“Moskva Dağlıq Qarabağ münaqişəsinin nizamlanmasında yeni reallıqların adekvat nəzərə alınması ilə ATƏT-in Minsk Qrupu formatını dəstəkləyir”. Bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
M.Zaxarovanın sözlərinə görə, Moskva Qarabağ nizamlanması üzrə işin aktivləşməsinin tərəfdarıdır: “Yeni regional reallıqların adekvat nəzərə alınmasını nəzərə alaraq, üçlüyün (həmsədrlərin) İrəvanla Bakı arasında etimadın möhkəmlənməsinə, eləcə də humanitar məsələlərin həllinə kömək edə biləcəyinə inanırıq. Bu, siyasi problemlərin müzakirəsinə keçid rolunu oynayacaq. Hazırda ATƏT-in Minsk Qrupunun yeni rusiyalı həmsədri İqor Xovayev regiona səfər edir. O, artıq Azərbaycan rəhbərliyi ilə danışıqlar aparıb, İrəvanda da oxşar təmaslar var”.
Görünən odur ki, Rusiya Minsk Qrupunu dəstəklədiyini rəsmi şəkildə bəyan etdi. Maraqlıdır, M.Zaxarovanın “Moskva yeni reallıqların adekvat nəzərə alınması ilə ATƏT-in Minsk Qrupu formatını dəstəkləyir” ifadəsi deməkdir? O bununla nə demək istəyir?
“Ancaq bu o demək deyil ki, Minsk Qrupunun fəaliyyəti məzmun baxımından dəyişəcək”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev bununla bağlı bir sıra məqamlara toxundu: “ATƏT-in Minsk Qrupu istər Ermənistanın ərazilərimizi işğal etdiyi dövrdə, istərsə də işğaldan sonrakı dövrdə münaqişənin həlli ilə bağlı heç bir əməli addımı ilə yadda qalmayıb. Xalqımız üçün yadda qalan hərdənbir bu üçlüyün bölgəyə turist səfərlərini xatırladan qıcıq yaradan görüşləri olub. Azərbaycan xalqının bu üçlüyə heç bir inamı-etimadı qalmayıb. Hətta biz dəfələrlə görmüşük ki, xristian təəssübkeşliyi edərək, bu üç həmsədr ölkə işğal olunmuş ərazilərimizdə xalqımıza aid olan dini abidələrimizin dağıdılıb talan edilməsinə səssiz qaldı. Ən azından, bu ölkələr beynəlxalq konvensiyalarda əksini tapmış qanunlara hörmətlə yanaşmalı idilər. Abidələrin dağıdılması beynəlxalq cinayət sayılır. Biz əvəzində nə gördük? Bu üç həmsədr dövlətin diplomatları işğalçı ilə işğala məruz qalan tərəfə ikili standartlarla yanaşma sərgiləməkdə davam etdilər. Bu format az qala 30 illik "fəaliyyəti" dövründə hansı müsbət addımı ilə yadda qalıb ki, indi biz bunların hər hansı bir "formatını" qəbul edək? Ən doğru formatı Azərbaycan dövləti xalqımızla birlikdə özü yaradıb. Bu formatın uğurunu Azərbaycan Ordusu təmin edib. Hər bir dövlət öz ərazi bütövlüyünü təmin etmək üçün hərbi gücündən yararlanmaq hüququna malikdir. Azərbaycan xalqı bu hüquqdan istifadə edərək öz ərazi bütövlüyünü təmin edib. İndi bizim missiyamız azad olunmuş ərazilərimizdə quruculuq işlərini möhkəmləndirmək olmalıdır ki, məcburi köçkünlərimiz öz doğma yurdlarına qayıtsınlar. Azərbaycan dövləti heç bir dövlətin daxili işlərinə qarışmır. Hətta həmsədrlik edən dövlətlərin daxilində yüzlərlə belə problemlər mövcuddur. Dövlətimiz bütün hüquq və qaydaları əsas tutaraq, heç vaxt belə məsələlərin alovlanmasını istəmir. M.Zaxarova müharibədən sonra yaranan realıqları nəzərdə tutur. Çünki əvvəlki danışıqlardakı kimi 7 müzakirə obyekti olmayacaq. Artıq həmin rayonlar azad edilib. Ancaq bu o demək deyil ki, Minsk Qrupunun fəaliyyəti məzmun baxımından dəyişəcək. Əsla belə bir şeyin baş verəcəyini düşünmürəm. Forma baxımından nəsə dəyişəcək. Lakin həmsədrlər yenə Ermənistanın tərəfini tutacaq”.
O üzdən sədr müavini hesab edir ki, Azərbaycan MQ-nin fəaliyyətinə razı olmamalıdır.
Vidadi ORDAHALLI
