Məlum olduğu kimi, Ermənistan ötən il 44 günlük müharibədə ciddi məğlubiyyətlə üzləşsə də, Qarabağın statusu ilə bağlı əvvəlki cəfəng iddialarından əl çəkmir. Hələ də Nikol Paşinyan hakimiyyəti müxtəlif səviyyələrdə bu məsələni gündəmə gətirməyə çalışır. Yeri gəldi-gəlmədi, statusdan danışırlar.
Ancaq artıq Rusiyada ən qatı ermənipərəst şəxslər də açıq bəyan etməyə başlayıblar ki, Azərbaycan heç vaxt Qarabağla bağlı ermənilərin tələb etdiyi statusa razı olmayacaq. Bunun mümkünsüz olduğunu etiraf edirlər. Bu baxımdan Rusiyanın birinci dərəcəli dövlət müşaviri, “Regnum” xəbər agentliyinin baş redaktoru, “Lazarev” klubunun üzvü Modest Kolerovun açıqlamaları diqqət çəkir. M. Kolerov bəyan edib ki, sözügedən məsələ ilə bağlı kimsə özünü aldatmasın, Azərbaycan buna razı olmayacaq: “Birincisi, Minsk Qrupu öz işini yalnız ATƏT-in qərarı ilə dayandıra bilər. İkincisi, ikitərəfli münaqişənin hər bir tənzimləməsi yalnız 2 tərəfin icazəsi ilə mümkündür. Bildiyiniz kimi, Azərbaycan Minsk Qrupunun fəaliyyətinin zəruriliyini rədd edir. Bu bəyanatlar Azərbaycanın Minsk Qrupuna qarşı mənfi münasibətini izah edir. Çünki Azərbaycan hesab edir ki, Qarabağ məsələsi həll olunub. Ona görə də Ermənistan hakimiyyəti aydınlaşdırmalıdır ki, Qarabağın statusunu necə təsəvvür edirlər, Azərbaycanın tərkibində, yoxsa ondan kənarda? Əgər söhbət Azərbaycan tərkibindən kənarda olan statusdan gedirsə, Azərbaycan bunu heç vaxt müzakirə etməyəcək. Yox, söhbət Azərbaycan tərkibində statusdan gedirsə, Azərbaycan çox güman ki, müzakirələrə qoşulacaq”.
Görünən odur ki, ən qatı ermənipərəst ekspertlər də Qarabağla bağlı əvvəlki status-kvonu geri qaytarmağın mümkün olmadığının fərqindədilər.
“Azərbaycan qalib tərəf olduğuna görə, ermənipərəst ekspertlər bununla barışmalı olublar”
Sözügedən məsələ ilə bağlı fikirlərini “Bakı-Xəbər”lə bölüşən sabiq diplomat, politoloq Fikrət Sadıqovun fikrincə, belə bir etirafın səslənməsi təsadüfi deyil: “Çünki bu reallıqlara söykənir. Azərbaycan güc yolu ilə ərazilərini azad edibsə, buna görə qan tökülübsə, hansı statusdan söhbət gedə bilər? 30 il işğal altında olan əraziləri biz danışıq yolu ilə yox, güc yolu ilə azad etmişik. Azərbaycan qalib tərəf olduğuna görə, ermənipərəst ekspertlər bununla barışmalı olublar. Yoxsa M. Kolerov heç vaxt belə etirafla çıxış etməzdi. Onun necə ermənipərəst bir şəxs olması çoxlarına məlumdur. O üzdən, Qarabağın status məsələsi tarixdə qaldı. Danışıqlar dövründə Azərbaycan tərəfi ermənilərə ən yüksək status təklif etdi, amma onlar bunu qəbul etmədilər. Bizi ələ salmağa başladılar. Bildirdilər ki, Azərbaycan tərkibində heç bir statusdan söhbət gedə bilməz. Təbii ki, Azərbaycan bununla razılaşa bilməzdi. Biz səbrlə hazırlaşıb, bəlli bir məqam yetişəndə öz ərazi bütövlüyümüzü bərpa etdik. Bu isə o deməkdir ki, ermənilərə bir daha onların istədikləri status verilməyəcək. Bundan sonra hansısa statusdan danışmaq gülünc və cəfəngdir. Ermənilər orada yaşamaq istəyirlərsə, Azərbaycanın qanunlarını qəbul etməlidilər. Qəbul etmirlərsə, o zaman Qarabağı tərk etsinlər. Yoxsa başqa alternativlərdən söhbət gedə bilməz”.
Politoloq hesab edir ki, Azərbaycan döyüşü udduğu üçün qarşı tərəf bununla hesablaşmalıdır.
Vidadi ORDAHALLI
