Prezident İlham Əliyev Şuşada Vaqif Poeziya Günlərinin rəsmi açılışında çıxışında deyib ki, Şuşanın itirilməsi digər rayonların itirilməsinə təkan vermişdi: “Ancaq biz Azərbaycan xalqı olaraq heç vaxt bu işğalla barışmaq fikrində deyildik. İşğal dövründə mən dəfələrlə deyirdim ki, biz heç vaxt bu vəziyyətlə barışmayacağıq, işğal edilmiş bütün torpaqları, o cümlədən Şuşanı nəyin bahasına olursa-olsun işğalçılardan azad edəcəyik”.
Dövlət başçısı danışıqlar prosesinin 30 ilə yaxın davam etdiyini, bunun heç bir nəticəsi olmadığını qeyd edib: “İndiki hadisələrin gedişatı, İkinci Qarabağ müharibəsindəki dövr və beynəlxalq güclərin hərəkətləri onu göstərir ki, bu məsələ heç vaxt danışıqlar yolu ilə öz həllini tapa bilməzdi. Çünki bizi, azərbaycanlıları bu vəziyyətlə barışdırmaq istəyirdilər. Bu vəziyyəti, yəni dondurulmuş münaqişəni alternativsiz bir variant kimi təqdim etməyə çalışırdılar. Bizim isə tam başqa fikrimiz var idi və mən bunu heç vaxt gizlətmirdim. Deyirdim ki, əgər məsələ sülh yolu ilə öz həllini tapmasa, biz öz ərazi bütövlüyümüzü müharibə yolu ilə bərpa edəcəyik. Beynəlxalq hüququn bütün norma və prinsipləri bu haqqı bizə tanıyır. BMT-nin Nizamnaməsi, BMT Təhlükəsizlik Şurasının qətnamələri, tarixi ədalət bu haqqı bizə verib. Biz buna nail olduq”.
Göründüyü kimi, Prezident qeyd edir ki, İkinci Qarabağ müharibəsinin gedişatı və ondan sonrakı dönəm göstərir ki, Qarabağ problemi heç vaxt danışıqlar yolu ilə həll edilə bilməzdi. Ölkə başçısı bunu hansı məntiqə söykənərək deyir?
Politoloq Elşən Mustafayev “Bakı-Xəbər”ə açıqlamasında bildirdi ki, ölkə başçısının bu təsbiti tam doğrudur: “Biz 30 illik işğal dönəmində gördük ki, bu işdə vasitəçilik edənlər bizim ərazilərimizlə manipulyasiya edib, ermənilərə ikinci bir dövlət yaratmaq istəyirdilər. Bir addım da olsun danışıqlar prosesində irəliləyişin şahidi olmadıq. Yalnız məsuliyyəti eyniləşdirən beynəlxalq bəyanatlara rast gəlrdik. BMT kimi nüfuzlu qurumun 4 qətnaməsinin icrası ilə bağlı konkret addım atılmadı. Ermənistanı işğaldan çəkindirən heç bir təsirli mexanizmin tətbiqini görmədik. Minsk Qrupunun həmsədrləri bütün vasitələrlə çalışırdılar ki, bizdən hansısa güzəşti qoparsınlar. Nəhayət biz öz gücümüzə ərazilərimizi işğaldan azad etdik. Bu asan olmadı, minlərlə şəhid verdik, ancaq şərəfli yol oldu. Biz mühribə dönəmində əsl dostlarımızı və düşmənlərimizi yaxşı tanıdıq. Təəssüflər olsun ki, məhz müharibənin qızğın vaxtında neytrallığını qorumalı olan ölkələr açıq şəkildə Ermənistanın dəstəyinə qalxdılar. Maraqlıdır ki, bunu edən həmsədr ölkələr idi. Digər həmsədr ölkə Ermənistanı silahlandırmaqla məşğul olurdu. Müharibədən sonra da həmin dairələrin bizə qarşı olan fəaliyyətini hiss edirik. Onlar Ermənistanı revanşa motivasiya edən fəaliyyətə üstünlük verirlər. Bütün çalışdıqları odur ki, Qarabağdakı bir ovuc erməniyə status alsınlar. Təkidlə danışıqların Minsk Qrupu formatına qaytarılmasını istəyirlər. Ermənistanı müharibənin dayandırılması ilə bağlı üzərinə götürdüyü öhdəlikləri yerinə yetirməyə məcbur etmirlər. Təbiidir ki, Azərbaycan öz prinsipial mövqeyində qalır. Ancaq doğru olaraq bu nəticəyə gəlinir ki, bu cür vasitəçilərə və beynəlxalq qurumlara güvənib, danışıqlar yolu ilə torpaqlarımızın azad olunması qeyri-mümkün idi”.
Məhəmmədəli QƏRİBLİ
