İspaniyada yaşayan ermənilər Qranada şəhərinin Alqambr muzeyində nümayiş etdirilən qədim Azərbaycan xalçalarına qarşı təxribata cəhd ediblər.
Ermənilərin növbəti təxribatı barədə xarici KİV-lər məlumat yayıb. Bildirilənə görə, muzeyin xalçaların qədim Azərbaycan diyarı olan Qarabağa aid olduğunu qeyd etməsi bu ölkədəki ermənilərin narazılığı ilə qarşılanıb. XIX əsrə aid Qarabağ - Azərbaycan xalçalarının təqdimatının erməni saxtakarlığını alt-üst etmək baxımından əhəmiyyəti misilsizdir.
Məlumata görə, ermənilər hətta muzeyin rəhbərliyinə də qarşı təzyiqlərdən istifadə etməyə başlayıblar. Onlar sosial şəbəkələrdə də qədim Azərbaycan xalçalarının guya ermənilərə məxsus olduğunu iddia edirlər.
Qeyd edilənə görə, bu, İspaniyada təkcə sakinlərin deyil, xarici turistlərin də böyük maraq göstərdiyi məşhur muzeylərdən biridir.
Bilirik ki, ermənilər zaman-zaman Azərbaycan xalçalarını “erməni xalçaları” kimi qələmə verməyə çalışıblar. Azərbaycan xalçalarına əsassız iddialar irəli sürən ermənilər bununla həm özlərini, həm də beynəlxalq ictimaiyyəti aldatmış olublar.
Bir məsələni də qeyd edək ki, bu il fevralın 20-də Ermənistanın Tamanyan adına Milli Memarlıq Muzey-İnstitutunda Şuşa Xalça Muzeyindən 2020-ci il noyabrın 1-də çıxarılan xalçaların sərgisi keçirilib.
Sərgidə təqdim olunan, "Arsax" adlandırılan xalçalar Vətənimizin ayrılmaz hissəsi olan Qarabağa məxsus milli irs nümunələrimizdir. Bu sərgi ermənilərin növbəti oğurluğu və qeyri-qanuni mənimsəməsi oldu.
“Ermənilərin bu təxribatı da alınmayacaq, çünki bütün dünya artıq həqiqəti bilir...”
Tarixçi-etnoqraf Ənvər Çingizoğlu bizimlə söhbətində bildirdi ki, İspanıyanın Alqambr muzeyində baş verənlər növbəti erməni saxtakarlığı və həyasızlığının nümunələrindən biridir. “Ermənilərin Qarabağ xalçalarına qarşı hər hansısa iddia irəli sürməyə heç bir haqqı yoxdur. Bu gün dünyanın bütün nüfuzlu muzeylərində Azərbaycan xalçaları nümayiş olunur. Çox təəssüf ki, çirkin erməni təxribatı uzun illərdir Azərbaycan xalçalarını hədəfə götürüb. Qarabağ xalçaları dünya muzeylərinin gözüdür. Azərbaycanın dilbər guşəsi olan Qarabağda toxunan xalçalar dünyanın hər yerinə səpələnib. Bu da erməniləri ciddi narahat edir. Çünki Azərbaycanın Qarabağ bölgəsinə aid xalçaların xarici muzeylərdə sərgilənməsi erməni saxtakarlığını, illərdir apardıqları saxtakarlıq kampaniyalarını ifşa edir. İspaniyanın nüfuzlu bir muzeyində Qarabağ xalçaları təqdim edilirsə və bu xalçaların Azərbaycanın Qarabağ bölgəsində -Şuşada, Xankəndidə, Ağdərədə, Ağdamda, Füzulidə toxunduğu qeyd edilirsə, əlbəttə, bu, erməniləri narahat edir. Qarabağ xalçalarının İspaniya muzeyində sərgilənməsi o deməkdir ki, sabah ermənilər Qarabağdan oğurlayıb apardıqları xalçaları bu ölkənin muzeylərində “erməni xalçası” kimi qələmə verə bilməyəcəklər. Çünki mütəxəssislər buna imkan verməyəcək, deyəcəklər ki, bu xalça Azərbaycana aiddir”.
Ə.Çingizoğlu deyir ki, ermənilər son 30 ildə Azərbaycandan oğurladıqları xalçaların bir hissəsini artıq satsalar da, Qarabağdakı muzeylərdən, evlərdən qarət etdikləri xalçaların bir hissəsini də satmaq istəyirlər, amma hazırda bunu edə bilmirlər. “Ermənilər təkcə İspaniyanın bu muzeyinə qarşı deyil, Azərbaycan xalçalarının numayiş olunduğu bütün muzeylərə qarşı açıq-gizlin təzyiqlər göstərirlər. Fikrimcə, bu təzyiqlərin bir məqsədi var - Azərbaycan xalçalarının təbliğatının qarşısını almaq və bizim xalçaları “erməni xalçaları” kimi qələmə vermək. Amma ermənilərin bu təxribatı da alınmayacaq, çünki bütün dünya artıq həqiqəti bilir. Sadəcə, onu etiraf etmək istəmirlər.
Hesab edirəm ki, ermənilərin Qarabağdan qarət etdikləri bütün xalçaların ayrıca kataloqları hazırlanıb çap edilməli və dünya muzeylərinə təqdim edilməlidir”-deyə Ə. Çingizoğlu qeyd etdi.
İradə SARIYEVA
