Hindistan ordusu, donanması və hərbi hava qüvvələri son bir neçə gün ərzində baş nazir Narendra Modinin göstərişi əsasında pilotsuz aparatlar əldə etmək üçün bir neçə müqavilə bağlayıb. Müqavilələrin ümumi dəyəri 70 milyon dollara yaxındır və podratçılar qismində əsasən Hindistan şirkətləri seçilib. Hindistanın “The Print” nəşri bildirir ki, bu müqavilələr baş nazirin Azərbaycan-Ermənistan müharibəsinin təcrübəsi əsasında Hindistan ordusunun yeni müharibə şərtlərinə adaptasiya olunması barədə göstərişlərinə uyğun olaraq imzalanıb.
Müqavilələr kamikadze-dronların, müxtəlif müşahidə PUA-larının, üzən pilotsuz aparatların və digərlərinin təchizatını nəzərdə tutur. Qeyd olunur ki, baş nazirin dəftərxanası Azərbaycanla Ermənistan arasında münaqişə zamanı tətbiq edilən daha müasir müharibə texnologiyalarının tətbiqində israr edir. Bildirilir ki, pilotsuz aparatların və sursatların alınması “hərb işində inqilab”dır və müharibənin aparılması üsullarını dəyişdirir. Bütün müqavilələr təcili təchizat şərti ilə imzalanıb, göstərişə əsasən Hindistan ordusunun dronlarla silahlandırılması sürətlə həyata keçirilməlidir.
Məlumat üçün qeyd edək ki, 44 günlük müharibə zamanı Azərbaycan ordusunun geniş çeşiddə PUA-lardan, o cümlədən “Bayraktar TB2” zərbə pilotsuz təyyarəsi və “Harop” kamikadze-dronlarından geniş miqyasda istifadə etməsi, artilleriya atəşlərinin dronlarla koordinasiya olunması və döyüş aviasiyasının PUA-larla koordinasiyalı fəaliyyəti beşinci nəsil müharibə təcrübəsini ortaya qoyub. Bu baxımdan Hindistan kimi böyük bir ölkənin Azərbaycanın döyüş təcrübəsini ekspertlər necə dəyərləndirir?
“Hindistan kimi nüvə dövlətinin bunu öyrənməyə qərar verməsi bu təcrübənin necə uğurlu olmasını bir daha sübut edir”
Məsələyə münasibət bildirən hərbi ekspert İbrahim Rüstəmlinin sözlərinə görə, Hindistan kimi böyük bir nüvə dövlətinin Azərbaycanın döyüş təcrübəsini öyrənməsi mühüm hadisədir: “Ümumiyyətlə, 44 günlük müharibə müharibə strategiyasının, taktikasının dünyadakı ümumi təcrübə baxımından yeni bir mərhələsi idi. Yəni 44 günlük Vətən müharibəsi indiyə qədər aparılan savaşların içərisində ən yeni taktiki və strateji əməliyyatların nümayişi idi. Sözügedən müharibədə ilk dəfə olaraq silah sərgilərində nümayiş olunan vasitələr uğurla praktiki olaraq geniş müstəvidə tətbiq olundu. Adətən hansısa yeni silahlar istehsal olunarkən sınaqdan keçirilir. Döyüş şəraitinə yaxın vəziyyətdə sınaqdan keçirilmir. 44 günlük müharibədə isə PUA-lar geniş miqyasda tətbiq olundu. Özü də özünü çox yaxşı doğrultdu. Bununla bağlı hansısa xüsusi təlimlərin keçirilməsinə ehtiyac yoxdur. Təkcə Hindistan deyil, dünyanın bir çox ölkələri Azərbaycanın döyüş təcrübəsini öyrənir. Bir çox ölkələr Azərbaycan ordusunun ortaya qoyduğu müharibə təcrübəsi əsasında silahlanma konsepsiyasını dəyişdirir. Nəticədə öz ordularını dronlarla silahlandırmaq üçün fəaliyyətlərə başlayıblar. Hindistan kimi nüvə dövlətin bunu öyrənməyə qərar verməsi bu təcrübənin necə uğurlu olmasını bir daha sübut edir. Nəzərə almaq lazımdır ki, Hindistan ordusu döyüş təcrübəsinə malikdir. Beynəlxalq hərbi sərgilərdə ən yaxşı nə var idisə, Azərbaycan Ordusu tərəfindən öyrənildi. Nəticədə 44 günlük müharibədə müasir hərb elminin ən yeni taktiki-strateji xətlərini, üstünlüklərini koordinasiyalı şəkildə tətbiq etdik. Müasir silah sənayesinin ən müasir yeniliklərini tətbiq etdik. Bütün bunlar özünü doğrultdu. Görünən odur ki, Hindistan kimi nüvə dövləti Azərbaycanın hərbi uğurunun sirlərini öyrənir. Bu həm də o deməkdir ki, Azərbaycan XXI əsrdə ən müasir müharibə aparmaq qaydasını praktiki olaraq ortaya qoydu”.
Hərbi ekspert hesab edir ki, hələ çox ölkələr bunu öyrənəcək.
Vidadi ORDAHALLI
