Azərbaycanda vətənpərvərliklə bağlı yeni qanun layihəsi hazırlanır. Bu barədə media nümayəndələrinə Milli Məclisin Elm və təhsil komitəsinin sədri Bəxtiyar Əliyev məlumat verib.
O bildirib ki, yeni sənədin adı “Vətənpərvərlik haqqında” qanun layihəsidir: “Hazırda yeni sənədin hazırlanması istiqamətində İşçi qrup yaradılıb və işlər davam etdirilir. Yeni qanun layihəsi hazırlandıqdan sonra payız sessiyasında müzakirəyə çıxarıla bilər. Hesab edirəm ki, bu çox vacib bir sənəddir”.
Qeyd edək ki, vətənpərvərlik insanın daxilində, canında olmalıdır. Insanın özündə vətən sevgisi olmalıdır. Vətənpərvər olmaq hər kəsin mənəvi borcu, milli təəssübkeşlik, xislət və əxlaq göstəricisidir. Bu haqda qanunun olması nə dərəcədə düzgündür? Qanun layihəsi ilə insanlarda vətən sevgisini formalaşdırmaq olarmı?
Hazırlanacaq qanun layihəsi barədə həmsöhbətlərimizin fikri fərqli oldu.
Vüqar Rəhimzadə: “Belə bir qanun layihəsinin hazırlanmasında məqsəd gənc nəslin formalaşmasıdır”
“Yeni Azərbaycan Partiyası Siyasi Şurasının üzvü, “İki sahil” qəzetinin baş redaktoru Vüqar Rəhimzadə bildirdi ki, vətənpərvərliklə bağlı dövlət səviyyəsində kifayət qədər tədbirlər keçirilib, böyük layihələr baş tutub. Vətənə, millətə bağlılığın nümunəsi kimi bu istiqamətdə görülən işlər kifayət qədər böyükdür: “Danılmaz faktdır ki, Azərbaycanın milli qəhrəmanları, şəhidləri ilə bağlı məqalələr yazılır, filmlər çəkilir. Onu da qeyd edim ki, Dövlət Bayrağı Meydanının yaradılmasının vətənpərvərliyin yüksək səviyyədə aşılanmasına xüsusi rolu var. Bayrağı görən şəxslər qürur hissi keçirir, onun daim zirvələrdə dalğalanmasını arzu edir”.
V.Rəhimzadə hesab edir ki, belə bir qanun layihəsi gənc nəslin formalaşmasında mühum rol oynayacaq: “Uşaq bağçaları, orta məktəblərdən tutmuş bütün tədris müəssisələrindən bu qanunun aliliyi hər bir vətəndaş üçün önəmli olmalıdır. Vətənpərvərliklə bağlı yeni qanun layihəsi hazırlanarkən vətən sevgisinin gənc nəslə aşılanması ilə bağlı sistem formalaşacaq və hüquqi bazanın olması çox önəmli olardı”.
Azər Həsrət: “Sevgi, vətənpərvərlik qanunla yaranmır, insanların vətəni sevməsini qanunla həll etmək, buna məcbur etmək düzgün deyil”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, sevgi, vətənpərvərlik qanunla yaranmır: “İnsanların vətəni sevməsini qanunla həll etmək, buna məcbur etmək düzgün deyil. Vətən sevgisi insanın qanında, canında olur. Elə bir qanun qəbul edilməlidir ki, insanlar vətənə xor baxa bilməsin”.
Həmsöhbətimizin sözlərinə görə, insanlara zorla nəyisə sevdirmək mümkün deyil. Vətəni sevmək gendən və qandan gəlir: “Həmçinin, ailə və cəmiyyətdəki təlim-tərbiyə vətənpərliyi formalaşdırır”.
Ekspert hesab edir ki, vətənpərvərliyin təbliği ilə bağlı qanun layihəsi hazırlana bilər: “Məsələn, məktəblərdə vətənpərvərliyin təbliği ilə bağlı hansısa işlərin görülməsi barədə müəyyən layihələr hazırlana bilər”.
Günel CƏLİLOVA
