Qondarma rejimin qalıqlarının "müstəqillik günü"nü qeyd etmək üçün Ermənistan hökumətinin heç bir üzvü Qarabağa getməyib. Baş nazir Nikol Paşinyanın Qarabağa niyə getmədiyini soruşduqda, hökumət aparatının mətbuat xidməti qısaca cavab verib: baş nazir 31 avqustdan bəri üç günlük məzuniyyətdədir. Hökumət iclasından sonra yüksək texnologiyalar və sənaye naziri Vahaqn Xaçatryan Paşinyanın Qarabağa getməmək qərarının siyasi olduğunu bildirib. Qeyd edək ki, 44 günlük müharibədə məğlubiyyətdən sonra Paşinyan Qarabağda olmayıb.
"Siyasi bir qərar verilib, başqa bir şey axtarmayın", - Xaçatryan qeyd edib. Hökumət üzvü bu siyasi qərarın səbəbinin nə olduğunu izah etməyib.
"Şərəf duyuram" fraksiyasının üzvü Tiqran Abramyanın fikrincə, Qarabağda Ermənistanın yüksək vəzifəli rəsmilərinin olmaması hakimiyyətin Azərbaycanın diqtə etdiyi oyun qaydalarını qəbul etməsi deməkdir.
Ermənistan hökümət nümayəndələrinin saxta tədbirdə iştirak etməməsi onların Azərbaycandan çəkinməsindən irəli gəlir, yoxsa taktiki gedişdir?
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, bununla bağlı bir çox versiyalar irəli sürmək olar: “Azərbaycan çox diqqətlə həmin prosesi izləyirdi. Hətta xəbərdarlıqlarını da etmişdi. Son ana qədər onların mövqeyi bəlli deyildi. Hətta bildirilirdi ki, həmin tədbirdə Paşinyan da iştirak edə bilər. Ancaq biz gördük ki, həmin ərəfədə Paşinyan məzuniyyətə çıxdı. Bununla yanaşı, heç bir Ermənistan rəsmisi də həmin tədbirdə iştirak etmədi. Bəlkə də bu, 30 ildə onların qəbul etdiyi “ən ağıllı” qərar idi. Biz tam deyə bilmərik ki, bizdən çəkindikləri üçün belə addım atdılar. Burada Rusiyanın da hansısa oyunları ola bilər. Hər halda, bunu Azərbaycanın mövqeyinin qəbul edilməsi kimi başa düşməliyik. Bilirsiniz ki, Ermənistan belə həssas məsələlərdə Rusiya ilə məsləhətləşmədən tək qərar vermir. Moskva başa düşüb ki, bu cür oyunbazlıqlarla nəyəsə nail olmaq mümkün deyil. Əksinə, onların özləri hörmətdən düşür. Ona görə də Ermənistana belə davranmaqla bağlı tapşırıq verib. Çünki hansısa Ermənistan rəsmisinin həmin tədbirdə iştirakına görə ən böyük məsuliyyət Rusiya sülhməramlılarının üzərinə düşürdü. Bu səbəbdən də Rusiya gələcək tənələrdən yayınmaq üçün Azərbaycanın mövqeyilə razılaşmalı oldu. Bu ərəfədə Ermənistanın xarici işlər naziri Moskvada səfərdə oldu. Ola bilər ki, ona bu barədə konkret tapşırıqlar verildi. Başqa xətlərlə də Ermənistana Moskva tərəfdən analoji məzmunda xəbərdarlıqlar edilə bilərdi. Biz qətiyyən arxayınlaşmamalıyıq. Azərbaycan və Türkiyə prosesləri diqqətlə izləməlidir. Düzdür, həmin tədbirdə Ermənistan parlamentinin nümayəndələri də iştirak etməməliydi. Görünür, Rusiya tədbirin effektini yavaş-yavaş azaltmaq qərarına gəlib ki, ermənilər də çox narazı qalmasın. Ermənistanı təmsil edən deputatlar Xankəndidə özlərinə layiq olan münasibəti gördülər. Sərgərdan vəziyyətə salınan yerli əhali onları daşqalaqla qarşıladı. Bütün bunlardan nəticə çıxarmalıdırlar. Bilməlidirlər ki, onların yeganə yolu Qarabağdan əl çəkməkdən keçir”.
Ortada olan fakt budur ki, hər il təmtəraqlı mərasimlər, rəsmi nümayəndələrin səfərləri, çıxışları ilə keçən qondarma "artsax"ın "müstəqillik" günü bu il sadəcə bəyanatlarla qeyd olundu. Ermənistan rəhbərliyi və siyasətçilər bu il eyni addımı atmağa cürət etmədilər. Gücləri yalnız quru bəyanatlara çatdı. Səbəb isə aydındır. Məsələ ondadır ki, artıq həm İrəvan, həm də erməni xalqı Qarabağ adlı münaqişənin olmadığını, "status"un Azərbaycan Prezidentinin dediyi kimi gorbagor olduğunu gözəl anlayır. Sadəcə, erməni xisləti bunu həzm etməyə imkan vermir. Xankəndiyə gələ bilməsələr də, məkr dolu bəyanatlar verərək, erməni xalqını yeni fəlakətlərə sürükləməkdən əl çəkməlidirlər.
Məhəmmədəli QƏRİBLİ
