Azərbaycan tərəfi Ermənistan rəsmilərinin Qarabağa səfərlərinin qəbuledilməz olduğunu və Azərbaycan ərazisində müvəqqəti yerləşən Rusiya sülhməramlılarının bu səfərlərə mane olmalı olduğunu bildirsə də, təəssüf ki, bu məsələ öz həllini tapmayıb. Əvvəlkinə nisbətən az olsa da, Ermənistan rəsmiləri Qarabağa səfərlərini davam etdirir.
Separatçı rejim növbəti təxribata hazırlaşır. Hələ Ermənistanda seçkilər bitəndə Paşinyan hakimiyyətinə müxalif olan qüvvələr iqtidarı qınağa doldurmaq məqsədilə ölkə rəhbərliyini Xankəndiyə səfər etməyə təhrik edir, hətta “Hayastan“ blokunun üzvləri Paşinyandan tələb edirdilər ki, gedib yenə ”Qarabağ Ermənistandır” şüarını səsləndirsin.
Paşinyanın belə bir səfərə hazırlaşmadığına əmin olandan sonra separatçı rejimin “liderləri” İrəvana gedib və başqa rəsmi şəxslərdən sentyabrın 1-də Xankəndiyə gəlməyi xahiş ediblər. Separatçı rejimin qondarma parlamentinin “başçısı” Artur Tovmasyan İrəvanda Ermənistan parlamenti fraksiyalarının başçıları Ayk Koncoryan, Seyran Ohanyan və Artur Vanetsyanla görüşüb və sentyabrın 1-də “Artsaxın müstəqilliyinin 30 illiyinə” həsr olunan növbədənkənar iclasa, eyni zamanda sentyabrın 2-də yubiley tədbirində iştiraka dəvət edib.
Ermənistanı təmsil edən deputatların Qarabağdakı təxribatçı tədbirdə iştirakına görə məsuliyyəti kim daşımalıdır və sülhməramlılar bu məsələdə necə davranmalıdır?
Milli Qeyri Hökumət Forumunun prezidenti Rauf Zeyni “Bakı-Xəbər”ə bildirdi ki, Qarabağdakı separatçılar işğal dönəmində hər il 2 sentyabr tarixində Xankəndidə tədbir keçiriblər: “Əldə etdiyimiz məlumata görə, Qarabağdakı seperatçıların tör-töküntüləri 30 il bundan əvvəl qeyri-qanuni yaratdıqları bir qurumun ildönümünü bu il də keçirməyə hazırlaşırlar. İndiki reallıqlar tam başqadır. Bu hadisə ilk dəfədir Vətən müharibəsindən sonra yaranmış yeni reallıqlar fonunda baş verir. Yeni reallıqların isə əlaməti odur ki, Ermənistan bu müharibədə biabırçı məğlubiyyətə düçar olub. Belə olan halda 2 sentyabrda qeyri-qanuni aksiyanın həyata keçirilməsi revanşizmin birbaşa ifadəsidir və regionda vəziyyəti yenidən gərginləşdirmək cəhdindən başqa bir şey deyil. Ancaq biz görürük ki, Ermənistan hakimiyyətini təmsil edən heç bir yüksək çinli məmur həmin tədbirdə iştirak etməyəcək. Ola bilsin ki, hansısa deputatlar olsun. Onlar da Paşinyana müxalif dairələrin təmsilçiləri olar. Əsas məqəsdləri də budur ki, gərginliyi artırsınlar. İstənilən halda, həmin tədbir baş tutmamalıdır. Çünki bizim ölkənin daxilində hansısa qondarma qurumun yarandığını qeyd etmək cinayətdir. Əgər Ermənistan rəhbərliyi kommunikasiyaların bərpasından danışırsa, belə tədbirlərə yol verməməlidir. Bütün bunlar beynəlxalq hüquqa zidd addım sayılır. Artıq “Dağlıq Qarabağ” ifadəsi və “Dağlıq Qarabağ xalqı” yoxdur. Qarabağ ərazisindəki ermənilər bizim vətəndaşlardır. 2 sentyabrda ermənilərin qondarma “müstəqillik günü” keçirmək niyyəti regionda sülhə çox ciddi təhdiddir. Onun qarşısının alınması üçün isə beynəlxalq ictimaiyyət əsaslı addım atmalıdır. Əsas məsuliyyət isə sülhməramlıların üzərinə düşür. Çünki həmin ərazilərdə sülhün yaradılması missiyasını onlar üzərlərinə götürüb. Bunu təmin edə bilmirlərsə, deməli, sülhdə maraqlı deyillər. Bir daha qeyd edirəm ki, belə bir tədbirin keçirilməsinin başlıca məsuliyyəti sülhməramlıların üzərinə düşür”.
Məhəmmədəli QƏRİBLİ
