Ermənistanda pasport böhranı yaşandığı barədə məlumat yayılıb. “Armenpress”in yaydığı məlumata görə, pasport almaq üçün müraciət edənlərə bildirilir ki, ölkədə pasport yoxdur. Ona görə də 1 ay gözləməlidirlər.
Vətəndaşların çoxsaylı müraciətləri əsasında “Armenpress” polislə əlaqə saxlayıb. Polisdən bildirilib ki, koronavirus infeksiyası üzündən pasport tədarükündə problem yaranıb. Amma polis məsələnin təfərrüatlarına varmayıb. Ermənistanın mövcud qanunvericiliyinə görə, pasport 15 gün müddətində, yaxud əlavə rüsum müqabilində daha tez verilməlidir.
“Ermənistanda əhali nəinki pasport böhranı ilə üzləşib, ondan da betər problemlərin məngənəsində sıxılırlar”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, Ermənistanda tək pasport böhranının baş verməsi gözlənilən deyildi, çünki bu ölkədə bütün sahələrdə dərin böhran var. Birinci Qarabağ müharibəsində də bu ölkədə ağır böhran yaşanıb, amma sonradan xaricdəki erməni lobbisinin maliyyə dəstəyi, bəzi xarici ölkələrin verdiyi ianələrlə, Azərbaycan ərazilərindən yağmaladıqları maddi-mədəni irs nümunələrini xarici muzeylərə satmaqla əldə etdikləri vəsaitlə bir azca özlərini dirçəldə bilmişdilər. “Ermənistanda evini bir təyyarə biletinə satıb ölkədən gedənlər də çox olub, bu proses indi də davam edir. “Demokratik inqilab”a, “məxməri inqilab”a baxmayaraq, Ermənistan iqtisadiyyatı həmişə iflic vəziyyətdə, ağır böhran içində olub. Sovet dövründə orada istehsal edilən qızıl məmulatları, konyak və digər içkilər məcburən o biri respublikalara satılırdı, həm bunun, həm də büdcədən ayrılan dotasiyanın hesabına Ermənistan yaşayırdı. Ermənistanda həmişə iqtisadi böhran olub, Sovet dövründə bu birtəhər ört-basdır edilirdi, indi isə mümkün deyil”.
Bu gün Rusiyanın və Qərb dövlətlərinin Ermənistana ianə etməməsi ucbatından bu ölkədə ən adi məsələlər böhran həddinə gəlib çatıb. Q.Hacıyev hesab edir ki, Ermənistanın saxtakarlığı ona dilənçi payı verən ölkələri də cana doydurub. Q.Hacıyev deyir ki, Rusiya maddi cəhətdən deyil, silahlandırma məsələsində Ermənistana dəstək olur və onu müharibəyə həvəsləndirir. “Ermənistan Rusiyadan silah alıb yeni müharibə havası ilə danışır, amma əhalisinə pasport verə bilmir. Revanşist qüvvələri müharibə çağırışı edən bir ölkənin öz əhalisinə adicə pasport verməyə iqtisadi gücü yetmir. Halbuki, bütün dövlətlər öz vətəndaşına pasport verə bilir, amma rəzil durumda olan Ermənistan verə bilmir. Ermənistanda əhali nəinki pasport böhranı ilə üzləşib, ondan da betər problemlərin məngənəsində sıxılırlar.
Ermənistanın iqtisadi cəhətdən inkişafına imkan yoxdur, çünki bu ölkənin bütün iqtisadi rıçaqları Rusiyanın əlindədir, zavodları, fabrikləri yoxdur, məhv olub. Rusiya da heç zaman Ermənistan iqtisadiyyatını inkişaf etdirməkdə maraqlı olmayıb”.
Q.Hacıyevin sözlərinə görə, Ermənistanda pasport böhranının yaranmasının bir səbəbi ağır iqtisadi durum olsa da, burada başqa məqamlar da diqqətdən yayınmır. Q.Hacıyev qeyd etdi ki, bu gün Ermənistanı tərk etməyə hazırlaşanlar arasında gənclər üstünlük təşkil edir, ola bilsin, pasport almaq yaşına çatan insanların ölkəni tərk etməməsi üçün bu variant işlədilir. Q.Hacıyev, bununla belə, apardığı tədiqiqatlar nəticəsində əmin olub ki, Ermənistan Azərbaycanla sülh müqaviləsi bağlamasa daha ağır və rəzil duruma düşəcək.
İradə SARIYEVA
