlar. Azərbaycan qalib gələn tərəfdir. Bizim qısa zamanda əldə etdiyimiz uğurlar göz qabağındadır. Ötən müddət ərzində Şuşaya uzunluğu 101 kilometr olan Zəfər yolu çəkilib. Bir sıra yeni elektrik stansiyaları tikilib. Tikilən 3 hava limanından biri artıq hazırdır. Faktiki olaraq, azad olunan ərazilərdə genişmiqyaslı yenidənqurma işləri gedir. Əlbəttə ki, bütün bunlar bizi qane edir. Ancaq bütün bunları nə Ermənistan, nə də Rusiya həzm etmək istəmir. Bir növ onlar bundan məyusdular. Niyə? Ona görə ki, separatçıların arqumentləri darmadağın olur. Bax, budur məsələnin mahiyyətində dayanan faktor”.
Politoloq hesab edir ki, kimin hansı mövqedə olmasından asılı olmayaraq, Azərbaycan öz işində olmalıdır.
Vidadi ORDAHALLI
