Erməni separatçılarının keçirdiyi qondarma mərasimdə (“dqr”in 30-cu “müstəqillik günü”) insident yaşanıb. Ermənistan mediasının yazdığına görə, İrəvandan gələn “Mülki müqavilə” fraksiyası deputatları insidentlə üzləşiblər.
Belə ki, Ermənistanın hakim partiyasının deputatlarının gəlməsindən xəbər tutan Qarabağda məskunlaşdırılan bəzi ermənilər daş-kəsəklə “silahlanaraq”, “Ermənistan” otelinin qarşısına yığılıblar və deputatlara daş atıb, təhqirlər yağdırıblar. Aydın olub ki, ora toplaşanlar İkinci Qarabağ savaşında ölən əsgərlərin valideynləridir və onlar övladlarının ölümündə Ermənistan hakim partiyasını günahlandırırlar. Onlar deputatların Qarabağa gəlməyə haqqı olmadığını da bildiriblər.
Erməni mənbələri xəbər verir ki, “Vətəndaş müqaviləsi”nin bəzi tərəfdarları belə məlumatdan qəzəbənərək, heç bir insidentin olmadığını iddia ediblər. Ancaq sonradan baş verənlərin təfərrüatları da ortaya çıxıb. Məlum olub ki, həlak olan hərbçilərin yaxınları deputatların səfər qrafikini öyrəndikdən sonra onların “qardaşlıq məzarlığı”na getməsini əngəlləməyə çalışıblar. Bu mənada, etirazçılar İrəvandan gələnlərin yerləşdiyi “Ermənistan” mehmanxanasına daxil olmağa cəhd göstəriblər. Ancaq “polis” qəzəblənmiş insanların qarşısını alıb. Vəziyyətin gərginliyini görən irəvanlı deputatlar qorxularından məzarlığa getməkdən vaz keçməyə qərar veriblər. Ermənistan deputatlarının Xankəndidə qarşılaşdığı bu mənzərə nəyi deməyə əsas verir?
Klassik Xalq Cəbhəsi Partiyasının funksioneri Xəzər Teyyublu “Bakı-Xəbər”ə açıqlamasında bildirdi ki, bu fakt əsl həqiqətin nə olduğunu üzə çıxarır: “Doğrudan da Qarabağdakı ermənilər Ermənistandakı siyasilərin utopik ambisiyalarının əziyyətini çəkir. 30 il müddətində Ermənistanın yürütdüyü işğal siyasəti heç bir nəticə vermədi. İndi müharibə bitib, Ermənistandakı siyasilər və rəhbərlik yenə Qarabağda qalan erməniləri rahat buraxmır. Üzərlərinə düşən öhdəlikləri yerinə yetirmirlər ki, oradakı ermənilər Azərbaycanın yurisdiksiyası altında firavan yaşasınlar. Keçirilən bayram onların nəyinə lazımdır? Görürsünüzmü, valideynlər ölən övladlarına görə Ermənistanın hakim partiyasının deputatlarını daş-qalaq edir. Çünki görürlər ki, onlar sülhə mane olur, yenidən müharibə alovlandıramq istəyirlər. Müharibədə ölən isə onların övladları olur. Bununla sübut olunur ki, Qarabağda qalan bir ovuc mülki erməni artıq müharibə istəmir. Onlar cana doyublar. Öz doğulduqları yerdə şülh içində yaşamağa çalışırlar. Bu vəziyyətdən ən dolğun nəticəni Ermənistan rəhbərliyi çıxarmalıdır. Bilməlidirlər ki, gələcək mövcudluqları Qarabağdan bütün silahlı qüvvələrini çıxarmaqdan, separatçı və revanşist meyllərdən əl çəkməkdən asılıdır. Belə yolu tutmayacaqları təqdirdə, onları yeni fəlakətlər gözləyir. Bir anlıq təsəvvür edək ki, deputatların yerinə hansısa yüksək çinli erməni rəsmisi olaydı. Onda vəziyyət daha da acınacaqlı və dramatik hal alardı. Deməli, Qarabağdakı ermənilərlə Ermənistandakılar arasında ciddi fikir ayrılığı, hətta mənəvi uçurum var. Proses bu şəkildə davam edərsə, ermənilərin özləri Azərbaycan hakimiyyətinə pənah gətirəcək”.
Məhəmmədəli QƏRİBLİ
