“Əgər 1990-cı illərin əvvəllərində Ermənistan bu qanunsuz məskunlaşmanı gizlin şəkildə edirdisə, son vaxtlar o qədər azğınlaşmışdılar ki, bunu açıq şəkildə edirdilər”.
Bu barədə Prezident İlham Əliyev şəhid ailələri və Qarabağ qaziləri ilə görüşündə bildirib.
Ölkə başçısının sözlərinə görə, müharibəyə qədər işğal dövründə Ermənistan tərəfi o vaxt işğal edilmiş torpaqlara heç kimi buraxmırdı: “Eyni zamanda, bu məsələ ilə məşğul olan vasitəçilər də oraya getməyə o qədər can atmırdılar. Halbuki qanunsuz məskunlaşma hərbi cinayət sayılır. Əgər 1990-cı illərin əvvəllərində Ermənistan bu qanunsuz məskunlaşmanı gizlin şəkildə edirdisə, son vaxtlar o qədər azğınlaşmışdılar ki, bunu açıq şəkildə edirdilər. İndi yada salmaq lazımdır, müharibədən əvvəl onların televiziyalarında hansı reportajlar gedirdi. Xaricdən - Suriyadan, Livandan gəlmiş ermənilər Şuşa şəhərində müsahibələr verirdilər. Deyirdilər ki, bəli, biz gəlmişik buraya. Bura Ermənistan torpağıdır. Biz burada yaşayırıq. Bunları təbliğ edirdi, hərbi cinayəti təbliğ edirdi. Onlara bizdən başqa söz deyən yox idi. Minsk qrupu onlara bir söz demirdi”.
Görünən odur ki, böyük dövlətlər Ermənistanın qanunsuz məskunlama siyasətinə bilərəkdən göz yumublar.
“ATƏT-Minsk Qrupunun həmsədrləri 30 ildə ermənilər tərəfindən tamamilə dağıdılmış minlərlə...”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyevin sözlərinə görə, son 30 ildə Ermənistan dövləti Azərbaycanın işğala məruz qoyduğu ərazilərində heç bir beynəlxalq hüququn təməl prinsiplərinə məhəl qoymayıb: “Ermənilər beynəlxalq qanunları heçə sayaraq, ona arxa duran insan hüquqlarını "əlində bayraq edən" dövlətlərin himayəsi ilə sözün həqiqi mənasında yerlə yeksan ediblər. Baxın, Ermənistan dövləti müharibə qanunları haqqında beynəlxalq qanunların heç birinə məhəl qoymadan bütün dünyanın gözü qarşısında insanlığa qarşı ən ağır cinayətləri törətdi. Bu cinayətlərə susqunluq göstərən dövlətlər hər addımda dünyada insan haqlarından, mədəni irsin qorunmasından ağızdolusu danışmaqdadırlar. Buradan belə bir nəticəyə gəlirik ki, beynəlxalq hüquq normaları bəzən siyasətin güdazına gedərək adi kağız parçasına çevrilir. ATƏT-in Minsk Qrupunun həmsədrləri 30 ildə ermənilər tərəfindən tamamilə dağıdılmış minlərlə yaşayış məskəni haqqında bir dəfə də olsun həyəcan təbili çalmadı. Bu ağrını, acını xalqımız və dövlətimiz öz içində çəkdi. Ermənilər tərəfindən qanunsuz məskunlaşmaya göz yumuldu. Sərvətlərimiz yağmalandı, "görmədilər". Maddi mədəniyyət abilərimizi məhv etdilər, nə "gördülər, nə də eşitdilər". Budurmu bütün dünya dövlətləri tərəfindən tanınan beynəlxalq hüquq normaları? Belə münasibət dünyamıza heç bir yaxşı gələcək vəd etmir. Dəyər şkalası kəmiyyət tanımır. İstər bir dini abidə qəsdən dağıdılsın, istərsə beşi, bunun adı beynəlxalq cinayətdir. Əgər bu cinayətlər cəzasız qalarsa, dünya gələcək nəsillərə mədəni irsini daşıya bilməyəcək. Ona görə Ermənistanın beynəlxalq məhkəmələrə verilməsi mütləqdir. Biz Zəfər qazandığımız kimi, erməni cinayətlərini beynəlxalq məhkəmələrə daşımaqla ədaləti təmin etmiş olacağıq”.
Partiya sədri onu da qeyd etdi ki, belə nümunələr bəşəriyyətin sülh və əminamanlıqla yaşamasını şərtləndirən əsas amillərdən biri olmalıdır.
Vidadi ORDAHALLI
