ATƏT Minsk Qrupunun Rusiyadan olan yeni həmsədri İqor Xovayev Cənubi Qafqaza səfər edəcək. Məlum olduğu kimi, bunu Rusiya Xarici İşlər Nazirliyinin xüsusi nümayəndəsi Mariya Zaxarova deyib.
O bildirib ki, Rusiya ATƏT Minsk Qrupu həmsədrlərinin mövcud mandat əsasında Qarabağ tənzimlənməsi üzrə işinin fəallaşdırılmasını dəstəkləyir: “Həmsədrlər Bakı ilə İrəvan arasında etimadın yüksəldilməsinə kömək göstərə bilər. Minsk Qrupunun yeni həmsədri regiona səfər edəcək”.
M.Zaxarovanın Minsk Qrupu ilə bağlı bu cür mövqe sərgiləməsi və bu barədə bir növ əminliklə danışması Azərbaycanın rəsmi mövqeyi ilə ziddiyyət təşkil edir. Məsələ ondadır ki, Azərbaycan Qarabağ tənzimləməsində Minsk Qrupunun fəaliyyətinin bitdiyini bəyan edir. Bu səbəbdən artıq bu quruma ehtiyac yoxdur. Çünki sözügedən format özünü doğrultmadı. Rusiya rəsmisi isə deyir gəlin köhnə formatı yenidən bərpa edək. O baxımdan, bu cür yanaşmanı ekspertlər necə şərh edir? Nə baş verir?
“Ortada 10 noyabr razılaşması var və orada bütün detallar öz əksini tapıb”
Məsələyə münasibət bildirən “Səs” Media Qrupunun rəhbəri, politoloq Bəhruz Quliyevin fikrincə, Minsk Qrupunun əvvəlki formatının bərpasından söhbət gedə bilməz: “Çünki Minsk Qrupunun fəaliyyəti başa çatıb. Bunu Prezident İlham Əliyev də dəfələrlə öz çıxışlarında qeyd edib. Yəni MQ öz missiyasını başa vurdu. Bunun başlıca səbəbi onunla bağlıdır ki, ATƏT-in Minsk Qrupu fəaliyyətdə olduğu 30 ilə yaxın müddətdə özünü doğrultmadı. Çünki bu müddət ərzində faktiki olaraq birtərəfli mövqe tutdu, işğalçı ilə işğala məruz qalan tərəfə fərq qoymadı. Nəticədə uzun illər problem həll olunmamış qaldı. O vaxta qədər ki, Azərbaycan Ordusu əraziləri işğaldan azad etdi. Hətta 44 günlük müharibə dönəmində də həmsədrlər Ermənistanı bu və ya digər formada himayə etdilər. Hər vasitə ilə ərazilərin işğaldan azad olunmasına mane olmağa cəhd etdilər. Düzdür, Rusiya böyük dövlətdir, bizimlə qonşu və strateji tərəfdaşdır. Müəyyən məsələlərdə bizim mövqelərimiz üst-üstə düşür, amma elə məsələlər var ki, orada üst-üstə düşmür. Bu baxımdan bu o demək deyil ki, Minsk Qrupunun əvvəlki formatda fəaliyyətinə biz razı olmalıyıq. Zaxarova anlamalıdır ki, əvvəlki format özünü doğrultmayıb. Ortada 10 noyabr razılaşması var və orada bütün detallar öz əksini tapıb. Sadəcə olaraq, biz o detalların zaman-zaman həyata keçirilməsi üzərində işləyirik. Ona görə də yenidən ATƏT-in Minsk Qrupunun gündəmə gətirilməsi absurd məsələdir”.
Politoloq onu da qeyd etdi ki, yeni reallıqlar şəraitində Minsk Qrupuna yer yoxdur.
Vidadi ORDAHALLI
