Ermənilər keçmiş Əsgəran rayonu ərazisində qanunsuz arxeoloji qazıntı işləri aparıblar. Onların “Xaçın Tap” adlandırdığı yerdən Ellin mədəniyyəti dövrünə aid olan nekropol tapdıqları deyilir.
Nekropolu Vardqes Səfəryan adlı erməni arxeoloqun tapdığı deyilir. Bu abidənin həqiqətən Ellin dövrünə aid olması məsələsinə şübhə ilə yanaşmırıq. Çünki eradan əvvəl 3-2-ci əsrlərə aid hər hansı abidənin Azərbaycanda ola bilməsi tam mümkündür. Ona görə ki, Azərbaycan dünyanın ən qədim sivilizasiya mərkəzlərindən biridir.
Azərbaycan ərazisində ən qədim dövrlərə aid abidələrin aşkarlanmasında təəccüblü heç nə yoxdur, təəccüblü olan ermənilərin bu abidəni “qədim erməni abidəsi” kimi qələmə verib özününküləşdirməyə cəhd etməsidir.
Azərbaycan arxeoloqları, tarixçiləri deyirlər ki, keçmiş Əsgəran ərazisindən qədim nekropol tapıla bilər, amma onun birmənalı olaraq ermənilərlə heç bir əlaqəsi yoxdur. Sovet dövründə o ərazilərdə elə də dərindən arxeoloji tədqiqatların aparılmadığını deyən arxeoloqların sözlərinə görə, bu gün rus sülhməramlıları tərəfindən nəzarət edilən ərazilərimizdə ermənilər qanunsuz arxeoloji qazıntıları davam etdirir.
“Erməni arxeoloqun oradan qədim qəbirlər tapıldığını yazmadığına baxmayaraq, erməni mediası iki-üç dənə saxsı qabın qırıntılarının tapıntısını gündən-gündən şişirdərək “tapıntını” guya oradan “böyük, qədim məzarlar tapılıb” kimi tədqim edir”
Qafqaz Tarixi Mərkəzinin rəhbəri Rizvan Hüseynov “Bakı-Xəbər”ə bildirdi ki, əvvəla, erməni arxeoloqlarının Azərbaycana məxsus ərazidə arxeoloji qazıntılar aparması tamamilə qanuna ziddir. “Ora Azərbaycanın ərazisidir və orada aparılan arxeoloji qazıntılar qanunsuzdur. Müvəqqəti olaraq orada rus sülhməramlı missiyası fəaliyyət göstərir, amma bu o demək deyil ki, orada yaşayan ermənilər hansısa qanunsuz əməllər edə, qanunsuz qazıntılar apara bilər. Bu tamamilə qanunaziddir. Bu, təxribatçı təbliğatın bir növüdür. Erməni separatçıları “nekropol tapmışıq” deməklə dünyaya göstərmək istəyirlər ki, guya “hər şeyi nəzarətdə saxlayırlar”, hətta burada elmi araşdırmalar, arxeoloji qazıntılar aparırlar. Amma mətnin dərinliklərinə baxanda aydın şəkildə görsənir ki, bu saxta bir şeydir. Şəkillərə də baxdım, əgər oradan Ellin dövrü mədəniyyətinə aid abidə tapılıbsa, bunun ermənilərə heç bir aidiyyəti yoxdur”.
R.Hüseynovun sözlərinə görə, erməni mediası bu məsələni daha geniş şərh edir ki, guya Ağdərə istiqamətində tapılan əşyaların bəziləri Ağdamın Şahbulaq qalası ərazisində “tapılan” yalançı, saxta “tiqranakert”də aşkarlanan əşyalarla eynilik təşkil edir. Guya yeni “tapılan əşyalar”ın bir qismi də oradan “tapılan” əşyalarla uyğundur. Bütün bunlar bir şeyi sübut edir ki, istər yalançı, mifik “tiqranakert”də, istərsə də keçmiş Əsgəran rayonu ərazisində tapılan əşyalar, arxeoloji nümunələrin Ellin-yunan mədəniyyətinə aidiyyəti varsa, demək bunun ermənilərə heç bir aidiyyəti yoxdur”.
Rus sülhməramlılarının nəzarətində olan ərazilərimizdə ermənilərin apardığı arxeoloji qazıntıların qanunsuz xarakter daşıdığını deyən R.Hüseynov bildirdi ki, Azərbycan dövləti buna kəskin münasibət bildirməlidir. “Burada bir məqamı da qeyd etmək lazımdı. Orada saxtakarlığın bir çaları da var. Həmin erməni arxeoloq feysbuk səhifəsində yazdığı orijinal mətndə qəbiristanlıq tapıldığını qeyd etmir, yazır ki, qazıntılar nəticəsində bəzi əşyalar tapılıb. Erməni arxeoloqun oradan qədim qəbirlər tapıldığını yazmadığına baxmayaraq, erməni mediası ordan iki-üç dənə saxsı qabın qırıntılarının tapıntısını gündən-gündən şişirdərək “tapıntını” guya oradan “böyük, qədim məzarlar tapılıb” kimi tədqim edir”-deyə R.Hüseynov qeyd etdi.
İradə SARIYEVA
