Qarabağdakı Rusiya sülhməramlı kontingentinin komandanı, general-leytenant Rüstəm Muradov vəzifəsindən ayrılır. Bu barədə Ermənistanın müdafiə naziri Arşak Karapetyanla R.Muradovun görüşündə danışılıb. Görüşdə R.Muradovu kimin əvəz edəcəyi barədə məlumat verilməsə də, böyük ehtimalla, kontingentin rəhbəri vəzifəsinə Cənub Hərbi Dairə komandanının müavini, general-leytenant Aleksey Avdeyev təyin olunacaq.
Maraqlıdır ki, Rüstəm Muradov vəzifəsilə vidalaşarkən son görüşdüyü rəsmi şəxs Ermənistanın müdafiə naziri olub. Sülhməramlı kontingentin Azərbaycan ərazisində fəaliyyət göstərdiyini nəzərə alsaq, sual yaranır: Rüstəm Muradov niyə vəzifəsilə Bakıdan yox, İrəvandan vidalaşdı? Məlumdur ki, sülhməramlı kontingentin indiyə qədərki fəaliyyətindən Azərbaycanda haqlı narazılıqlar var. Çünki bu müddət ərzində onlar üzərlərinə düşən öhdəlikləri yerinə yetirməyiblər. Maraqlıdır, Rüstəm Muradovun yerinə başqa bir generalın təyinatı sülhməramlıların fəaliyyətində müsbətə doğru dönüş yarada bilərmi?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, general Rüstəm Muradovun vəzifəsindən azad edilməsi və onun başqa bir generalla - Avdeyevlə əvəzlənməsini Azərbaycan üçün müsbət hadisə saymaq olar: “Hesab edirəm ki, Rüstəm Muradovun keçirdiyi son görüşlər onun bütün fəaliyyətinin yekunu kimi qiymətləndirilə bilər. Vəzifəsinin icrasının son günlərində o, Xankəndidə Arayik Arutunyanla, İrəvanda isə Ermənistanın müdafiə naziri ilə görüşdü. Açıq demək lazımdır, Rüstəm Muradovun fəaliyyəti Azərbaycanı qane etmirdi. Təsadüfi deyil ki, Rüstəm Muradovun vəzifədən azad edilməsilə bağlı qərar Lavrovun Bakıya son səfərindən sonra verildi. Bu söhbət bir neçə aydır davam etsə də, Lavrovun səfəri zamanı daha aktual şəkildə müzakirə edilməyə başladı. Rüstəm Muradova çoxlu iradlar var idi. Nədənsə o, sülhməralıların yalnız humanitar hissəsini önə çəkmişdi. Elə təsəvvür yaranırdı ki, onun bundan başqa işi yoxdur. Güman edilir ki, burada onun şəxsi maraqları olub. Yəqin ki, həmin əməliyyatlar zamanı mənimsəmə hallarına da yol verib. Onun narkotrafiklə bağlı məsələdə də əli olduğuna dair fikirlər səslənir. Bir sözlə, Rüstəm Muradovla bağlı Rusiya hakimiyyətinin əlində kifayət qədər dəlillər var. Çox güman ki, hərbi prokurorluq bu məsələləri dəqiq araşdıracaq. Azərbaycan rəsmi dairələri dəfələrlə ondan öz narazılığını Moskvanın diqqətinə çatdırıb. Yalnız bir faktı nəzərə çatdıraq ki, Rüstəm Muradov faşist Qaregin Njdeyə ucaldılan abidəni Qarabağda sökdürə bilmədi. Bu hal həm Azərbaycanda, həm də Rusiyada eyni narazılığı doğurdu”.
Partiya sədrinin sözlərinə görə, Rüstəm Muradovun yerini tutacaq Andrey Avdeyev döyüş generalı deyil: “Qərargahda çalışan hərbçi kimi, daha diplomatik yanaşma sərgiləyən bir şəxsdir. Güman edirəm ki, o, Azərbaycan torpaqlarının bizim öz nəzarətimizə verilməsi məsələsinə daha ciddi yanaşa biləcək və bu işi bacaracaq. Yol verilmiş əyintiləri aradan qaldıracaq. Yalnız humanitar məsələlərlə yox, öz funksiyası ilə məşğul olacaq. Ümid edirəm ki, Avdeyevin təyinatı Azərbaycanın mövqeyini möhkəmlədəcək. Ölkəmizin uzun müddət tələb etdiyi Azərbaycanın Qarabağda tam suverenliyinin təmin edilməsi istiqmaətində zəruri addımlar atacaq”.
Məhəmmədəli QƏRİBLİ
