Rusiya Federasiyası Dövlət Satınalmalarının saytı Rusiya Federasiyası Müdafiə Nazirliyinin Qarabağ ərazisində yerləşən hərbi şəhərciklərinin kazarma-mənzil fonduna xidmət üzrə 13 avqust 2021-ci il tarixində elan edilmiş qapalı müsabiqəni (tender) ləğv edib. Tenderin mətnində Rusiya ordusunun hərbi şəhərciklərinin yerləşdiyi Qarabağ ərazisi "Dağlıq Qarabağ Respublikası" adlandırılıb.
Qapalı müsabiqənin keçirilməsi üçün ərizə Rusiya Federasiyası Müdafiə Nazirliyi tərəfindən verilib.
Bununla əlaqədar Azərbaycan ictimaiyyəti narazılığını ifadə edib. Rusiya Müdafiə Nazirliyinin Azərbaycan ərazisini "Dağlıq Qarabağ Respublikası" adlandırması həm də süverenliyimizə təhdid əlaməti sayılır. Rusiya və Azərbaycan Müdafiə nazirlikləri bu məsələni şərh etməyib. Məlum olub ki, nəzərdə tutulan tender ləğv edilib, bu barədə Rusiya Federasiyasının Dövlət sifarişlərinin saytında qeyd var. Görünüən budur ki, edilən səhv Rusiyanın dövlət siyasətindən qaynaqlanmayıb. Əks təqdirdə, kiminsə həmin tenderi ləğv etməyə cürəti çatmazdı. Onda belə çıxır ki, ya müvafiq işlə məşğul olanlar texniki səhvə yol verir, ya da Rusiyanın daxilindəki hansısa qüvvələr iki ölkə arsındakı münasibətlərə xələl gətirmək istəyir. Bu versiyalardan hansını daha inandırıcı saymaq olar?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Rusiya dövləti deyəndə, biz həmin ölkənin Prezidenti, Xarici İşlər Nazirliyinin Azərbaycanın ərazi bütövlüyü ilə bağlı rəsmi bəyanatlarını başa düşürük: “Nəzərə almalıyıq ki, Rusiyada Azərbaycanın ərazi bütövlüyünə xələl gətirmək istəyən qüvvələr olub və indi də var. Həmin qüvvələr Rusiyanın ən yüksək hərbi və siyasi elitasında cəmləniblər. Bu şəxslər hər addım başı Azərbaycanla Rusiya arasındakı münasibətlərin kəskinləşməsi və bunun fonunda Ermənistana xüsusi diqqətin ayrılmasına çalışırlar. Belə olan təqdirdə Azərbaycanın qarşısında duran məsələ bu hallara operativ reaksiya vermək, narazılığını ifadə etmək olur. Bir az da sadəlövh olmaq gərək deyil. Ola bilsin ki, Rusiya dövləti Azərbaycanın ərazi bütövlüyünü rəsmən tanıyır. Ancaq əl altdan hələ də Azərbaycanın ərazi bütövlüyünün tam təmin edilməsinə maneələr yaradır. Rusiyanın hərbi-siyasi elitasında Ermənistanın məğlubiyyətini qəbul etməyən şəxslər var. Biz bunu Rusiyanın dövlət kanallarında nümayiş edilən tok-şoulardan da görürük. Belə olmasaydı, bu cür incə məqamlarla bağlı yanlışlıqlar rəsmi saytlarda yer almazdı. Mən sizi əmin edirəm ki, satınalmalarla bağlı qurum həmin məlumatı Rusiya Müdafiə Nazirliyinin verdiyi məlumata əsaslanaraq öz saytında yerləşdirib. Belə görünür ki, bu səhvi Rusiyanın Müdafiə Nazirliyində olan aidiyyəti qurum buraxıb. Həmin aidiyyəti qurum, demək ki, həmin ərazini “müstəqil” olaraq görür. Əminəm ki, bu hal nə birincidi, nə də sonuncu. Yəqin ki, oxşar hallara biz gələcəkdə də rast gələcəyik. Çünki Rusiyanın Müdafiə Nazirliyi həmin ərazinin necə adlandığını hamıdan gözəl bilirsə, deməli, buraxılan səhv də texniki mahiyyətli olmayıb. Rusiya rəhbərliyi bu hallara son qoymağı tapşırmalıdır. Çünki analoji vəziyyətlər iki ölkə arasındakı münasibətlərin daha da gərginləşməsinə xidmət edir”.
Məhəmmədəli QƏRİBLİ
