Bakı İrəvandan, iki kənd də daxil olmaqla, 21 kilometrlik Gorus-Qafan yolunun Azərbaycan ərazisi olaraq rəsmən tanınmasını tələb edib. Ermənistan mediası yazır ki, bunu tanınmış erməni politoloq Stepan Danielyan bəyan edib. Qeyd edək ki, Qarabağ münaqişəsi başlamazdan əvvəl bu ərazi Qubadlı rayonunun iki kəndi - Eyvazlı və Çayzəmi də daxil olmaqla, Azərbaycanın inzibati ərazisinə daxil idi. Beləliklə, müharibədən sonra Azərbaycan qoşunları dövlət sərhədlərinə çatıb. Erməni mediası yazır ki, Azərbaycanın tələbi yerinə yetirilib: “Tələb yerinə yetirilib və baş nazir Nikol Paşinyan hökumət iclasında bəyan edib ki, bu 21 kilometr Azərbaycanın ərazisidir. Eyni zamanda o, iki kəndin Azərbaycan dilində adlarını da çəkib”
Xatırladaq ki, bu ərəfədə Azərbaycan Gorus-Vorotan dövlətlərarası avtomobil maqıstralı ilə keçən Ermənistandan İrana gedən yolu bağlayıb. Ermənistan Milli Təhlükəsizlik Xidməti yolun açıldığı barədə məlumat verib. Faktiki olaraq, Azərbaycan öz gücünə sərhədin bir hissəsində demarkasiya və delimitasiya işlərini həyata keçirmiş olub.
“Ermənistanın sərhədlərin dəqiqləşdirilməsi istiqamətində atdığı bütün təxribatçı addımlara baxmayaraq, Azərbaycan prosesi lazımi səviyyədə həyata keçirməyə nail olur”
Politoloq Yeganə Hacıyeva “Bakı-Xəbər”ə açıqlamasında bildirdi ki, avqustun 25-dən Gorus-Qafan yolu bir neçə yerdən bağlanmışdı: “Buna səbəb həmin ərazidə ermənilərin Azərbaycan sərhədçisini süngü ilə yaralaması olmuşdu. Azərbaycan buna cavab olaraq iki kənd hissəsindən yolu bağladı. Bunun da nəticəsində Ermənistanın İranla əlaqəsi məhdudlaşdı. İranla Ermənistanı birləşdirən iki yol var. Digəri isə Mehri-Sisian yoludur. Həmin yol çox bərbaddır. Bu səbəbdən də ermənilər bizim ərazimizdən keçən yoldan istifadə edirdi. İşğal zamanında bu yoldan maneəsiz istifadə edirdilər. Çünki ətraf ərazilər də onların nəzarətindəydi. Ermənistan tərəfi sərhədlərin dəqiqləşməsi ilə bağlı məsələdə məhz bu yolla bağlı məsələni qəbul etmirdi. Hesab edirdilər ki, bu yol iki erməni şəhərini birləşdirdiyi üçün onların nəzarətində olmalıdır. Azərbaycan öz qəti mövqeyini ortaya qoyandan sonra bu hal Ermənistanda qiymətlərə də ciddi təsir etmişdi. Çünki İrandan ərzaq daşıyan maşınlar paytaxt İrəvana çata bilmirdi. Azərbaycan tərəfi keçid məntəqələrini qurmaq şərtilə yolu açdı. Ermənistan mediası yazır ki, keçid məntəqələrində rus hərbçilər də olacaq. Nikol Paşinyan, ola bilər ki, belə fikri məsələni cəmiyyətə həzm etdirmək üçün ortaya atır. Bu hal göstərdi ki, Ermənistanın sərhədlərin dəqiqləşdirilməsi istiqamətində atdığı bütün təxribatçı addımlara baxmayaraq, Azərbaycan prosesi lazımi səviyyədə həyata keçirməyə nail olur. Çalışıb, sərhədlərin dəqiqləşdirilməsini tez bir zamanda yekunlaşdırmalıyıq. Çünki bir aydan sonra dağlıq ərazilərdə hava şəraiti bu işləri aparmağa imkan verməyəcək. Bu müddət ərzində də Ermənistan manevr imkanları qazanacaq. 10 noyabr razılaşmasının yerinə yetirilməyən bəzi müddəaları var. Onlardan ən başlıcası sərhədin dəqiqləşməsidir. Biz bu hadisənin həmin prosesə ciddi təkan verəcəyi qənaətindəyik”.
Məhəmmədəli QƏRİBLİ
