Rusiyanın “Zvezda” telekanalının verdiyi məlumata görə, Rusiya “Armiya-21” forumunda iştirak edən bir sıra dövlətlərlə, o cümlədən Ermənistanla hərbi-texniki əməkdaşlıq haqqında müqavilə imzalayıb. Bu barədə telekanala müsahibəsində hərbi-texniki əməkdaşlıq üzrə Federal Xidmətin direktoru Dmitri Şuqayev məlumat verib.
Ermənistan tərəfin daha çox AK-12 avtomatları ilə maraqlandığını qeyd edən xidmət direktoru əvvəllər də bu silahların Ermənistan tərəfdən alındığını vurğulayıb. Rusiyanın Ermənistana silah satdığı, hətta hədiyyə etdiyinə dair məlumatlar var. Azərbaycan rəhbərliyi bir neçə dəfə açıq formada buna etiraz edib. Rusiya bu addımlarını kommersiya maraqları ilə izah edib. Bu dəfə isə diqqəti yayındırmaq üçün kiçik çaplı silah müqavilələri barədə danışırlar. Rusiya Ermənistana yalnız AK-12 avtomatları satır (verir-red), yoxsa…
Hərbi-siyasi ekspert Ramil Məmmədli “Bakı-Xəbər”ə bildirdi ki, AK-12 avtomatları tam yeni silah sayılmır: “Ermənistan uzun illərdi ki, atıcı silahlar adı ilə orta mənzilli raket-artilleriya sistemləri əldə edib. Bununla həm Rusiya, həm də Ermənistanı diqqət yayındırır. Bəllidir ki, Ermənistan ordusu müharibədən sonra atıcı silahlarının böyük hissəsini itirib. Onların yerini doldurmağa da çalışacaq. Ümumiyyətlə, Ermənistanın yenidən silahlanması yeni gərginliyin yaranmasına gətirib çıxara bilər. Ermənistan bu addımları ilə revanşist fikirlərindən əl çəkmədiyini sübut edir. Ermənistan həmin sərgidə yalnız avtomat əldə etmir. Qarabağ müharibəsində sarsıdıcı məğlubiyyətə uğrayan Ermənistan yenidən sürətlə silahlanmaq yolunu tutub. Moskvada keçirilən “Armiya-2021" beynəlxalq hərbi-texniki əməkdaşlıq forumunda Ermənistan Rusiyanın müasir silahlarına maraq göstərib. Müdaiə naziri Arşak Karapetyan AK-12 avtomatları ilə yanaşı, "Forpost" zərbə və kəşfiyyat dronlarının və s. alınmasına dair danışıqlar aparıb. Ermənistan ordusunda aparılan islahatlara dəstək çərçivəsində Moskvanın rəsmi İrəvana 100 milyon dollarlıq kredit ayırdığı da bildirilir. Görünən budur ki, Rusiya Ermənistanın sonuncu Qarabağ müharibəsindən sonra darmadağın olunmuş hərbi potensialını bərpa etməkdə maraqlıdır. Bir neçə gün əvvəl Ermənistan Təhlükəsizlik Şurasının katibi Armen Qriqoryan da maraqlı etiraf etdi. O bəyan edib ki, 44 günlük müharibədən sonra da Rusiya İrəvana silah tədarük edib və proses hazırda davam edir. Qriqoryan İctimai Televiziyaya müsahibəsində deyib ki, keçən ilin noyabrından arsenalımızın modernləşdirilməsi və yenilənməsi üçün silah aldıq. Təhlükəsizlik Şurası katibinin sözlərinə görə, Ermənistan hökuməti ordunu tamamilə modernləşdirmək niyyətindədir. O, bu vəzifənin ən qısa zamanda həll ediləcəyinə əminliyini ifadə edib. Söhbət Ermənistan müdafiə naziri Arşak Karapetyanı Moskvada qəbul edən Rusiya müdafiə naziri Sergey Şoyqunun “Ermənistana silah tədarükü başlandı” açıqlamasından gedir. Şoyqunun açıqlamasından sonra baş verənlər Rusiya silahlarının Ermənistana verilməsi prosesinin artıq başlandığını deməyə əsas verir. Ardınca Rusiya Xarici İşlər Nazirliyinin rəsmi nümayəndəsi Mariya Zaxarova “Ermənistanı silahlandırmaq bizim suveren hüququmuzdur” tipli açıqlama da verdi. Azərbaycan Rusiyanın suveren hüquqlarına qarşı deyil, amma söhbət Ermənistanın silahlandırılmasından gedirsə, bu artıq Moskvanın hüququndan çox bütün regionun təhlükəsizlik məsələsidir. Bu, siyahının kiçik bir hissəsidir. Göründüyü kimi, Rusiya dağılmış erməni ordusunu yenidən qurmaq adı altında Ermənistanı yenidən silahlandırır və bu, həm regionun təhlükəsizliyini, həm Moskvanın vasitəçilik missiyasını, həm də Ermənistanın özünü risq altına atır”.
Məhəmmədəli QƏRİBLİ
