Ermənilər Qarabağın onlar yaşayan hissəsində mobil rabitənin işləmədiyindən şikayət edirlər. Söhbət Ermənistana aid olan və Qarabağda icazəsiz fəaliyyət göstərən mobil rabitədən gedir. Ermənilər sosial şəbəkələrdə bu yöndə müzakirələr aparır və iddia edirlər ki, mobil rabitə siqnallarını blokalayan Azərbaycan tərəfidir.
Məsələn, “odnoklassniki” sosial şəbəkəsinin Anait Xaçatryan adlı istifadəçisi Qərbi Azərbaycanın Ellər rayon mərkəzindən (Ermənilər ora “Abovyan” deyir) yazır ki, bir neçə gündür Qarabağdakı qohumları ilə əlaqə saxlaya bilmir: “Ya onlara zəng çatmır, ya da dərhal itir. SMS göndərəndə də eyni şey olur”. Ona cavab verən İrəvan sakini Alina Qriqoryan (Alina Grigoryan) həm faktı təsdiqləyir, həm də qardaşının Rusiya sülhməramlılarının müvəqqəti nəzarətindəki Azərbaycan ərazilərində qanunsuz hərbi xidmətdə olmasını: “İki gün əvvəl Laçın-Şuşa yolu ilə qardaşımın yanına gedirdik, birdən rabitə itdi. Sonra naviqator da işləmədi. Qardaşım dedi ki, artıq bir həftədir rabitə ilə bağlı belə problem ortaya çıxıb”.
“Aram Avagyan” adlı başqa bir istifadəçi isə əlavə edir ki, sonuncu müharibə zamanı da rabitənin bu cür çökdürülməsi müşahidə olunurdu. Ermənilərin çoxunun yazdıqlarından belə anlaşılır ki, Ağdərədə, Şuşa ətrafında, Xocavənddə, hətta Xankəndidə analoji vəziyyət hökm sürür.
Ermənilərin bu narahatlığını nə dərəcədə əsaslı saymaq olar?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Azərbaycan öz ərazisində qanunsuz fəaliyyət göstərən erməni mobil operatorlarını bloklamaq hüququna malikdir: “Əgər bu, erməniləri narahat edirsə, qoy, Azərbaycan vətəndaşlığını qəbul edib, bizim mobil operatorların xidmətindən yararlansınlar. Bir neçə gün əvvəl isə ermənilər belə məlumat yaydılar ki, güya Azərbaycan onların daxilindəki danışıqları dinləyir. Qeyd edək ki, işğal olunmuş ərazilər azad edildikdən sonra Azərbaycan ordusu qondarma rejimin telekommunikasiya operatoru olan "Karabakh Telekom"un qüllələrini ələ keçirib. "Karabakh Telekom" isə, faktiki olaraq, Ermənistanın "ArmenTel" mobil operatorunun əlavəsidir. Erməni mətbuatı yazır ki, azərbaycanlılar "Karabakh Telekom"un serverlərinin ehtiyat nüsxələrini ələ keçirərək Ermənistanın mobil şəbəkəsinə daxil olub. Azərbaycanın müvafiq qurumlarının icazəsi və rəsmi qeydiyyat olmadan, lisenziyasız fəaliyyət göstərən qanunsuz bir qurumun fəaliyyətinə elə Azərbaycanın müvafiq qurumlarının hər hansı bir müdaxiləsi olmuş olsa belə, bu tamamilə qanuni bir məsələdir. Mobil operatorların birbaşa funksiyalarından əlavə, onlardan hərbi şəraitdə daha hansı istiqamətlər üzrə istifadə edilə bilməsi haqqında məncə əlavə nələrsə söyləməyə ehtiyac yoxdur. Mən hesab edirəm ki, Ermənistanın daxilində bizim kibercinayətkarlıq törətməyimizlə bağlı fikirlər ermənilərin növbəti dezinformasiyasıdır. Ancaq Qarabağ bizim ərazimiz olduğu üçün, oradakı tezliklər, hava və quru məkanı da bizə aiddir. Həmin ərazidə ermənilər Ermənistanın mobil rabitəsindən niyə istifadə etməlidir? Ancaq bütün bunlar heç də o demək deyil ki, ermənilərin dediyi doğrudur. Ola bilər ki, onların mobil rabitəsi normal işləyir. Belədirsə, Azərbaycan bütün imkanlarından istifadə edib, onu bloklamalıdır”
Məhəmmədəli QƏRİBLİ
