Rusdilli “Teleqram” kanallarında Rusiya Pravoslav Kilsəsinin Yekaterinburqdan olan baş rahibəsinin videoyazısı yayılıb. Rus kilsəsinin baş rahibəsi çıxışında Rusiyanın həyata keçirdiyi siyasətin mahiyyətini, iç üzünü açıb: “Rusiyanın əsas məramı torpaqları işğal, xalqları isə istila etməkdən ibarətdir. İnanclıların isə əsas işi o torpaqları xristian ruhunda müqəddəsləşdirəkdən ibarət olmalıdır”.
Rus kilsəsinin baş rahibəsi dünyaya ötürdüyü bu mesajla həm öz dövlətinin mahiyyətini açır, həm də dolayısı ilə Rusiyanı başqa ölkələri istila etməkdə suçlayır. Bütün hallarda, baş rahibənin dilindən səslənən bu etiraf 300 ildən çoxdur ki, rus imperiyasının həyata keçirdiyi istila siyasətini bir daha təsdiqləyir.
“Rus Pravoslav kilsəsinin baş rahibəsi Rusiyanın 300 ildən artıqdır yürütdüyü işğalçılıq siyasətini ifşa edib”
AVCİYA-nın vitse-prezidenti, tarix elmləri doktoru, professor, siyasi şərhçi Məhərrəm Zülfüqarlı bizimlə söhbətində bildirdi ki, Rusiya Pravoslav Kilsəsinin Yekaterinburqdan olan baş rahibəsinin bildirdiyi “Rusiyanın əsas məramı torpaqları işğal, xalqları isə istila etməkdən ibarətdir” fikri tamamilə həqiqəti əks etdirir: “Çünki belə demək mümkündürsə, Rusiyanın tarixi məhz işğallar tarixidir. Yəni biz Azərbaycan tarixinə nəzər salsaq görərik ki, IX əsrdən başlayaraq zaman-zaman Azərbaycana yelkənli gəmillərlə gəliblər və buranı istila etməyə çalışıblar. Bunlar güc görəndə tacirə “çevrilirdi”lər, zəiflik görəndə isə döyüşçüyə dönüb həmin ərazilərdə soyğunçuluq edirdilər, camaatdan zorla aldıqlarını gəmilərə yığıb aparırdılar. Bilirsiz ki, 944-cü ildə ruslar Bərdə yaxınlığına da gəlib çıxıblar, Mübarək kəndinə düşüblər və əhaliyə qarşı böyük cinayətlər, soyğunçuluqlar törədiblər. Burada ruslar arasında kütləvi yoluxma baş verdiyi üçün onların bir hissəsi qalıb, bir hissəsi isə gəmilərə oturaraq geri çəkilib. Amma Rusiyanın əsas dövlətçilik işğalı I Pyotrla başlayıb. I Pyotr XVIII əsrdən başlayaraq əraziləri genişləndirmək üçün imperiya siyasəti yeridib və onun vaxtında da Rusiya imperiya adlanıb. O zaman Rusiya həm də şimalda İsveçlə müharibə aparırdı. Belə bir söz var ki, Rusiya ilə İsveç arasında gedən müharibədə İsveç məğlub, Rusiya isə qalib oldu, amma İsveçin məğlubiyyəti İsveç xalqını xoşbəxt etdi. Yəni İsveç öz ərazisinə çəkildi, gözəl cəmiyyət qurdu və bu gün də nümunəvi ölkə kimi öz xalqının firavan yaşayışını təmin edir. Rusiya isə işğallarla nə öz xalqını, nə də işğal etdikləri ölkələrin əhalisini xoş günə çıxarıb. Mənə belə gəlir ki, Rusiyanın işğalçılıq, istila siyasətindən ən çox zərər çəkən rus xalqı özüdür. Çünki tarixə baxsaq, çar Rusiyası dövründə də, Sovet dönəmində də daim işğalçılıq niyyətində olması, öz əhalisinin boğazından kəsib silahlanmaya, yeni müharibələrə, yeni ərazilər zəbt etməyə vəsait xərcləməsi rus xalqının bədbəxtliyidir”.
M.Zülfüqarlı deyir ki, əsrlərdir Rusiyanın siyasəti dəyişmir, yenə də ərazilər işğal etmək istəyindən əl çəkmir, başqa dövlətlərin daxilində özünə muzdlu qüvvələr saxlamaq üçün vəsait ayırır: “Rus Pravoslav kilsəsinin baş rahibəsi Rusiyanın 300 ildən artıqdır yürütdüyü işğalçılıq siyasətini ifşa edib. Çünki Rusiyanın yürütdüyü istila siyasətindən rus xalqı heç nə qazanmır, əksinə, zərbə alır. Rusiyanın kəndləri boşalır, insanlar ucqar yerlərdən çıxıb mərkəzə doğru gedir, vəziyyətləri günü-gündən pisləşir. Rusiyanın Uzaq Şərqində get-gedə Çin əhalisi məskunlaşdırılır. Məkəzi əyalətlərdə də əsasən qeyri-rus xalqlar məskunlaşmaqda davam edir. Rusiyada ikinci böyük toplum müsəlman-türk əhalisi olan tatarlardı. Hesab edirəm ki, Rusiya Federasiyası dağılmaq ərəfəsindədir. Çünki XX əsrdən başlayaraq bütün imperiyalar dağılıb, növbəti dalğada isə, böyük ehtimalla, Rusiya Federasiyası dağılacaq və kiçik dövlətlərə parçalanacaq. Gələcəkdə Rusiya imperiya siyasətindən əl çəkərsə, Rusiyanın daxilində dövlətlər yaranarsa, burada təəccüblü heç nə olmaz. Çünki gedişat onu göstərir”-deyə M.Zülfüqarlı qeyd etdi.
İradə SARIYEVA
