Ötən il Azərbaycanın şanlı tarixinə 44 günlük Vətən müharibəsi kimi düşən İkinci Qarabağ savaşı uğurla yekunlaşandan sonra xalqımız və dövlətimizin qarşısında yeni məsul vəzifə dayandı. Bu, işğaldan azad edilmiş tarixi və əzəli torpaqlarımızda quruculuq, bərpa işlərinin aparılması, yenidən Qarabağa həyatın qaytarılmasıdır.
Artıq dövlətimiz bu istiqamətdə genişmiqyaslı işlər görür, əcnəbi şirkətlərlə birgə yeni iqtisadi, quruculuq layihələri hazırlanır, hətta infrastrukturun bərpası ilə bağlı bir çox ilkin tədbirlər həyata keçirilib. Təbii ki, bütün bu mənzərələrin fonunda ölkə başçısının işğaldan azad olunmuş ərazilərə mütəmadi səfərlər etməsi quruculuq və bərpa işlərinin daha operativ və effektiv şəkildə davam etdirilməsini təmin edir.
Prezident azad olunan ərazilərdə aparılan işlərlə bağlı bütün prosesləri ən xırda detallarına qədər nəzarətdə saxlayır, şəhər və qəsəbələri kəndbəkənd gəzərək həm xalqımız, həm də dünya ictimaiyyətinə mühüm mesajlar verir.
Qeyd etdiyimiz kimi, işğaldan azad olunmuş ərazilərdə aparılan yenidənqurma, bərpa işləri dünya ictimaiyyətinə mesaj verir. Maraqlıdır, Qarabağda aparılan sürətli bərpa tikinti işlərinin ermənilərə nə kimi mesajları var?
“… onlar 30 il ərzində yalnız dağıtmaq, məhv etmək, talamaqla məşğul oldular, ancaq Azərbaycan…”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, Qarabağda aparılan yenidənqurma işləri dünyaya mesaj verir ki, Azərbaycan yıxıcı, dağıdıcı deyil, qurucu ölkədir: “Ölkə başçısı İlham Əliyevin ayağı dəyən yer abadlaşdırılır, yenidən qurulur. Avqustun 29-da Prezident İlham Əliyev Şuşada olarkən bir sıra abidələrin, obyektlətin açılışını etdi. Qısa müddət ərzində Şuşaya Zəfər yolu da inşa edilir. Zəfər yolu artıq bitmək üzrədir. Qarabağda həyata keçirilən bütün yenidənqurma işləri dünyaya göstərir ki, Azərbaycan qurucu, bərpa edən bir ölkədir. Qarabağda aparılan sürətli tikinti işləri həm də ermənilərə mesaj verir. Onlar 30 il ərzində yalnız dağıtmaq, məhv etmək, talamaqla məşğul oldular. Ermənilər haqları olmayan torpağı öz sahibinə geri verməli oldular. Nəticə etibarı ilə onlar rəzil, rüsvay duruma düşdülər. İşğalçı ölkə Qarabağda aparılan tikinti, quruculuq işlərini görərək torpağın onlara aid olmadığını, Azərbaycanın bərpa edici ölkə olduğunu anlayır”.
Günel CƏLİLOVA
