Ermənistanın yeni XİN rəhbəri Ararat Mirzoyan rusiyalı həmkarı Sergey Lavrovla Qarabağ ətrafındakı məsələləri müzakirə edib. Ararat Mirzoyan bildirib ki, Ermənistanla Azərbaycan arasında sülh razılaşması üzrə hər hansı danışıqlar aparılmır.
O, Sergey Lavrovla görüşdə deyib ki, bu danışıqlardan öncə mütləq “Dağlıq Qarabağ”ın statusu müəyyənləşdirilməlidir: "Ermənistanla Azərbaycan arasında ehtimal olunan sülh müqaviləsinə gəlincə, Azərbaycan hökumətinin yerinə olsaydım, 9 noyabr 2020 və 11 yanvar 2021 -ci il tarixli üçtərəfli bəyanatlar çərçivəsində artıq əldə edilmiş razılaşmaların icrasına diqqətimi cəmləşdirərdim. Bu mərhələdə sülh müqaviləsi ilə bağlı heç bir danışıqlar aparılmır. Əgər belə danışıqlar başlasa, mütləq Dağlıq Qarabağın statusu məsələsi olmalıdır".
Ermənistan XİN rəhbəri Azərbaycanı 10 noyabr bəyanatının tələblərinə əməl etməməkdə ittiham edib. O söyləyib ki, Ermənistan regionda sabitliyin qorunması istiqamətində aktiv dialoqa hazırdır, lakin Azərbaycanın destruktiv siyasətinə görə gərgin vəziyyət qalmaqdadır. Ararat Mirzoyanın sözlərinə görə, Azərbaycan Ermənistanın suveren ərazisinə birbaşa müdaxilə olan aktiv təxribatçı addımlar atır.
Göründüyü kimi, Ermənistan rəsmisi Azərbaycanı əldə olunan üçtərəfli razılaşmaya əməl etməməkdə təqsirləndirir. Buna növbəti erməni azğınlığı adını vermək olarmı?
Millət vəkili Arzu Nağıyev “Bakı-Xəbər”ə açıqlamasında bildirdi ki, Ermənistanın hazırki xarici işlər naziri keçmişdə onların parlamentinin spikeri olub: “Paşinyanın ən yaxın adamlarından sayılır. Qeyri-hökumət təşkilatları sektorundan həmin vəzifəyə gəlib. Ancaq boş-boş bəyanatları ilə yadda qalmış siyasətçidir. Moskvada verdiyi açıqlamanın ruhundan bu bir daha təsdiqləndi. Deyir ki, Azərbaycan üçtərəfli razılaşmaya əməl etmir və atəşkəsi pozur. Maraqlıdır, Ararat Mirzoyan niyə sərhədlərin demarkasiyası və delimitasiyasından danışmır? Sentyabr ayında onlar KTMT-yə rəhbərlik edəcəklər. Ona görə də ümumi sərhəddən danışır ki, Rusiyanı bu prosesə cəlb etsin. Buna görə də, iki ölkə arasındakı sərhəddə baş verən hadisələri təhrif edilmiş formada çatdırırlar. Onları qıcıqlandıran digər məqam Lavrovun verdiyi cavabdır. Lavrov dedi ki, 10 noyabr razılaşmasından sonra Azərbaycan ərazisini pozduqlarına görə saxlanılan ermənilər hərbi əsir deyil. Lavrovun həmin şəxsləri terrorist kimi qələmə verməsi Ermənisatnda ciddi rezonans yaradıb. Ermənistan mediası buna görə Rusiyanın ünvanına müxtəlif tənqid və təhdidlər yağdırır. Onlar bu rəyi yaratmağa çalışırlar ki, sülhməramlılar lazım olan funksiyanı yerinə yetirə bilmir deyə, ATƏT-in Minsk Qrupu mütləq danışıqlar prosesini bərpa etməlidir. Xüsusilə də Fransanı prosesə qatmaq istəyirlər. Digər istəkləri isə sərhədlərin dəqiqləşməsi ilə bağlı prosesi maksimum dərəcədə uzatmaqdır. Bununla onlar həm də Azərbaycanın ərazi bütövlüyü ilə bağlı prosesi yubatmağa çalışırlar. Sentyabır 2-də Xankəndidə növbəti qondarma “bayram” qeyd etməyə hazırlaşırlarsa, indi görün razılşamanın şərtlərini kim pozur. Bütün bunlar təxribat xarakterli fikirlərdi. Artıq Paşinyan məzuniyyətə çıxır, digərləri də gəlməyəcək. Bunlar keçmiş Dağlıq Qarabağda yaşayan ermənilərlə Ermənistandakı ermənilərin münasibətlərini daha da kəskinləşdirəcək. Üçtərəfli bəyanatda olan razılaşmaları isə bütün dünyanın gözü qarşısında məhz Ermənistan pozur”.
Məhəmmədəli QƏRİBLİ
