“Ermənistan rəhbərliyi bütün müsəlman aləmini təhqir edib”. Bunu Prezident İlham Əliyev şəhid ailələri və Qarabağ qaziləri ilə görüşündə deyib.
Dövlət başçısı həmçinin qeyd edib ki, bütün dünya erməni vəhşiliyini görür: “Görür ki, ermənilər bizim məscidlərimizi dağıdıblar, 60-dan çox məscid dağıdılıb. Ermənilər bizim məscidlərimizdə inək, donuz saxlayıblar. Bu, bütün müsəlman aləminə təhqirdir. Bir daha sizin qarşınızda bütün müsəlman ölkələrinin rəhbərlərinə üz tutaraq deyirəm, bunu heç vaxt unutmayın, buna göz yummayın, görməzliyə vurmayın. Ermənistan rəhbərliyi bütün müsəlman aləmini təhqir edib. Qəbirləri dağıdan da, qəbir daşlarının üzünü silərək satan da ermənidir, ölülərin qızıl dişlərini çıxardan da ermənidir, məscidlərimizi sökən də ermənidir, evlərimizi kərpic-kərpic söküb öz daxmasına daşıyan da ermənidir. Bunu hər kəs görür və görməlidir. Biz azad edilmiş torpaqlara xarici qonaqları, jurnalistləri, siyasətçiləri, ictimai xadimləri müntəzəm olaraq gətiririk ki, görsünlər və bilsinlər, biz təkcə öz ərazimizi işğaldan azad etməmişik, biz bölgəni erməni faşizmindən azad etmişik”.
Azərbaycan Prezidenti bir daha Ermənistanla “cici-bacı” olan bəzi islam dövlətlərinə vacib bir mesaj verdi ki, islam dinini təhqir edən Ermənistandan sizə dost olmaz, düşməninizi tanıyın.
“Prezidentin mesajları Ermənistanla “can bir qəlbdə” olan müsəlman ölkələrinin bu ölkəyə qarşı münasibətlərini dəyişməsinə əsas olacaq”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli təəssüflə bildirdi ki, Ermənistanın bizim torpaqları 30 il işğalda saxlamasına dəstək olanlar arasında xristian dövlətləri ilə yanaşı, bəzi müsəlman dövlətləri də olub. F.Ələkbərlinin sözlərinə görə, ərazilərimizin dağıdılmasında, məscidlərimizin, ibadət yerlərimizin, bir sözlə, Qarabağda müsəlman abidələrinin təhqir edilməsində, aşağılanmasında, heyvan saxlanan yerə çevrilməsində Rusiya, Fransa, eləcə də başqa Ermənistana havadarlıq edən, dayaq duran ölkələrin sırasında məlum müsəlman dövlətlərinin də olması acınacaqlı haldır. Bu məsələdə bəzi xristian dövlətləri Ermənistana xristian həmrəyliyi göstərsə də, bəzi müsəlman dövlətlərindən islam həmrəyliyi görmədiyimizi deyən F.Ələkbərli hesab edir ki, bu ölkələr bütün islam dünyasını təhqir edən Ermənistana dayaq olmaqla onunla bu məsuliyyəti də bölüşür. “Bəzi müsəlman ölkələrinin Ermənistandan əl çəkməməsi həqiqətən də təəssüf doğurur. Prezident İlham Əliyev dəfələrlə bu məsələni vurğulayıb və müsəlman dünyasına vacib mesajlar göndərib ki, torpaqlarımız işğalda olduğu dövrdə bizim bütün abidələrimiz dağıdılıb, məscidlərimiz təhqir olunub, dini ibadət yerlərimiz murdarlanıb. Bizim məscidlərin, dini ibadət yerlərinin təhqir olunmasında hətta bəzi müsəlman dövlətləri də Ermənistana dəstək olub, prosesdə yaxından iştirak ediblər. Biz bunu İran İslam Respublikasının timsalında deyə bilərik, hətta bu məsələdə Birləşmiş Ərəb Əmirliklərinin də adı çəkilir. Amma ən çox təəssüf doğuran Azərbaycan Respublikasının faktiki qonşusu olan, eyni dinə, hətta eynu məzhəbə yaxın olduğumuz İran İslam rejiminin davranışlarıdır. Baxmayaraq ki, orada 40 milyona yaxın Azərbaycan türkü yaşayır, bizi başqa faktorlar da birləşdirir, amma İran İslam rejimi həm Birinci Qarabağ müharibəsində, həm də İkinci Qarabağ müharibəsində bu və ya digər mənada Ermənistana, terrorçulara dəstək verib. Üstəlik də, işğal dövründə dini abidələrimizin təhqir edilməsinə nəinki göz yumublar, hətta bu prosesdə onlar da iştirak ediblər. Bu bir gerçəklikdir ki, dini abidələrimizi də, islam dinini də təhqir edən Ermənistanla bəzi müsəlman dövlətlərinin ən yüksək səviyyədə münasibət qurması, “can bir qəlbdə” olması qəbuledilməzdir. Prezident İlham Əliyevin bu mesajından müsəlman abidələrini, islam dinini təhqir edən Ermənisanla bir sırada dayanan müsəlman ölkələri, nəhayət ki, nəticə çıxarmağa tələsməlidir. İnanmıram ki, İran İslam rejimi bundan nəticə çıxaracaq, amma başqa müsəlman ölkələrinin daha çox nəticə çıxaracağına ümid edirəm. İstənilən halda, Prezidentin mesajları Ermənistanla “can bir qəlbdə” olan müsəlman ölkələrinin bu ölkəyə qarşı münasibətlərini dəyişməsinə əsas olacaq”.
F.Ələkbərlinin sözlərinə görə, Prezidentin bu mesajlarının konkret hansı müsəlman ölkələrinə və nə üçün yönəldiyi məlumdur. Alimin bildirdiyinə görə, 44 günlük müharibə dövründə hansı müsəlman ölkələrinin Azərbaycana necə münasibət göstərdiyi üzə çıxdı, əslində onların münasibətləri əvvəldən də gizlin deyildi, aşkar idi. Müharibə dövründə Azərbaycanın yanında birmənalı olaraq qardaş Türkiyənin, Pakistanın dayandığını xüsusi qeyd edən F.Ələkbərli dedi ki, bəzi müsəlman ölkələri isə buna əks mövqe nümayiş etdirdi, Prezidentin sözü də belələrinədir.
İradə SARIYEVA
