Prezident İlham Əliyev şəhid ailələri və Qarabağ qaziləri ilə görüşündə deyib ki, torpaqlarımızı vaxtında azad etdik, müharibəni vaxtında dayandırdıq və tarixi Zəfərə çatdıq:
"İkinci Qarabağ müharibəsi tarixdə əbədi qalacaq. Azərbaycan xalqının çoxəsrlik tarixində buna oxşar parlaq və tam Qələbə olmamışdır. Biz 300-dən çox şəhəri, kəndi, qəsəbəni döyüş meydanında işğalçılardan azad etdik. İşğalçıları məcbur etdik ki, onlar kapitulyasiya aktını imzalayaraq digər rayonlardan öz xoşları ilə çıxsınlar. Halbuki, müharibənin ilk günlərindən mən deyirdim ki, Ermənistan rəhbərliyi bizə tarix verməlidir nə vaxt bizim torpaqlarımızdan çıxır və biz müharibəni dayandırmağa hazırıq. Belə də oldu. Noyabrın 9-da Ermənistan artıq kapitulyasiya aktını imzalamağa hazır olmuşdur. Ağdam, Kəlbəcər, Laçın rayonlarının bizə qaytarılması tarixi müəyyən olunmuşdur. Noyabrın 10-na keçən gecə isə Ermənistan kapitulyasiya aktını imzaladı və müharibə dayandı. Müharibənin bizim tərəfimizdən dayandırılması da tamamilə əsaslı bir addım idi. Çünki müharibə davam etsəydi, birincisi biz daha çox itkilər verəcəkdik. Müharibə davam etsəydi, Kəlbəcər və Laçın rayonlarının azad edilməsi müəyyən çətinliklərlə üzləşə bilərdi. Çünki o bölgənin təbii iqlimi, dağları bizə problem yarada bilərdi. Bir də ki, qış başlayırdı. Eyni zamanda, Azərbaycan müharibəni müharibə qanunları ilə aparırdı. Biz, ermənilərdən fərqli olaraq, hərbi cinayət törətməmişik, etnik təmizləmə siyasəti aparmamışıq. Bu, bir daha xalqımızın böyüklüyünü, siyasətimizin müdrikliyini göstərir. Ona görə biz hər şeyi vaxtında etdik, hər şeyi vaxtında. Torpaqlarımızı vaxtında azad etdik, müharibəni vaxtında dayandırdıq və tarixi Zəfərə çatdıq. Bir neçə gün bundan əvvəl dediyim kimi, ermənilərin bütün miflərini darmadağın etdik. Bu gün Ermənistan artıq açıq etiraf edir ki, öz təhlükəsizliyini özü təmin edə bilmir, öz sərhədlərini özü qoruya bilmir, öz hesabına yaşaya bilmir. Belə olan halda müstəqillikdən söhbət gedə bilməz. Ermənistanı müstəqil ölkə adlandırmaq tamamilə əsassızdır. Çünki müstəqil ölkəyə xas olan əlamətlərin mütləq əksəriyyəti Ermənistan dövlətində yoxdur. Bunun da səbəbi onların işğalçılıq siyasətidir. Əgər vaxtında mənim sözlərimə əməl edib torpaqlarımızdan çıxsaydılar, belə bir rəzil vəziyyətə düşməzdilər. Nəticədə yenə də mənim sözlərimə əməl etməli oldular. Mən deyirdim ki, bizim torpağımızdan rədd olmalısınız. Rədd oldular. Nəticədə mən deyən oldu, amma vaxt itirdilər. Bu gün Ermənistan nə gündədir, hər kəs bunu görür. Əlbəttə, acı məğlubiyyətin şokunu onlar hələ uzun illər yaşayacaqlar. Biz isə bundan sonra qalib ölkə, müzəffər xalq kimi yaşayacağıq, qürurla yaşayacağıq. Öz gələcəyimizi özümüz quracağıq, azad edilmiş torpaqları bərpa edəcəyik. Şəhidlərimizin xatirəsini daim qəlbimizdə yaşadacağıq".
Göründüyü kimi, ölkə başçısı müharibəni vaxtında dayandırmağımızı qeyd edir və bunun bir neçə parametrlərlə izahını verir. Müharibəni vaxtında saxlamasaydıq daha nələr ola bilərdi?
Politoloq Qabil Hüseynli “Bakı-Xəbər”ə bildirdi ki, Prezident diplomatik etiketi gözləyərək bir çox həqiqətləri açıb deməyə lüzum görmür: “Biz bu yöndə öz mülahizə və ehtimallarımızı irəli sürə bilərik. Müharibənin dayandırılmasının əsas səbəbkarı Rusiya oldu. Rusiya açıqca xəbərdarlıq etmişdi ki, müharibə dayandırılmasa biz həmin ölkənin ordusunun açıq təcavüzü ilə baş-başa qala bilərik. Şimaldan 62-ci ordunun, Ermənistandakı 102-ci briqadanın, Erebunidəki hərbi aviyasiyanın bizə hücuma keçdiyinin şahidi ola bilərdik. Türkiyənin proseslərdə qismən iştirak etdiyini nəzərə alsaq belə, biz çox pis vəziyyətlə üzləşə bilərdik. Biz Rusiyanı yalnız müharibəni lazımi anda saxlamqla neytrallaşdıra bildik. Azərbaycan ordusunun əsas hədəfi Şuşa və Xankəndiydi. Biz Şuşanı alandan sonra Xankəndidə heç adam qalmamışdı. Azərbaycan ordusu çox asanlıqla Xankəndini ələ keçirə bilərdi. Bunun da nəticəsində ermənilərin 30 minlik ordusu mühasirədə qalacaqdı. Rusiya özünün forpostunu bu səviyyədə müdafiəsiz qoymazdı. Müharibə dayanmayacağı təqdirdə bizi Gürcüstandan da pis vəziyyətə sala biləcəkləri ilə bağlı təhdidlər eşidilirdi. Bütün bu təhdidlər real idi. Çünki biz Birinci Pyotrdan indiyə qədər Rusiyanın Ermənistana olan münasibətini gözəl bilirik. Bu dılğır, bir ovuc toplum hər zaman başqasının səsi ilə banlayıb. İndiki müharibədə Ermənistanı tam məhvdən Rusiya xilas etdi. Atəşkəs prosesində biz 3 strateji və çətin relyefi olan rayonu bir güllə belə atmadan geri götürdük. Hamı bilməlidir ki, Ermənistanın arxasında birmənalı olaraq Rusiya dayanır. Müharibəni vaxtında saxlamasaydıq, Rusiyanın birbaşa hərbi müdaxiləsilə üzləşə bilərdik. Bunun də nəticəsində bölgə əsl qan çəlləyinə çevrilmiş olardı. Hesab edirəm ki, bundan sonrakı geopolitik vəziyyət bizim xeyrimizə dəyişəcək”.
Məhəmmədəli QƏRİBLİ
