Ermənistanın Təhlükəsizlik Şurasının katibi Armen Qriqoryan regionda yeni müharibə təhlükəsinin heç vaxt aradan qalxmadığını bildirib. O bunu müxtəlif arqumentlərlə əsaslandırmağa çalışıb.
A.Qriqoryan ilk növbədə bunu tərəflər arasında sülh müqaviləsinin olmaması ilə əlaqələndirib: “Azərbaycanla bizim aramızda hansısa müqavilə yoxdur ki, indi biz onun qəfil pozulması haqda danışaq. Aydındır ki, 10 noyabr üçtərəfli bəyanatı regionda müəyyən stabilizasiyaya gətirib çıxardı, amma məsələni tam həll edə bilmədi. Müharibə təhdidi heç vaxt aradan qalxmayıb. Heç kim deyə bilməz ki, regionda müharibə təhdidi yoxa çıxıb”.
Təhlükəsizlik Şurası katibinin sözlərinə görə, dəhlizin məcburən açılmasına gəldikdə isə, Ermənistan ordusu və ölkənin müdafiə sistemi Ermənistanın suveren ərazilərini müdafiə etməyə hazırdır. O, Ermənistanın regionda bütün kommunikasiyaların eyni vaxtda açılmasının tərəfdarı olduğunu bildirib.
A.Qriqoryan bununla nə demək istəyir? Bu, Ermənistanın 10 noyabr razılaşmasından irəli gələn tələbləri yerinə yetirməməklə bağlı bəhanəsidir, yoxsa həqiqətən müharibə təhlükəsi var?
“Qarşı tərəf növbəti müharibənin altından çıxa bilməyəcək”
Məsələyə münasibət bildirən AMİP funksioneri Əli Orucovun fikrincə, Ermənistan rəsmisinin açıqlamasında hər iki element var: “Bu bir reallıqdır ki, rəsmi İrəvan 10 noyabr razılaşmasının bir sıra bəndlərini yerinə yetirməkdən nümayişkaranə surətdə yayınır. Bütün bunları görməmək mümkün deyil. Hər vasitə ilə çalışırlar ki, vaxtı uzatsınlar və bununla zaman qazansınlar. Bütün bunlar tipik erməni xislətinə xas olan bir xüsusiyyətdir. Baxmayaraq ki, 44 günlük Vətən müharibəsini sonlandıran 10 noyabr üçtərəfli bəyanatı imzalandıqdan sonra Ermənistan-Azərbaycan Dağlıq Qarabağ münaqişəsi faktiki olaraq öz həllini tapdı. Bu bəyanat həm də Ermənistanın baş naziri Nikol Paşinyanın kapitulyasiya aktı imzalaması kimi tarixə düşdü. Prezident İlham Əliyev müharibə başa çatdıqdan sonra dəfələrlə qeyd edib ki, münaqişə həll olunub. Bütün bunlara rəğmən, Ermənistan sülh sazişi üzərində iş aparılmasından yayınır. O üzdən Qriqoryan o cür ikibaşlı danışır. Ancaq sülh sazişi imzalamaqdan imtina bu ölkənin İkinci Qarabağ müharibəsindən daha ağır zərbə alması ilə nəticələnə bilər. Bu zərbəni endirmək üçün Azərbaycanın potensialı və resursları kifayət qədər böyükdür. Ona görə də Paşinyan və onun komandası bu cür ikili oyunlara son qoymalıdır. Ermənistan növbəti müharibənin altından çıxa bilməyəcək”.
Partiya funksioneri hesab edir ki, Azərbaycan qalib tərəf olaraq qətiyyətlə bu məsələlərin üzərinə getməlidir.
Vidadi ORDAHALLI
