Sülməramlıların Azərbaycan jurnalistlərini Xudavəngə buraxmaması barədə məlumat yayılıb. Məlumatlara görə, Parlament Jurnalistləri Birliyinin bir qrup üzvü Kəlbəcərdə olub, rayonun bir sıra vacib nöqtələrinə gedən jurnalistlər “Xudavəng” məbədi ərazisinə də baş çəkiblər, lakin Rusiya sülhməramlıları onları “Tanrı məbədi”nə buraxılmayıb. Özünü cavabdeh şəxs kimi təqdim edən “İlya” adlı rus əsgər komandanlığın əmrinə əsasən içəri heç kimi buraxa bilməyəcəyini söyləyib.
Bununla belə, onlar foto-videoların kənardan çəkilməsinə mane olmayıblar.
“İçəridə erməni keşişlər varmı” sualına sülhməramlı, – “var”, cavabı verib. Məbəddə iki erməni keşişin olduğu deyilsə də, onları müşahidə etmək mümkün olmayıb.
Xatırladaq ki, bundan əvvəl erməni keşişlərin Xudavəngi tərk etdiyi söylənilirdi və bunu erməni tərəfi də təsdiqləyirdi.
Xudavəng IX əsr alban abidəsidir. Azərbaycanın alban irsinə məxsus məbəd Kəlbəcər işğal olunandan sonra erməniləşdirilib.
Ermənilər kilsəyə aid xaç və yazıları balta ilə çaparaq yox edib, beləliklə, tarixi saxtalaşdırmağa çalışıb.
Hazırda ərazi Rusiya sülhməramlıları tərəfindən mühafizə olunur.
Sülhməramlı kontingent bizim jurnalistlərə niyə mane olub?
“Azərbaycan höküməti tərəfindən ciddi şəkildə araşdırılmalıdır, müvafiq reaksiya verilməlidir”
Siyasi şərhçi, tanınmış media eksperti Azər Həsrət bizimlə söhbətində qeyd etdi ki, Azərbaycan ərazisində azərbaycanlı jurnalistlərə qarşı bu davranış qəbuledilməzdir. A.Həsrət vurğuladı ki, Xudavəng qədim Azərbaycan monastırıdır və bu məbəd Azərbaycan ərazisindədir, bu baxımdan, sülhməramlıların hərəkəti qanuna ziddir: “Bura Azərbaycan ərazisidir. Azərbaycan ərazisində də Azərbaycan jurnalistlərinin fəaliyyətinə Rusiya sülhməramlılarının hansısa bir maneçilik törətməsi böyük qanunsuzluqdur. Onlar bunu edə bilməzlər, üstəlik də, onların nəzarətində, yaxud nəzarətindən kənar olan ərazilərdə belə bir hadisə baş veribsə, sözsüz, Azərbaycan höküməti müvafiq münasibət bildirməlidir. Ümumiyyətlə, belə anlayıram ki, Rusiya sülhməramlıları həqiqətən də nə etdiklərinin fərqində deyillər. Yəni onlar həddlərini aşırlar, artıq hərəkətlərə yol verirlər, ermənilərin tərəfdarları kimi davranırlar. Halbuki, Azərbaycan onları öz ərazisinə neytral qüvvə kimi dəvət edib. Yəni neytral o mənada ki, azərbaycanlılarla ermənilər arasında bir növ qarşılıqlı anlaşma yaranana qədər ortaya çıxa biləcək anlaşılmazlıqları aradan qaldırmaq üçün gəliblər. Arzuolunmaz neqativ halların yaşanmaması üçün onlar buradadır. Amma biz baxırıq ki, sülhməramlılar Azərbaycan tərəfi tamamilə unudublar, oradakı bir ovuc erməniyə havadarlıq, himayədarlıq edirlər. Üstəlik də, ikidəbir gedib İrəvanda Paşinyanla, başqası ilə görüşürlər. Anlaya bilmirəm ki, Azərbaycan ərazisindəki sülhməramlı gedib Ermənistan rəhbərliyi ilə niyə görüşməlidir...”
A.Həsrətin sözlərinə görə, ümumiyyətlə bu ərazinin Ermənistana heç bir aidiyyəti olmadığı üçün sülhməramlıların Ermənistana istilik göstərməsinin özü də anlaşılmazdı. “Azərbaycan ərazisində ermənilər də yaşayır, qoy yaşasınlar, amma bu o demək deyil ki, gedib onlar tez-tez Ermənistan rəhbərliyi ilə görüşməlidirlər, nə isə müzakirə etməlidirlər. Ərazi Azərbaycan ərazisidir. Oradakı ermənilər də Azərbaycan vətəndaşıdır. Ümumiyyətlə, artıq bu məsələdə tərəf olaraq Ermənistan yoxdur. Azərbaycan öz ərazi bütövlüyünü təmin edib, məsələ qapanıb. Ortada bir ovuc erməni var, onlar da bu gün-sabah öz qərarlarını verəcəklər, kimisi qalacaq, kimisi isə çıxıb gedəcək. Sülhməarmlıların jurnalistlərimizin monastırı ziyarətinə mane olmasına gəlincə, bu, Azərbaycan höküməti tərəfindən ciddi şəkildə araşdırılmalıdır, müvafiq reaksiya verilməlidir”-deyə siyasi şərhçi qeyd etdi.
İradə SARIYEVA
