Ermənistanda fəaliyyət göstərən Məlumat Azadlığı Mərkəzinin rəhbəri Şuşan Doydoyan parlamentdə akkreditə olunmuş jurnalistlərin sərbəst hərəkətinin məhdudlaşdırılması məsələsinin müzakirəsi zamanı bildirib ki, parlament jurnalistlərinə qarşı zorakılıq həddinə çatacaq qədər görünməmiş məhdudiyyətlər qoyulub və onlar heç bir halda, heç vaxt bu faktla barışmamalıdırlar.
Bunun “görünməmiş bir hadisə olduğunu” deyən Mərkəz rəhbəri hesab edir ki, oxşar halların adiləşməsi fonunda cəmiyyətin “informasiya vakuumuna düşməsi” təhlükəsi qaçılmazdır: “Yəni tamamilə subyektiv ixtiyari bir qərar nəticəsində cəmiyyət birbaşa məlumat almaq hüququndan məhrum olur. Jurnalistlərin fəaliyyəti üçün təhlükəsizlik məsələsinin aktuallığını əsaslandırmadan təhlükəsizlik məsələsindən danışırlar. Bu halda, bir jurnalistin parlamentdə deyilənlərə qulaq asmasının onların işi üçün hansı təhlükə yaratdığının aydın şəkildə əsaslandırılmasını tələb etməliyik”.
Xatırladaq ki, bir müddət əvvəl yeni seçilən indiki parlamentin təhlükəsizlik xidmətinin əməkdaşları Ermənistan mətbuatının bir sıra nümayəndələrinin parlament iclaslarında iştirakını “arzuolunmaz” hesab edərək, onları içəri buraxmayıblar.
Bütün dünyanın gözü qarşısında Ermənistanın jurnalistlərə qarşı nümayiş etdirdiyi bu davranış nə ilə bağlıdır?
Jurnalistlərin Həmkarlar İttifaqının sədri Müşfiq Ələsgərli “Bakı-Xəbər”ə açıqlamasında bildirdi ki, Ermənistan hakimiyyəti ilə ölkə KİV-ləri arasında yaranmış indiki gərginliyin səbəbi parlamentində 24-25 avqust tarixlərində baş vermiş insidentdir: “ Həmin vaxt parlamentdə olan jurnalistlər əlbəyaxa davanın görüntülərini çəkib ictimailəşdirdilər və Ermənistandakı siyasi gərginliyi dünyaya göstərmiş oldular. 24- 25 avqust sessiyalarında hökumətyönlü və müxalif millət vəkilləri arasında dava düşəndə təhlükəsizlik işçiləri jurnalistləri parlamentdən çıxarmağa, onların fəliyyətinin qarşısını almağa çalışmışdılar ki, prosesləri detallı şəkildə işıqlandıra bilməsinlər. Amma bəzi jurnalistlər fürsət taparaq, hadisələri canlı şəkildə qeydə almış, erməni siyasətçilərin mahiyyətini aça bilmişdilər. Bu anlaşmazlıqdan sonra Paşinyan hökuməti qərara gəlib ki, jurnalistlərin parlamentdə fəaliyyətini məhdudlaşdırsın, akkreditasiya şərtlərini sərtləşdirsin, yalnız sözəbaxan, senzuranı qəbul edən jurnalistləri parlamentə buraxsınlar. Çünki Ermənistanda siyasi vəziyyət gərgindir, qarşıdurmalar var, parlamentdə hələ çox davaların olacağı gözlənilir. Hakimiyyət bu davaların detallarının xalqa olduğu kimi çatdırılmasını istəmir. Məlumat Azadlığı Mərkəzi, Ermənistan Jurnalistlər Birliyi və digər qurumlar da bu siyasətə mane olmaq istəyirlər”.
Media ekspertinin sözlərinə görə, Paşinyan komandasının media mühitini boğması, KİV-lərin fəaliyyətini məhdudlaşdırması yönündə düşünülmüş siyasət yürütməsini ehtiva edən fakt yalnız bundan ibarət deyil: “Hələ 44 günlük müharibə vaxtı “Hərbi vəziyyət rejimi” adı altında çoxsaylı məhdudlaşdırmalar həyata keçirilmişdi və müharibə bitdikdən sonra bu məhdudiyyətlərin əksəriyyəti aradan qaldırılmamışdı. Həmin vaxt Ermənistan Jurnalistlər Birliyi etiraz aksiyası keçirmişdi. Daha sonra isə 2020-ci il noyabrın 11-də İrəvanda “Azadlıq” radiosunun ofisinə basqın edilərək dağıdılmışdı. Çünki onlar Paşinyanın imzaladığı sənədin kapitulyasiya aktı olduğunu yazmışdılar. Biz misalların sayını artıra da bilərik. Mahiyyəti budur ki, Paşinyan komandası dünyaya demokrat kimi sırınsa da, əslində söz-ifadə azadlığına qarşıdırlar və bu yöndə ciddi şəkildə fəaliyyət göstərirlər. Amma təəssüf ki, beynəlxalq təşkilatlar bu faktı etiraf etmək istəmir. Bu gün beynəlxalq media təşkilatlarının saytlaına baxmışam. Onların əksəriyyəti son problemi işıqlandırmayıb. 44 günlük müharibə vaxtı da belə davranmışdılar. Həmin vaxt Ermənistan Jurnalistlər Birliyinin “Hərbi vəziyyət rejimində” medianın fəaliyyətinin ifrat səviyyədə məhdudlaşdırılmasına etiraz edən bəyanatını yalnız 2 beynəlxalq təşkilat dəstəkləmişdi. Əksəriyyət onlara yer ayırmamışdı. Beynəlxalq təşkilatlar Paşinyan komandasının simasında Ermənistanın süni demokratik imicinin yaradılmasına çalışırlar”.
Məhəmmədəli QƏRİBLİ
