Ermənistan rəsmilərinin Qarabağa qanunsuz səfərləri davam edir və sülhməramlılar buna mane olmur. Bu dəfə Ermənistanın əmək və sosial məsələlər naziri Narek Mkrtçyan Rusiya hərbçilərinin dəstəyi ilə Azərbaycan Respublikasının Laçın dəhlizindəki dövlət sərhədini pozaraq Qarabağa səfər edib və orada “sosial biznesin inkişafı üçün proqram təqdim edib”. Bununla yanaşı o, bir sıra digər görüşlır keçirib.
Erməni mediasının yaydığı məlumata görə, N.Mkrtçyan, habelə, nazir müavini Ruben Sarkisyan separatçıların “dövlət naziri” Artak Beqlaryanın müşayiəti ilə Xankəndidəki qanunsuz “parlament”də olub. Ermənistan naziri separatçı xuntanın “spiker”i adlanan Artur Tovmasyanla görüşdə Ermənistanın Sosial və Əmək Nazirliyinin dəstəyi ilə Azərbaycan torpaqlarında həyata keçirilən 15-ə yaxın proqramı müzakirə edib. Xüsusilə N.Mkrtçyan Ermənistan tərəfdən birbaşa sosial dəstəkdən inkişaf proqramlarına tədricən keçməyin vacibliyinə işarə edib. Onun sözlərinə görə, səfərin əsas məqsədi dövlət dəstəyi proqramlarına daxil ediləcək sosial biznesin həyata keçirilməsi üçün yeni bir proqramın təqdim edilməsidir.
Yeri gəlmişkən onu da qeyd edək ki, Nikol Paşinyanın son iclaslardan birində verdiyi məlumata görə, 2020-ci ilin noyabrından bəri işğalçı Ermənistan hökuməti Qarabağdakı separatçı rejimə təxminən 203 milyon dollarlıq maliyyə vəsaiti ödəyib.
Bir sözlə, yüksək səviyyəli erməni rəsmilərinin Qarabağa tez-tez qanunsuz səfər etmələri, getdikcə bu cür səfərlərə sülhməramlıların mane olmamasının adi hal alması narahatlıq doğurur. Maraqlıdır, bütün bunların qarşısını necə almaq olar?
“Laçın dəhlizinin girişində öz sərhədçilərimizi yerləşdirməliyik”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, rəsmi səviyyədə buna etirazlar bildirilməlidir: “Ermənistan rəsmilərinin Qarabağa qanunsuz səfərləri onu göstərir ki, qarşı tərəf revanşist iddialarından əl çəkməyib. Dövlət olaraq o siyasəti davam etdirirlər. Rusiya sülhməramlıları da buna göz yumur və beləliklə faktiki Ermənistanın tərəfində olduğunu açıq-aşkar bəyan edir. Rusiyanın belə mövqe sərgiləməsində gizli heç nə yoxdur. Məsələ ondadır ki, Rusiya Qarabağ məsələsinin birdəfəlik həllini istəmir. Kreml Qarabağ amilindən istifadə edərək hər iki ölkəni öz təsiri altında saxlamaq istəyir. Azərbaycan tərəfinin artıq bu kimi xoşagəlməz hallara səbr etməsinə yer yoxdur. Hesab edirəm ki, biz dövlət olaraq buna növbəti dəfə etiraz etməliyik. O cümlədən, Laçın dəhlizinin girişində öz sərhədçilərimizi yerləşdirməliyik ki, Ermənistandan gəlib-gedənlərə nəzarət etsin. Əks halda erməni həyasızlığı davam edəcək. Ona görə də nə səbr etmək lazımdı, nə də insanların əsəbləri ilə oynamaq. Konkret olaraq ortaya mövqe qoymaq lazımdır. Hesab edirəm ki, yaxın perspektivdə bunu reallaşdırmaq mümkün olacaq. Çünki Azərbaycanın başqa çıxış yolu yoxdur”.
Partiya sədri onu da qeyd etdi ki, Azərbaycan heç vaxt ermənilərin bu kimi təxribatları ilə barışmayacaq.
Vidadi ORDAHALLI
