Son günlərdə Ermənistanda parlamentin iclasları dava-dalaşsız ötüşmür. Xatırladaq ki, parlament davaları Ermənistanın baş naziri Nikol Paşinyanın rəhbərlik etdiyi hökumətin 2021-2026-cı illər üçün fəaliyyət proqramını qanunverici orqanda tədqim etməsi fonunda başlanıb.
Proqramın təqdimatı zamanı müxalif deputat, “Şərəf duyuram” fraksiyasının təmsilçisi Anna Mkrtçyan Paşinyanı kapitulyant adlandırıb. Hakimiyyətə bağlı deputatların buna sərt reaksiya verməsi ilə qarşıdurma yaranıb. Ermənistan Milli Təhlükəsizlik Xidmətinin keçmiş direktoru, “Şərəf duyuram” fraksiyasının rəhbəri Artur Vanetsyan isə Anna Mkrtçyana haqq qazandırıb: “Nikol Paşinyan kapitulyantdır. 10 noyabr gecəsi gizli şəkildə kapitulyasiya sənədi imzalayan kapitulyant deyilsə, bəs nədir?”. Vanetsyan bildirib ki, hər bir deputatın öz üslubu var və Anna Mkrtçyan nə deyirsə və ya edirsə, bu, onların fraksiyası tərəfindən razılaşdırılıb. Bütün bunların ardınca çox keçmədən parlamentdə ara yenidən qarışıb. Bu dəfə müxalif “Ermənistan” blokundan deputat Vaqe Akopyanın çıxışı zamanı hakim partiyadan deputatlar ona atmaca atıb, nəticədə əvvəl qarşılıqlı təhqirlər yağdırılıb, ardınca əlbəyaxa çəkişmə başlayıb. Ertəsi gün “Vətəndaş müqaviləsi” partiyasından deputat Ayk Sarkisyan çıxışı zamanı “Ermənistan” fraksiyasının rəhbəri, keçmiş müdafiə naziri Seyran Ohanyanı korrupsiyada və xəyanətdə ittiham edib: “Sizin vaxtınızda kim istəsə, pulunu verib ordudan yayınırdı” deyib. Buna cavab olaraq Seyran Ohanyan Ayk Sarkisyana tərəf su butulkası atıb. Dərhal iqtidardan və müxalifətdən olan başqa deputatlar da butulkalara əl atıblar və parlamentdə əsl butulka davası başlayıb. Ara qarışıb və baş nazir Nikol Paşinyanın qaynı, “Vətəndaş müqaviləsi” partiyasından deputat Qraçya Akopyan da müxalifətçi deputatların üstünə hücum çəkib. “Qraparak” qəzetinin müxbiri bu səhnəni telefonla çəkəndə Akopyan onun ünvanına küçə söyüşü söyüb. Daha sonra Paşinyanın qaynı bildirib ki, Seyran Ohanyanın Ayk Sarkisyana butulka atmasına görə özündən çıxıb: “Seyran Ohanyan butulkanı götürdü və Ayk Sarkisyana tərəf atdı. Sonra da bütün bunlar oldu. Bilin ki, bu müxalifətçilər kimlərdir”. Qraçya Akopyan Ayk Sarkisyanın dediklərini təsdiqləyib və bildirib ki, keçmiş müdafiə nazirinin vaxtında orduda korrupsiya baş alıb gedirdi. Paşinyanın qaynı onu vətən xaini adlandırıb.
