Azərbaycan hərbçiləri dövlətlərarası Gorus-Qafan yolunu bağlayıb. Belə bir açıqlama ilə Ermənistanın Milli Təhlükəsizlik Xidməti çıxış edib. Ermənistan tərəfi yolun açılması üçün işlərin davam etdirildiyini açıqlayıb və öz vətəndaşlarını yalnız rəsmi məlumatlara inanmağa çağırıb. Sözügedən yolda hərəkət tam dayanıb.
Ermənistan Milli Təhlükəsizlik Xidmətinin məlumatına görə də, avqustun 25-i saat 23:00 radələrində Qafan-Gorus avtomobil yolunun Dərbənd-Şurnux ərazisindən keçən hissəsi bağlanıb və nəqliyyat vasitələri təxliyə edilib. Məlumatda o da qeyd olunur ki, Rusiya sülhməramlılarının iştirakı ilə aparılan danışıqlar nəticəsində mülki nəqliyyat vasitələrinin keçməsinə icazə verilib, lakin yol bağlı saxlanılır. Ekspertlər bütün bunları təsadüf hesab etmir. Belə hesab edilir ki, Azərbaycan artıq Ermənistana yeni təsir və təzyiq mexanizmlərini işə salıb. Məsələ burasındadır ki, Ermənistanda mövcud hakimiyyətin fəaliyyəti rəsmi İrəvanın hələ də Azərbaycanla sülh müqaviləsi imzalanması niyyətindən uzaq olduğunu nümayiş etdirir. Ermənistanın daha bir qeyri-konstruktivliyi sərhədlərin delimitasiya və demarkasiyası məsələsində özünü göstərir. Azərbaycanın sərhədlərin müəyyən edilməsi məsələsində sırf beynəlxalq hüquq normaları çərçivəsində hərəkət etdiyini dünya ictimaiyyəti qəbul edir. Məhz bu səbəbdən Ermənistanın sərhəd iddialarına rəsmi İrəvanın istədiyi şəkildə hər hansı ciddi beynəlxalq reaksiya verilmir. Bu fonda, ekspertlərin fikrincə, Ermənistan da konstruktiv davranmalı, beynəlxalq hüquq əsasında Azərbaycanla sərhədlərin delimitasiya və demarkasiyasına başlamalıdır. Lakin İrəvan bunu etmir. Əvəzində Ermənistan silahlı qüvvələri sərhəddə və Rusiya sülhməramlılarının müvəqqəti yerləşdirildiyi Azərbaycan ərazisində atəşkəsi pozmaqda davam edir.
Elə bu səbəbdən Azərbaycan Ermənistana qarşı təzyiq mexanizmlərini işə salıb. Özü də bu təzyiq mexanizmlərinin sayı heç də az deyil. Hesab edilir ki, Azərbaycanın əlində olan daha bir mühüm vasitə Laçın dəhlizinin bağlanması, Rusiya sülhməramlılarının bölgədən çıxarılmasıdır. Azərbaycanın keçmiş xarici işlər naziri Tofiq Zülfüqarov bu xüsusda bildirir: “Azərbaycan tərəfindən güclü təzyiq var. Bunun nəticəsidir ki, Rusiya mətbuatında Azərbaycana qarşı güclü təxribatlar baş verir. Yəni ermənipərəst qüvvələr bəyanatlar verirlər və sair. Hələlik Azərbaycan tərəfindən təzyiq güclənməkdədir. Azərbaycan israrlıdır ki, Zəngəzur dəhlizi öz həllini tapsın. Dəhlizin açılması bizim üçün prinsipial olaraq vacib məsələdir. Ermənilər bundan imtina etsələr, hesab edirəm ki, Laşın dəhlizinin vaxtından əvvəl geri alınması məsələsi gündəmə gələcək. Laçın dəhlizi müddətli, Zəngəzur isə müddətsizdir. Yəni biz bu müddətdən əvvəl Laçın dəhlizinə nəzarətimizi bərpa edə bilərik. Qarabağda isə həmin ermənilər qalacaqlar ki, onlar Azərbaycan vətəndaşlığını qəbul edəcəklər. Digərləri isə, rus sülhməramlılarına rəğmən, qaçacaqlar. Qısa müddətdə bunun şahidi olacağıq. Su yoxdur, işıqlar sönür və sair. Müəyyən hadisələr baş verir ki, bunun nəticəsində orada yaşayanlar qaçırlar. Həm də onu görürlər ki, Azərbaycan ciddi şəkildə azad olunmuş ərazilərə qayıtmağa hazırlaşır. Görülən işlərin miqyasını görəndə başa düşürlər ki, onların orada gələcəkləri yoxdur”.
Təbii ki, bütün bunları Ermənistanda da sezirlər. Azərbaycanla sərhəddə və rus sülhməramlılarının nəzarəti altında olan ərazilərə, o cümlədən Laçın dəhlizinə yaxın yaşayan ermənilərin dəhlizin bağlanması barədə son günlərdə narahatlıq ifadə etməsi də bununla əlaqədardır. Hərbi ekspert Ədalət Verdiyev məsələ ilə bağlı bildirir: “Hazırda ən yaxın məsafədən, Laçın dəhlizindən Xankəndi yaxınlığında yerləşən Şuşanın kəndlərinə qədər ərazilərdə baş verən hadisələri vizual olaraq izləyə bilirik. İndi isə müşahidə və nəzarət fəaliyyətləri həm dəhlizin başladığı ərazi, həm də Xankəndi istiqamətində yerləşən Şuşanın Qaybalı və Xəlfəli kəndlərinə qədər ərazilərdə genişləndirilib. Bu ərazilərdə olan mövqelərimiz rusların nəzarətində olan həm Laçın dəhlizinin, həm də Şuşa -Xankəndi yolunun detallı bir şəkildə izlənilməsini təmin edir. Xəlfəli kəndindən Xankəndiyə çəkilən su xətti yaxınlığındakı yüksəklikdə Bayrağımız da dalğalanır. 14 km-lik Şuşa-Xankəndi yolunun 7 km-lik ərazisində əsgərlərimiz xidməti vəzifələrini yerini yetirir. Mövqelərin mühəndis təminatı davam edir. Dəhliz və rusların nəzarətində olan ərazilərimizin on kilometrlərlə dərinliyi müşahidə məntəqələrinin və bu məntəqələrdə olan müxtəlif vasitələrin, o cümlədən elektron optik və digər termal texniki vasitələrin köməyi ilə 24 saat müşahidə altında saxlanılır. Baş verən proseslər Azərbaycan ordusunun məqsədlərinə doğru inamla irəlilədiyini göstərir”. Bütün bunlar Azərbaycanın Ermənistan üzərində üstünlüyünü bir daha təsdiq edir. İndi belə vəziyyətdə Ermənistan ya Azərbaycanla razılığa gəlməli, ya da daha böyük təzyiqlərlə üzləşməyə hazır olmalıdır. Azərbaycan seçim üçün indiyə qədər Ermənistana kifayət qədər vaxt verib. İrəvan yaxın tezlikdə müvafiq addımlar atmasa, daha böyük itkilərlə üzləşməli olacaq.
Samirə SƏFƏROVA
