Rəşad Bayramov: “Rəsmi dairələr açıq deyə bilmədiklərini Jirinovskiyə dedirdirlər”
Rusiya Liberal Demokrat Partiyasının sədri Vladimir Jirinovski hesab edir ki, Rusiya Qazaxıstanı işğal etməlidir, çünki orada rusofob əhval-ruhiyyə hökm sürür. Jirinovski bunu "Exo Moskvı" radiosuna müsahibəsində deyib:
"Qazaxıstanın bütün dərsliklərində antirus əhval-ruhiyyəsi var. Rusiya Qazaxıstanı işğal etməyib, əksinə köməyə gəldi, yoxsa cunqarlar qazaxları öldürürdü. Rus ordusu da cunqarları qovdu və indi onlar Çində oturublar. Qazax ulusu rus çarına müraciət edərək ona yalvardı, ayaqlarına düşdü. Çar da ordu göndərib Şimali Qazaxıstanı azad etdi".
Onun sözlərinə görə, Qazaxıstanda şəhərlərin əksəriyyətinin adları rus dilindədir: Semireçye, Ust-Kameneqorsk, Artyomvsk, Semipalatinsk...
Jirinovskinin bu fikirləri Qazaxıstanda birmənalı qarşılanmayıb. Qazaxıstanın bir neçə təşkilatı Vladimir Jirinovskini ölümlə hədələyib. Rusiya mediasının yazdığına görə, Qazaxıstan Əfqanıstan Veteranları Birliyinin sədri və “El Tireyi”(”El dirəyi”) partiyasının sədr müavini Murad Muhammedjanov və həmin partiyanın lideri Nurcan Altayev bu haqda geniş video-mesaj yayıb.
Mesajda deyilir ki, bəzi Rusiya siyasətçiləri çoxdan Qazaxıstanı işğal etmək və bu ölkə ərazilərini qopararaq Rusiyaya birləşdirmək kimi çirkin niyyətlər yetişdirirlər.
Video-mesajda, guya bu ölkədə rusların hüquqlarının pozulmağa başlanması haqda Qazaxıstan prezidentinə şikayət edən "Rus zabitləri" təşkilatına qarşı da təhdidlər səsləndirilib. Jirinovski bildirib ki, Qazaxıstana qarşı olan iddianı hələlik saxlamaq lazımdır: "Hələ gözləyək. Gəlin, Ukraynanı məğlub edək. Qazaxıstan Gömrük İttifaqının üzvüdür".
Qeyd edək ki, Jirinovski dəfələrlə Azərbaycanı və bizim xalqı təhqir edib. Ona adekvat cavablar veriləndə isə, təəssüf ki, Rusiya hökuməti Jirinovskinin deyil, ona cavab verənlərin cəzalandırılmasını tələb edir. Axı, niyə Rusiya onunla yaxın münasibəti olan ölkələri Moskva ilə düşmən edən təlxək-siyasətçiyə öz yerini göstərmir?
Politoloq Rəşad Bayramov “Bakı-Xəbər”ə bildirdi ki, Jirinovski postsovet ölkələrinin əksəriyyətilə bağlı analoji fikirlər səsləndirir: “Məsələn, deyib ki, tək Azərbaycan yox, digər postsovet ölkələrinin də müstəqilliyi Rusiyanın əlindədir. Rusiya bu haqqı istəsə verər, istəsə verməz. Maraqlıdır ki, Rusiya Daxili İşlər Nazirliyi Jirinoskiyə cavab verənləri cəzalandırır. Bugünlərdə biz İsfəndiyar Vahabzadə ilə bağlı analoji hadisənin şahidi olduq. Ona Rusiyaya 50 il müddətinə daxil olmaq qadağan edildi. Məsələ burasındadır ki, hansısa Qazaxstan və ya Azərbaycan vətəndaşına belə bir qadağa qoyulması həm gülməli, həm də ağlamalıdır. Çünki Rusiya kimi böyük, hegemon bir dövlət gör nə günə qalıb ki, ayrı-ayrı fərdlərə belə bir qadağa qoyur. Rusiya bir dövlət kimi özünə hörmət qoyursa, nədən Jirinovskini cəzalandırmır? Adam sağa-sola, hər kəsə ancaq təhqir yağdırır, nifrin tökür. Təbii ki, bunun da cavabı olmalıdır. Aydındır ki, bu cür adamları elə Rusiyanın hakim dairələri dəstəkləyir. Onun dedikləri bir növ Kremlin, rəsmi Moskvanın istəkləri kimi şərh edilir. Yəni rəsmi dairələr açıq deyə bilmədiklərini Jirinovskiyə dedirdirlər. Görürsünüz ki, artıq Qazaxıstandan verilən reaksiya buradankından da sərtdir. Jirinovski ölümlə hədələnir. Hər halda, Rusiya dövləti Jirinovskinin ipini çəkib ayağına bağlamalıdır. Çünki onun təhqirlərini kimsə həzm etmək fikirində deyil. Hesab edirəm ki, Jirinovskinin dilindən təhqir edilən ölkələr onunla bağlı sərt davranmalıdır. Ən azından, Jirinovskinin həmin ölkələrə girişinə qadağa qoyulmalıdır. Onun adı “qara siyahıya” salınmalıdır. Jirinovskiyə qarşı məhkəmə iddiaları qaldırılmalıdır. Yəqin ki, Rusiya hakimiyyətinə onun danışdıqları və ritorikası sərf edir deyə, partiya sədrilə bağlı ciddi addım atılmır”.
Məhəmmədəli QƏRİBLİ