Onu da qeyd edək ki, parlamentdə əlbəyaxa davalara hər dəfə mühafizə qüvvələri müdaxilə etməli olub. Ermənistan parlamentinin " Şərəf duyuram” və "Ermənistan" fraksiyaları artıq qanunverici orqanda deputatlara qarşı zorakılığı qətiyyətlə pisləyib. İki müxalifət fraksiyasının yaydığı birgə bəyanatda qeyd edilir ki, bu, qanunverici orqanın tarixində rüsvayçı hadisədir. "Hakimiyyəti təmsil edən bir qrup insanın qanunsuz göstərişlərə əməl edərək ölkənin qanunverici orqanda demokratik dəyərlərə qarşı cinayət törətdiyi günlər parlament tarixinin ən biabırçı səhifələrindən biri olacaq. Ermənistanda zorakılığın təbliğatı və nifrət atmosferinin bir mənbəyi var – Nikol Paşinyanın başçılıq etdiyi "Vətəndaş müqaviləsi" partiyası. Biz cinayət törədənlərin siyasi və hüquqi məsuliyyətə cəlb olunması işinin ardınca gedəcəyik". Ermənistanın “Armfighting” Federasiyasının prezidenti, döyüş sənətləri ustası Ayk Qukasyan isə parlamentdə hakimiyyət və müxalif fraksiya deputatları arasında əlbəyaxa davalara maraqlı münasibət bildirib: “Millət vəkilləri turnirlərə qatılmaq üçün müraciət etsələr, onları yaxşı məşq etdirəcəyik, yaxşı nəticələr əldə edə bilərlər. Amma məncə, millət vəkillərimiz üçün bu davranış qəbuledilməzdir. Onların edə biləcəyi və etməli olduğu çox iş var. İlk növbədə, ölkəmizdə əminamanlıq yaratmaq üçün nəsə etsinlər. Millət vəkilləri boks rinqini Milli Məclisə köçürmək əvəzinə, təhsilə, xüsusən də sərhəd kəndlərdəki məktəblərə diqqət ayırsınlar. Oradakı məktəblərin əksəriyyətində bədən tərbiyəsi tədris edilmir. Bəli, bu, müharibə təhlükəsi ilə üz-üzə olan ölkədə baş verir. Mən bu barədə dəfələrlə danışmışam, problem həll olunana qədər də danışacağam. Heç bir ölkə lideri ağzımı yuma bilməz. Mən heç bir siyasi tərəfi təmsil etməmişəm və etməyəcəyəm”.
Belə bir vaxtda "Joxovurd" qəzeti yazıb ki, Ermənistanın yüksək vəzifəli şəxsləri parlamentdəki konkret 4 şəxsə qarşı dözümsüzlük göstərməyi əmr edib: “Bunlar "Ermənistan" parlament fraksiyasının rəhbəri Seyran Ohanyan, Milli Məclisin vitse-spikeri İşxan Saqatelyan, Vaqe Akopyan və “Şərəf duyuram” fraksiyasından Anna Mkrtçyandır. "Vətəndaş müqaviləsi"ndən olan deputatlar Vaqe Akopyanı Zəngəzurda baş nazir Nikol Paşinyana, İşxan Saqatelyanı İrəvanda hakimiyyətə qarşı etiraz aksiyaları təşkil etməkdə ittiham edirlər. Səlahiyyətlilər İşxan Saqatelyanın bu sözlərini unutmur: "Sizə Milli Məclisdə rahatlıq verməyəcəyəm". Seyran Ohanyanı 44 günlük müharibədən sonra hakimiyyəti "tərk edib" ikinci prezident Robert Köçəryanın yanına getdiyinə görə "bağışlamırlar". Anna Mkrtçyanın bağışlanmaz səhvi isə Nikol Paşinyanı "təslimçi" adlandırmasıdır. İndi səlahiyyətlilər parlamentdə bu insanlara rahatlıq verməmək məqsədi güdür və parlament davalarında əsasən sözügedən şəxslər "Vətəndaş müqaviləsi"nin deputatları tərəfindən hücuma məruz qalır. Hakim fraksiya bütün bunları uzun müddət davam etdirəcək". Erməni ekspertlər qeyd edir ki, bu, artıq vətəndaş qarşıdurmasının parlamentdən başlanmasının təzahürüdür.
Nahid SALAYEV
