22 oktyabr tarixində İsveçrə Federal Parlamentində ən çox oxunan qəzet olan “Weltwoche”-də Azərbaycanın İsveçrədəki səfiri Xanım İbrahimovanın erməni yalanlarını ifşa edən geniş müsahibəsi dərc edilib. Qeyd etmək lazımdır ki, “Weltwoche” qəzetində ilk dəfədir ki, Azərbaycanla bağlı məqalə isveçrəli oxuyucuların diqqətinə çatdırılır.
Müsahibədə jurnalistə Paşinyanın 2018-ci ildə Ermənistanda hakimiyyətə gəlməsindən sonra Ermənistanın təxribat xarakterli fəaliyyəti barədə faktları bir-bir sadalayan səfir cari ilin iyul, avqust aylarında həm iki ölkə sərhədində, həm təmas xəttində Ermənistan tərəfindən hücum cəhdlərinin qarşısının alınması barədə məlumat verir. Habelə səfir son olaraq 27 sentyabr tarixindən başlayaraq Ermənistanın Azərbaycana qarşı başlatdığı hücumdan sonra iki ölkə arasında diplomatik danışıqlara ciddi zərbə vurulduğunu qeyd edir və indiki müharibənin səbəbkarının Paşinyan olmasını diqqətə çatdırır.
Sonra səfir X.İbrahimova BMT Təhlükəsizlik Şurası və BMT Baş Assambleyasının məlum qətnamələri barədə məlumat verərək, həmin sənədlərdə Ermənistan işğal etdiyi Azərbaycan torpaqlarından qeyd-şərtsiz çıxarılması tələblərinin olmasını vurğulayır. İşğal edilmiş ərazilərimizdə Ermənistan tərəfindən yaradılan qondarma “dağlıq qarabağ respublikası”ndan bəhs edən səfir bu qondarma rejimin, İsveçrə də daxil olmaqla, heç bir ölkə tərəfindən tanınmadığını bildirir. Həmçinin o, indiki məqamda müharibənin sülh yolu həlli yolunun Azərbaycanın ərazi bütövlüyünün təmin olmasından keçdiyini vurğulayır.
Müsahibədə, həmçinin Ermənistan tərəfindən Gəncə şəhərində mülki şəxslərə qarşı törədilən qətliam barədə məlumat verərək, bu qətliamın səbəbkarı kimi əlləri qana bulaşmış Paşinyan və Ermənistan hökumətini göstərir. Moskvada iki ölkə arasında əldə edilən humanitar atəşkəsdən sonra Gəncədə mülki əhaliyə qarşı aparılan hərbi təcavüzü pisləyən səfir beynəlxalq mətbu orqanların əksər hallarda qərəzli yanaşmalarını da qınayır. Jurnalistin “Ermənistanın Azərbaycandan ərazicə kiçik və kasıb olması” fikirlərinə də münasibət bildirən səfir, erməni diasporunun Avropada və digər regionlarda özlərini həmişə məzlum xalq kimi göstərməyə çalışdığını ifadə edir, erməni diasporunun Ermənistanın təcavüzkar ola bilməyəcəyinə dair yalanlarını ifşa edir
Müsahibədə, həmçinin, İsveçrə-Azərbaycan iqtisadi əlaqələrinə toxunulur, hazırda 67-dən çox İsveçrə şirkətinin Azərbaycanda uğurlu fəaliyyətindən bəhs edilir. Bildirilir ki, Azərbaycanda neft-qaz sənayesinin üstünlük təşkil etməsi qeyd olunsa da, ölkəmizdə bərpa olunan enerji, kənd təsərrüfatı, turizm kimi sahələrinin inkişafı istiqamətində işlər aparılması qeyd olunur.
Eyni zamanda, müsahibədə Azərbaycan tarixi ilə bağlı qeyd edilən qəzetin redaksiyası üçün maraq kəsb edən maraqlara toxunulur. Müsəlman əhalisinin çoxluq təşkil etdiyi Azərbaycanın1918-ci ildə Şərqdə ilk dünyəvi demokratik respublika və qadınlara səsvermə hüquq verən ilk ölkə kimi tanındığını oxuyucuların diqqətinə çatdıran səfir X.İbrahimova ölkəmizin SSRİ dönəmində ermənilərlə birgə yaşayışına vurğu edir. Sonda qeyd olunur ki, SSRİ-nin dağılmasından öncə 1988-ci ildən başlayaraq Ermənistan Azərbaycana qarşı ərazi iddiaları irəli sürüb və nəticə etibarilə, Ermənistan Azərbaycanın yalnız Dağlıq Qarabağ bölgəsini deyil, eləcə də ətraf yeddi rayonunun işğalını həyata keçirib.
