Azərbaycan Respublikasının hələlik Rusiyanın rəsmən sülhməramlı sayılan hərbi kontingentinin nəzarətindəki hissəsində qalan erməni separatçılar qondarma rejimin 30 illiyini qeyd ediblər. Separatçılar Ermənistandan 20-yə yaxın deputatın Qarabağa daxil olması barədə məlumatlar yayıblar. Xankəndidə separatçı rejimin həmin ərazilərə müvəqqəti yerləşdirilən Rusiya sülhməramlılarının gözü önündə belə tədbir keçirməsi birmənalı şəkildə Azərbaycanın maraqlarına ziddir.
Ermənistandan Qarabağ ərazisinə, separatçı rejimin tədbirlərinə nümayəndələr gələrsə, həmin tədbirin keçirilməsini əngəlləmək sülhməramlıların vəzifə öhdəliyidir. Buna mane olunmursa, deməli, həmin tədbirə məhz Rusiyanın icazə verdiyi qənaəti yaranır. Xüsusilə də bu tədbirin öncəsi Ermənistan xarici işlər naziri Ararat Mirzoyanın rusiyalı həmkarı Sergey Lavrovla görüşüb geri qayıtması bu şübhələri daha da artırır. Bütün bunlara rəğmən, ortada fakt var ki, ermənilər Xankəndidə qanunsuz tədbir keçirir və Rusiya sülhməramlıları da buna şərait yaradır. Bu halı necə qiymətləndirmək olar?
Azərbaycan Naminə Alyans Partiyasının sədri Abutalıb Samədov “Bakı-Xəbər”ə açıqlamasında bildirdi ki, oyuncaq qurumun yaradılmasının 30 illik tədbiri barədə son qənaəti yalnız tədbir baş tutduqdan sonra demək olar: “Ola bilər ki, əvvəlcədən deyəcəklərimiz yanlış da ola bilər. Tədbirin baş tutma ehtimalı var. Şübhəsiz ki, Rusiya sülhməramlıları həmin saxta tədbirin qarşısını ala bilərdilər. Bunun üçün Rusiya rəhbərliyindən müvafiq göstəriş gəlməliydi. Görünür ki, həmin göstəriş gəlməyib. Tədbirin keçirilməsinin qarşısının alınmamsı gələcəkdə danışıqlar zamanı Rusiyanın istifadə edə biləcəyi məsələlərdən biridir. Yəni Azərbaycan Qarabağa heç bir satus verilməyəcəyini bəyan edib və bu bəyanatı dünyanın əksər güc mərkəzləri qəbul etməyib. Ancaq nəzərə alaq ki, bizim Prezident diplomatiya sahəsində çox təcrubəlidir. Noyabrın 10-da Rusiya prezidenti ilə danışıqlarda “Status cəhənnəmə getdi” bəyanatını vermək yalnız ilkin razılaşmanın əldə olunduğu təqdirdə ola bilərdi. Əks halda Prezident belə bir fikri işlətməzdi. Mən inanmaq istəyirəm ki, Rusiyanın bu davranışı gələcəkdə ermənilərə obyektiv görünmə interpretasiyası mahiyyətini daşıya bilər. Bununla ermənilərin rəğbətini qazanıb, son nəticədə Azərbaycanın mövqeyini müdafiə etməyi nəzərdə tutur. Buna ümid edək. Ermənistan rəhbərləri həmin tədbirdə iştirak etməyəcək. Bu da Rusiyanın onlara etdiyi xəbərdarlıqla bağlıdır. Biz Rusiya sülhməramlılarından nə qədər narazı olsaq da, bu məsələdə tələsməməliyik. Son nəticəni gözləməliyik. Yəqin ki, bu çox uzun çəkməz. Çünki uzun çəkəcəyi təqdirdə, Qərbin fəallaşma ehtimalı həddən artıq yüksəkdir. Bu da nə Azərbaycanın, nə də Rusiyanın maraqlarına cavab verir. Güman edirəm ki, Rusiya gələcək danışıqlarda Azərbaycanın mövqeyini açıq şəkildə müdafiə edəcək. Açıq şəkildə deməliyik ki, əks halda Rusiya digər Qərb ölkələri kimi bu münaqişənin həllində Azərbaycana qarşı mövqe tutmuş olacaq. Bununla da beynəlxalq hüquq və ədalətin pozulmasında onlarla birlikdə aparıcı rol oynayacaq”.
Məhəmmədəli QƏRİBLİ
