Ermənistan-Azərbaycan sərhədlərinin delimitasiyası və demarkasiyası bölgədə sabitlik mühitinin formalaşmasında mühüm amildir. Bu barədə Ermənistan parlamenti tərəfindən təsdiqlənən yeni hökumətin proqramı adlı sənəddə yazılıb.
Proqramda qeyd edilir ki, bölgədə sülh bizim uzunmüddətli strategiyamızdır: “Qonşu ölkələrlə münasibətləri dərinləşdirmək və ya normallaşdırmaq hökumətin xarici siyasətinin vacib istiqamətlərindən birinə çevriləcək. Artan düşmənçilik bölgənin sabitliyi və təhlükəsizliyi üçün təhdid yaradır. Azərbaycanla sərhədlərin demarkasiyası və delimitasiyası sabit bir regional atmosferin formalaşması üçün əhəmiyyətli olacaq”.
Sənəddə həmçinin vurğulanır ki, Ermənistan Nazirlər kabinetinin regionun blokadadan çıxarılması üzrə xarici siyasəti digərləri tərəfindən konstruktiv olaraq qəbul edilirsə, bölgədə dinc və qarşılıqlı faydalı bir mühitin yaranmasına səbəb olacaq: “Bu kontekstdə əsas məsələ 10 noyabr 2020 və 11 yanvar 2021 tarixlərində Ermənistan, Rusiya və Azərbaycan liderlərinin imzaladığı bəyanatlarda nəzərdə tutulan addımların tam və qeyd-şərtsiz həyata keçirilməsidir”.
Görünən odur ki, Ermənistanın yeni hökuməti, gec də olsa, müsbət mesajlar verir. Anlamağa başlayırlar ki, 10 noyabr və 11 yanvar razılaşmalarından irəli gələn məsələlərin həlli vacibdir.
Maraqlıdır, ekspertlər sözügedən sülh mesajlarını necə dəyərləndirir?
“Rusiya kommunikasiya xətlərinin açılması məsələsində İrəvana təzyiq edir”
Məsələyə münasibət bildirən Yeni Yol Partiyasının sədri Ramil Hüseynov buna birmənalı yanaşmadı: “Əvvəla, biz erməni kimi məkrli bir millətlə qonşuyuq. Onlar hər zaman öz əsl niyyətlərini gizlədirlər. Ermənistanın bu cür mesajlar verməsi o demək deyil ki, bütün məsələlər sürətlə öz həllini tapacaq. Paşinyan hakimiyyətinin belə mesajlar verməsini şərtləndirən müəyyən amillər var. Birincisi, ölkədə sosial-iqtisadi vəziyyətin ağır olmasıdır. Məsələ ondadır ki, iqtisadiyyatın yerində sayması Paşinyan hakimiyyətini təhdid edir. Anlayırlar ki, iqtisadi durğunluq davam edərsə, bu onların sonunu yaxınlaşdıracaq. Zatən revanşistlər Paşinyanın qanına susayıblar. Parlamentin işini iflic etməyə çalışırlar. Bu səbəbdən Paşinyanın komandası anlayır ki, çıxış yolu qonşularla münasibəti normallaşdırmaqdır. Yoxsa, miqrasiya üzündən ölkədə qalan olmayacaq. Çünki Ermənistanın xarici borcu kəskin artır. İkincisi, Rusiya kommunikasiya xətlərinin açılması məsələsində İrəvana təzyiq edir. Çünki nəqliyyat əlaqələrinin bərpası Rusiyaya çox lazımdır. Gürcüstanla münasibətlərin gərgin olması səbəbindən Rusiyanın Ermənistanla gediş-gəlişində problemlər var. Ona görə də son vaxtlar Paşinyan bəzi güzəştlərə hazır olmaqla bağlı eyhamlar vurur”.
Partiya sədri hesab edir ki, xarici dairələrin maneçiliyi olmasa, bu sahədə müsbət dönüş ola bilər.
Vidadi ORDAHALLI
