Son vaxtlar erməni mediasında Türkiyə-Ermənistan münasibətlərinin bərpası perspektivləri tez-tez müzakirə olunur. Bununla yanaşı, Rusiya mətbuatı da sözügedən məsələləri diqqət mərkəzində saxlayır.
Bu arada “Gazeta.ru” nəşrində dərc olunan “Ermənistan Türkiyə vasitəsilə Rusiyanın təsir dairəsindən çıxaraq Avropaya gedir” başlıqlı yazı dərc olunub. Yazıda qeyd edilir ki, Rusiya Ermənistanın Türkiyə vasitəsilə Avropaya gedəcəyindən ehtiyatlanır. Qeyd edilir ki, belə bir narahatlıq üçün əsas var. Bunu onunla əsaslandırırlar ki, Paşinyan hökumətin iclasında Türkiyə ilə münasibətləri qeyd-şərtsiz nizamlamaq istəyini dilə gətirib. Onun sələfləri də belə deyirdilər, amma bu il vəziyyət tamamilə fərqlidir: “Dağlıq Qarabağla qonşu əraziləri işğal etdiyinə görə 1993-cü ildə Türkiyə Ermənistanla sərhədini bağlayıb və onunla münasibətləri kəsib. 2020-ci ilin noyabrında isə Ermənistan ordusunu oradan çıxarmaq məcburiyyətində qalıb, həm də atəşkəs sazişinin altında prezident Ərdoğanın imzası olmasa da, o, imzalanma prosesində görünmədən iştirak edib. Türkiyə Ermənistanla sərhədlərin açılmasının tərəfdarıdır”.
Daha sonra qeyd edilir ki, Türkiyə təhdidini aradan qaldıran Paşinyan onun əvəzində Rusiyanın təhdidini qazanacaq. Rusiyalı türkoloq Viktor Nadein-Rayevski deyir ki, Ermənistan Türkiyə ilə sərhədi açsa iqtisadi gəlirlərini artıra bilər, amma ərazilərini itirəcək.
Ermənistana ərazi şantajı rusların və onları təkrar edən erməni ekspertlərin bir çox bəyanatlarında əksini tapır. Onlar deyirlər ki, 2025-ci ildə Rusiya sülhməramlılarını Qarabağdan çıxarsa, ermənilər də onların ardınca gedəcək. Ancaq bütün bunlara baxmayaraq, get-gedə erməni mediasında Türkiyə vasitəsilə Ermənistanın Avropa ilə yaxınlaşması və bu minvalla Rusiyanın təsirindən çıxmaq fikirləri də səslənməkdədir.
“Ancaq deməzdim ki, onlar bunu məhz Türkiyə vasitəsilə həyata keçirmək istəyir”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Ermənistanda Türkiyə vasitəsilə Rusiyadan xilas olmağı düşünənlər var: “Ancaq onların sayı çox azdır. Ölkədə revanşist əhval-ruhiyyə davam edir. Az bir qisim adam var ki, onlar nisbətən fərqli düşünməyə başlayıblar. Ona görə də Ərdoğanın təklifi ilə bağlı müəyyən müzakirələr başlayıb. Ancaq orada geniş kütlə bu ideyanı dəstəkləmir. Geniş kütlənin beyni zəhərlənib. Bəli, ermənilər Qərbə inteqrasiya olmağı istəyir, ölkənin inkişafını Avropa ilə yaxınlaşmaqda görürlər. Ancaq deməzdim ki, onlar bunu məhz Türkiyə vasitəsilə həyata keçirmək istəyir. Düzdür, Ermənistanın açıq dənizlərə çıxışı olmadığına görə müəyyən mənada buna məhkumdular. Lakin məsələ ondadır ki, onlar məhz Gürcüstan vasitəsilə Qərblə yaxınlaşmağı üstün tuturlar. O da məlumdur ki, fərqli düşünənlər Ermənistanın Rusiya ilə yaxınlaşmasını perspektivli saymır. Fikirləşirlər ki, bu cür davam edəcəksə, o zaman ölkənin gələcəyi olmayacaq. Bir növ bunun nəticəsi idi ki, 20 iyun seçkilərində əhali revanşistlərə yox, məğlub Paşinyana səs verdi. Bu səbəbdən ölkədə vəziyyət qarışıqdır”.
Partiya sədri hesab edir ki, Ermənistanda Türkiyə ilə bağlı düşüncələrin dəyişməsinə zaman lazımdır.
Vidadi ORDAHALLI
