Qarabağdakı separatçı tör-töküntüsü qondarma “Artsax”ın 30 illiyini qeyd edib. Əslində isə, matəm keçiriblər və dəmir yumruq altında əzilib məhv olanların məzarlarını gəzib-dolaşıblar, ağlaşma-şüvən qoparıblar. Separatçıların “yubiley” mərasimində bir sıra insidentlər baş verib.
Ermənistan hakimiyyətinə qarşı ittihamedici fikirlər səsləndirilib. Separatçıların tör-töküntüləri matəmə çevrilən tədbirlərində Ermənistanın baş naziri Nikol Pasinyana və onun arvadı Anna Akopyana qarşı ittihamlar səsləndirib, onları “meydanda tək” qoymaqda günahlandırıblar. Bildiriblər ki, Nikol və Anna Azərbaycandan qorxub “Artsax”a gəlməyiblər, onları burada tək qoyublar, “dərdinə şərik” olmayıblar. Ermənilər həmçinin deyiblər ki, onların uşaqlarının müharibədə ölməsində təqsirkar Paşinyan hökümətidir.
“Nə Paşinyan, nə də onun arvadı cəsarət edib bu əraziyə gələ bilməz, istənilən yanlış addımları onlara baha başa gələ bilərdi”
Azərbaycan Milli Elmlər Akademiyasının (AMEA) Sosiologiya və Fəlsəfə İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli “Bakı Xəbər”ə bildirdi ki, sentyabrın 2-də Xankəndidə baş verənlər burada “Artsax” adlı hansısa bir qondarma qurumun, rejimin bir neçə tör-töküntüsündən başqa kimsənin olmadığını göstərdi: “Əslində, “30 illik” onların elə qəbiristanlıq ziyarəti oldu və məzarlığa gömülmələrinin nişanəsi kimi yadda qaldı. Bundan başqa nə isə ola bilməzdi. Nə Paşinyan, nə onun arvadı, nə də digərləri artıq məhv olmuş qondarma rejimin tör-töküntülərinə heç bir kömək edə bilməz. Sadəcə, burada bir azca Rusiya faktoru var. Deyək ki, Rusiya öz maraqları naminə bu tör-töküntülərə müəyyən dəstək verir. Paşinyan isə “xala xətrin qalmasın” deyə bəzi açıqlamalar versə də, əslində orada razılaşıb. Paşinyanın rəhbərlik etdiyi Ermənistan hakimiyyəti qondarma rejimin məhv edilməsi, torpağa gömülməsi ilə artıq çoxdan razılaşıb. Amma təbii ki, bunu açıq şəkildə etiraf edə bilmir, dolayısı yollarla bəyan edir. Onun bunu açıq deməməsi bir siyasətdir. Ancaq bütövlükdə Paşinyanın etdiyi bütün hərəkətlər, hökümətinin atdığı bütün addımlar onu göstərir ki, onlar qondarma rejimin məzarlığa gömülməsi ilə barışıb, razılaşıb. Ermənistan əhalisi də birdəfəlik rejimin tör-töküntülərinin dirçəlməsindən əllərini üzüb və Ermənistanın bir dövlət kimi qorunub saxlanmasının hayına qalıblar, qoruya bilsələr, bunu özləri üçün böyük bir şey sayarlar. Onları keçmiş rejimin tör-töküntüləri maraqlandırmır, hələ onlara nifrət də bəsləyirlər ki, övladları onlara görə ölüb”.
F.Ələkbərli qeyd etdi ki, hazırda Ermənistanın özü çıxılmaz vəziyyətdədir, günü-gündən əhalisi ölkəni tərk edir, bu halda Qarabağ yaddan çıxıb. “Ermənistan höküməti qondarma rejimin məhv edildiyi reallığını qəbul edib. Bu baxımdan, nə Paşinyan, nə də onun arvadı cəsarət edib bu əraziyə gələ bilməz, istənilən yanlış addımları onlara baha başa gələ bilərdi. Bunu Paşinyan çox yaxşı anlayır. Separatçı tör-töküntülərinin Paşinyanı və onun arvadını ittiham etməsi başadüşüləndir. Əslində, beş-üç separatçının başında duran quldurlar da vəziyyətləri ilə barışıblar. Bu mənada, onlar hər şeyi Paşinyanın üzərinə yıxmaq istəyirlər. Bir sözlə, qarşılıqlı ittihamlar var və bu da onu göstərir ki, qondarma rejim dəfn olunub, Paşinyanın “diriltmə” cəhdləri isə Ermənistanın özünə böyük problem yarada bilər. Onlar hər hansı bir cəhd göstərsələr, rəsmi Bakı reaksiyasız qalmayacaq, ordumuz anti-terror əməliyyatına başlayacaq və bu dəfə Qarabağdakı tör-töküntüləri tamamilə təmizləməklə yanaşı, Ermənistanla sərhəddyanı məsələləri birdəfəlik həll edəcək, hətta bu əməliyyat Ermənistan sərhədlərini də aşa bilər”-deyə F.Ələkbərli vurğuladı.
İradə SARIYEVA
