Bəzi xarici mətbu orqanlarında deyilir ki, Azərbaycan yeddi rayonu azad edib. Bu, həqiqətə uyğun deyil. Yeddi rayonu azad edib, amma bununla bərabər Şuşa şəhərini, Hadrutu, Xocavənd rayonunun 60 faizini, Suqovuşan qəsəbəsini azad edib. Bu fikri Prezident İlham Əliyev şəhid ailələri və Qarabağ qaziləri ilə görüşündə söyləyib.
Dövlət başçısı çıxışında bu ərazilərin strateji əhəmiyyətindən danışıb. “Hər kəs xəritəyə baxıb görə bilər ki, Azərbaycan hakim strateji nöqtələrə sahibdir. İstər Qarabağ bölgəsində, istər Azərbaycan-Ermənistan sərhədində. 7 iyul tarixi əgər 1923-cü ildə xalqımızın faciəsi idisə, 2021-ci ildə biz artıq bu qara səhifəni də qapadıq. 7 iyul artıq gözəl bir tarix kimi tarixdə qalacaq. Çünki 7 iyul 2021-ci ildə Qarabağ və Şərqi Zəngəzur iqtisadi zonalarının yaradılmasına dair Fərman mənim tərəfimdən imzalandı. Tarixi ədalət bərpa edildi ”.
Prezident İlham Əliyev əziz şəhidlərimizin xatirəsini bir daha yad edərək deyib: “Siz, onların yaxınları onlarla fəxr edirsiniz. Haqlı olaraq fəxr edirsiniz. Bütün Azərbaycan xalqı şəhidlərimizlə, hərbçilərimizlə fəxr edir. Şəhidlərimizin əziz xatirəsi bizim ürəyimizdə əbədi yaşayacaqdır”.
Prezident Qarabağda və Azərbaycan-Ermənistan sərhədində ölkəmizin əldə etdiyi strateji uğurlardan da danışıb. Müharibədən sonra Qarabağ və ətraf rayonlarda əldə etdiyimiz nailiyyətlər məlumdur. Bəs son vaxtlar dövlət sərhədində Azərbaycan ordusu hansı üstünlüklərə sahiblənib?
Politoloq Elşən Mustafayev “Bakı-Xəbər”ə bildirdi ki, Azərbaycan sərhəddə öz mövqelərini bərpa edib: “Bilirsiniz ki, Ermənistanın təxribatı səbəbindən sərhədin dəqiqləşməsi prosesi yubanır. Buna baxmayaraq, hərbçilərimiz köhnə SSRİ xəritələrinə uyğun olaraq, dövlət sərhədinin keçdiyi əraziləri tam nəzarətə götürür. Məsələn, Laçın rayonundakı Qaragöl ətrafındakı ərazilərin 90-95% -nə Azərbaycan Silahlı Qüvvələri tərəfindən nəzarət olunur. Bunu erməni mənbələrin özü də etiraf edir. Azərbaycan qoşunları artıq gölün yaxınlığında səngərlər qazıb, mühəndislik işləri aparıblar. Azərbaycan hərbçiləri yaxınlıqdakı Akner, Verişen, Xəzinəvar kəndləri və Gorus şəhərini nişangah altında saxlayırlar. Xatırladaq ki, tarixən bütün Zəngəzur, Göyçə və s. əraziləri kimi, Qaragöl də bütövlükdə Azərbaycana məxsus olub. Hətta sovet hakimiyyətinin Zəngəzuru Ermənistana bağışlamasından sonra da həmin göl Laçın rayonu ərazisində qalıb. Lakin sonradan digər sərhəd rayonlarında olduğu kimi, bu ərazi də Moskvanın təzyiqi və öz rəhbərlərimizin sadəlövhlüyü sayəsində faktiki olaraq hissə-hissə Ermənistana verilib. Ancaq rəsmən Qaragöl daim Azərbaycan ərazisində olub və 1987-ci il noyabrın 17-də Azərbaycan SSR Nazirlər Sovetinin qərarı ilə Qaragöl respublikalararası Dövlət Təbiət Qoruğu yaradılıb. Bundan əlavə, Zəngilan və Qubadlı rayonlarına yaxın sərhəd ərazilərimizdə möhkəmlənməyimiz Gorus-Qafan yoluna nəzarəti də əlimizə keçirib. Həmin ərazilərdəki anklava nəzarətimizin bərpası yolun bir hissəsini bizim əraziyə aid edib. Ermənilərin təxribatından sonra biz həmin yolu bağlamışıq. Bunun da nəticəsində İranla Ermənistanı birləşdirən avtomobil yolu da tam nəzarətimizə keçib. Naxçıvan istiqamətindəki sərhədlərdə də üstünlük bizim tərəfdədir. Demək olar ki, vacib strateji yüksəkliklərə nəzarəti ələ keçirməyimiz bütün əməliyyat şəraitinə nəzarət etməyimizi təmin edir. Təbiidir ki, bütün bunlar Ermənistanı narahat edir. Ancaq Prezidentin də ifadə etdiyi kimi, biz harada lazımdırsa orada da durmuşuq. Ermənistan sərhədləri dəqiqləşdirməkdən boyun qaçırsa belə, Azərbaycan əsgəri öz işindədir”.
Məhəmmədəli QƏRİBLİ
