Ermənistanda günü-gündən alovlanan revanşizmi elə bu ölkənin daxilində ciddi tənqid atəşinə tuturlar. Xüsusən də blogerlik fəaliyyəti ilə məşğul olanlar bu ölkədəki revanşizmə qarşı çıxırlar. Onlardan biri olan Roman Baqdasaryan ermənilərə düşmənlərinin kim olduğunu göstərib.
R.Baqdasaryan deyib ki, ertmənilərin düşməni türklər deyil: “Ermənilərin düşməni Azərbaycan və Türkiyə deyil. Ermənilərin düşməni daşnaklar, erməni müxalifəti, Qarabağ klanı, Rusiyadakı erməni təşkilatlarıdır. Onlar 30 il erməni xalqını talan edib, qanını içiblər, boş-boş vədləri ilə ölümə sürükləyiblər”.
“Blogerlər erməni xalqına düşmənin kim olduğunu göstərməklə həqiqəti dilə gətiriblər və onlar bu istiqamətdə fikirilərini, təbliğatlarını daha da genişləndirməlidirlər, erməni cəmiyyətini bu fikirlərə kökləməlidirlər”
“Müasir İnkişaf” Birliyinin rəhbəri Mübariz Göyüşlü bizimlə söhbətində bildirdi ki, artıq blogerliklə və digər ictimai əhəmiyyətli işlərlə məşğul olanların xeyli bir qismi erməni xalqını bu miskin vəziyyətə salanları ifşa etməyə başlayıb. “Əslində, Baqdasaryan və başqa blogerlər illərdir bizim dediklərimizi dilə gətiriblər. 30 ildir ki, biz erməni xalqını rəzil gününə salanların kimliyini deyirik. Türkiyə və Azərbaycan Ermənistanın torpağına gucum edib onu işğal etməyib, Ermənistan Azərbaycanın torpaqlarını işğal etmişdi. Bu bir faktdır. Ermənistan Türkiyə və Azərbaycana qarşı əsassız iddialar irəli sürüb, halbuki, özü minlərlə azərbaycanlını qətlə yetirib, acımadan uşaqlarımızı, qocalarımızı, qadınlarımızı qətlə yetiriblər, yurd-yuvalarından didərgin salıblar. Biz erməni xalqına qarşı deyil, erməni faşizminə, daşnaklarına, revanşistlərinə qarşı mübarizə aparmışıq. Əgər Ermənistan normal qonşuluq mübasibəti saxlasaydı, bu qədər hadisələr baş verməzdi. Yenə də Ermənistan dinc qonşuluq siyasəti yürütsə, Türkiyə və Azərbaycanın onunla heç bir işi yoxdur. Blogerlər xalqın gözünü açırlar ki, Ermənistanda illərdir Azərbaycana və Türkiyəyə qarşı düşmənçiliyi görükləyənlər erməni daşnakları, Qarabağ klanı, radikal erməni müxalifəti, Rusiyadakı və dünyanın başqa yerlərindəki erməni diasporudur, bununla da erməni xalqını ağır duruma salıblar. Artıq ermənilər görür ki, onların əsl düşməni radikal mövqedən çıxış edib türkləri onlara düşmən kimi təqdim edənlərin özlərdir”.
M.Göyüşlü deyir ki, nədənsə, blogerlər prosesin bu dərəcədə qızışmasında aparıcı qüvvə olan erməni kilsəsinin adını qeyd etməyiblər, amma bu düşmənçilik mifinin yaradılmasına Qriqorian kilsəsi illər sərf edib. Ekpertin sözlərinə görə, erməni blogerlər görürlər ki, həmin o şər qüvvələr illər boyu, 30 il müddətində erməniləri türklərə düşmən münasibəti bəsləməyə təhrik ediblər. “Bu kəsimlər 30 il zərərli təbliğatla Ermənistanı çıxılmaz bir dalana qapadılar və bu da bu ölkənin 44 günlük müharibədə məğlubiyyəti ilə nəticələndi. Erməni xalqı uzun illərdir saxta, puç, məzmunsuz ideyanın ardınca aparılıb, “Dənizdən dənizə böyük Ermənistan” mifi isə bu xalqı ancaq məhvə doğru aparır. Bu baxımdan, Ermənistan normal qonşuluq siyasəti yürüdüb inkişafa doğru getmək istəyirsə, özünü illərdir əlində əsir-yesir qaldığı miflərdən xilas etməlidir. Heç şübhəsiz, Ermənistan öz dövlətçiliyini yenidən qurmaq, möhkəmləndirmək istəyirsə Azərbaycan və Türkiyə ilə konstruktiv münasibətlər qurmalıdır. Yəni heç kimsənin, xaricdəki erməni diasporunun, xarici dövlətlərin oyununa gəlmədən normal qonşuluq münasibətləri qurub, dinc yanaşı yaşamağı nəzərdə tuturam. Ermənistan Azərbaycanla sülh müqaviləsi imzalamalıdır, Azərbaycanın suveren ərazilərini tanımalıdır. Beləliklə də münasibətlər normal məcraya keçməlidir, bundan sonra iqtisadi münasibətləri, kommunikasiyaları bərpa etmək olar. Ermənistanın gələcəyə çıxış yolu bundadır. Əgər bunu istəyirlərsə. Hesab edirəm ki, Roman Baqdasaryan və digər blogerlər erməni xalqına düşmənin kim olduğunu göstərməklə həqiqəti dilə gətiriblər və onlar bu istiqamətdə fikirilərini, təbliğatlarını daha da genişləndirməlidirlər, erməni cəmiyyətini bu fikirlərə kökləməlidirlər. Saxta soyqırım, saxta “Böyük Ermənistan” və ərazi iddialarının daşnaklar, erməni diasporu və revanşistlər tərəfindən mifik, əsası olmayan bir ideya kimi ortaya atıldığını camaata daha dərindən anlatmalıdırlar və onların gözlərini açmalıdırlar”-deyə M.Göyüşlü vurğuladı.
İradə SARIYEVA
