Vətən müharibəsinin zəfərlə başa çatması müharibə iştirakçılarının statusuna yeni baxış, yeni yanaşma təlqin etdi. Müharibə sonrası müharibə veteranları haqqında qanun layihəsi hazırlandığı və yaxın zamanlarda bu qanunun qəbul ediləcəyi deyilirdi.
Amma qələbənin 1 illiyinə az vaxt qalmasına baxmayaraq, hələ də müharibə veteranları ilə bağlı qanun qəbul edilməyib. Layihənin hazır olduğu deyilirdi, amma qəbul olunmayıb. Ekpsertlər də deyir ki, bu qanundan heç bir xəbər yoxdu.
Bildiyimiz kimi, bu qanun müharibə iştirakçısının hüququnu, statusunu müəyyən edən bir qanun olacaqdı.
Hələ də qanunun qəbul edilməməsinin səbəbi nədir? Niyə qəbul edilmir?
“Bu məsələ artıq çox ictimailəşdirildiyi üçün mənə elə gəlir ki, çox qısa müddətdə müharibə veteranları haqqında qanun qəbul ediləcək, bizim qazilərimizə müharibə veteranı statusu və vəsiqəsi veriləcək”
Tanınmış hərbi ekspert İbrahim Rüstəmli “Bakı-Xəbər”ə bildirdi ki, bu qanunun qəbulunun gecikdirilməsi müəyyən səbəblərlə bağlı ola bilər: “Fikrimcə, bu qanunun qəbul olunmasında gecikmələrin əsas səbəbi döyüş əməliyyatları zamanı bölgədə olan şəxsi heyətin statusunun hələ müəyyən edilməməsi ilə bağlıdır. Yəni orada elə heyət vardı mühafizədə dayanırdı, elə heyət vardı təminat məsələsi ilə məşğul olurdu, elə heyət vardı daha arxa cəbhədə dayanırdı, əsas heyət isə döyüşən heyət idi. Mənə elə gəlir ki, burada bunların statuslarını, kimlərin müharibə veteranı adına daha uyğun olub-olmadığını müəyyənləşdirmək məsələsində problemlər yaranıb. Ancaq bilirsiz ki, orada çoxlu şəxsi heyət vardı. Birinci, ikinci, üçüncü eşelonlor vardı. Yəqin ki, qısa müddətdə bu məsələ öz həllini tapacaq. Ancaq keçən müddət müharibədə iştirak edənlərin müharibə veteranı statusu alması, vəsiqə ilə təmin olunması üçün yetərli idi. Yəni indiyə qədər bunu müəyyən etmək mümkün idi və burada elə də ciddi bir problem yoxdu, hər şey aydındı, proses gözümüzün qabağında gedib. Amma müharibə veteranı statusuna iddia edənlərin sayı həddən artıq çoxdur, onlar arasında elələri var ki, ümumiyyətlə döyüş əməliyyatlarında iştirak etməyib”.
İ.Rüstəmlinin sözlərinə görə, elə adamlar olub ki, ümumiyyətlə döyüş əməliyyatlarından uzaqda olub. İ.Rüstəmlilin fikrincə, bu sahədə müəyyən problemlər var, amma müharibə veteranı statusunun və vəsiqəsinin verilməsi bu qədər vaxt aparmamalı idi. “Yəni bunu həll etmək mümkün idi. Bu məsələ artıq çox ictimailəşdirildiyi üçün mənə elə gəlir ki, çox qısa müddətdə müharibə veteranları haqqında qanun qəbul ediləcək, bizim qazilərimizə müharibə veteranı statusu və vəsiqəsi veriləcək”-deyə İ.Rüstəmli qeyd etdi.
İradə SARIYEVA
