Qondarma, mifik “qəhrəmanlar” düzəltməkdən yorulmayan ermənilər indi də uydurma Aşot Yerkatdan yapışıblar. Daha doğrusu, A.Yerkatın “xaç”ından.
Erməni Apostol Kilsəsinin Qarabağ Yeparxiyasının rəhbəri Pargev Martirosyan “Facebook” hesabında yazıb ki, ermənilər Ermənistandan Dağlıq Qarabağa, Xankəndiyə Aşot Yerkatın “xaç”ının “surət”ini gətiriblər. “Surət”in bütün ermənilərin katolikosu II Qareginin göstərişi və “xeyir-duası” ilə “qarabağlı ermənilərə dəstək” üçün gətirildiyi bildirilir. “Müqəddəs xaç güclü silahdır” deyə katolikos qeyd edib.
Ermənilər Aşot II Yerkat haqqında düzəltdikləri “Vikipediya”da A.Yerkatı “Baqratunilərə mənsub” “922-928-ci illərdə Gürcüstanın və Ermənistanın şahənşahı”, “I Sumbatın oğlu” kimi təqdim edirlər.
Guya ki, “dəmir” ayaması ilə tanınan A.Yerkat Gürcüstan və “Ermənistan”da şahlıq edib, “Sevan gölü” ətrafında “düşmən”ə qarşı mübarizə aparıb. Ermənilər iddia edirlər ki, guya A.Yerkatın “xaç”ı sehirlidir və erməni xalqını “qorumaq əzmindədir”.
Bu gün Azərbaycan Ordusu qarşısında aciz duruma düşən Ermənistanın işğalçı, terrorçu silahlı birləşmələri silahı atıb qaçırlar, II Qaregin isə ümidini silahlı birləşmələrə deyil, Aşotun “xaç”ına bağlayır.
Mifik “qəhrəman”obrazları yaratmaqdan bezib usanmayan ermənilərin indi də A.Yerkatın “xaç”ının “surət”indən imdad umması doğrudan da gülüncdür.
“Ermənilər bu biabırçılığı, öz acizliklərini ört-basdır etmək üçün onlarla heç bir əlaqəsi olmayan Aşot Yerkatın “xaç”ından yapışırlar”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bildirdi ki, Aşot Yerkatın ermənilərlə, ümumiyyətlə, heç bir əlaqəsi yoxdur. Q.Hacıyevin sözlərinə görə, ermənilər tarixdə yaşamış bütün tanınmış şəxslərə ya iddia edir, ya da onlarla bağlı mifik obrazlar yaradırlar. “Ermənilərin saxtakarlığı o qədər çoxdur ki, bu saxtakarlıqların və cəfəngiyyatların da ömrü çox çəkmir. Təsəvvür edin, onlar elə insanlar haqqında miflər uydurublar ki, oxuyanda adam dəhşətə gəlir. A.Yerkat haqqında uydurmaları da bu saxtakalığın tərkib hissəsidir. Ermənilər interneti onun barəsində saxta məlumatlarla doldurublar.
Ermənilər qədim və orta əsrlərdə tarixdə nə varsa, onun barəsində uydurmalar, miflər yaradırlar. Biz bunu faktlarla sübut etmişik ki, ermənilərin tarixi miflər əsasında yaradılıb. Onlar özlərinə uydurma “qədim dövlət” də düzəldiblər, əsassız olaraq Urartudan, Van çarlığından danışırlar, “Böyük Ermənistan” xülyası ilə yaşayırlar. Bu mövzularda yalanlarını “sübut” etmək üçün cild-cild kitablar yazıblar. II Aşot barədə də yazdıqları mifdən başqa bir şey deyil. Biz sizinlə dəfələrlə danışmışıq ki, Baqratunilərin, ümumiyyətlə, ermənilərlə yaxından-uzaqdan heç bir əlaqəsi yoxdur. Sumbatın özü də, başqaları da erməni deyil. Mən sizinlə söhbət zamanı bir daha tarixi mənbələrə müraciət etmək istəyirəm. X əsrdə ərəb istilasının son dövrlərində Cavidan hərəkatı var idi, sonra Babək hərəkatı baş verdi. Həm onların, həm də gürcü Baqratunilərin Gürcüstan ərazisində ərəb istilasına qarşı mübarizəsi haqqında mənbələrdə kifayət qədər məlumat var. Regionda ərəb istilasına qarşı bunlar mübarizə aparıblar. X əsrdə ermənilər burada nə gəzirdi, onlar Qafqazda yox idilər. A.Yerkatın tarixdə adı var, o, Baqratunilərdən idi. Sumbatlar isə alban knyaz nəslindən olub. Xatırlarsınızsa, Babəki də ərəblərə Səhl Sumbat satıb. Nə Aşot, nə də Sumbat erməni deyil. Ərəb, fars mənbələrində ermənilər haqqında heç nə yoxdur. Moysey Xorenlinin də, Moysey Kalankatunlunun da əsərlərində Baqratunilərdən danışılır, amma onların heç biri Baqratunilərin erməni olduğunu qeyd etməyib. Onlar həmin dövrdə həm gürcülərin, həm də albanların ərəb istilasına qarşı mübarizə apardıqlarını yazırlar. Amma ermənilərin A.Yerkatı öz adlarına çıxması böyük saxtakarlıqdır, o, erməni deyil”.
Bu gün ermənilərin A.Yerkatın “xaç”ının “surət”ini Dağlıq Qarabağa gətirmələrini böyük biabırçılıq adlandıran Q.Hacıyev hesab edir ki, burada məqsəd “xaç”dan “güc almaq” deyil, xristian dövlətlərinin diqqətini cəlb etməkdir: “Ermənilərdə hər cür sifət var, onlar şəraitə uyğun olaraq sifətlərini tez-tez dəyişirlər. Ermənilər həm yalançı, həm saxtakar, həm də qorxaqdırlar, ayaqları yer tutanda isə qəddardırlar. Neçə ildir Azərbaycana qarşı ən müxtəlif formalarda terror aktları həyata keçirən, bir əsrdə üç dəfə xalqımızı genosidə məruz qoyan, deportasiya edən ermənilər hər cür naqisliyə əl atırlar. Bu gün terrorçu ölkənin işğalçı silahlı birləşmələri qəhrəman Azərbaycan Ordusunun qarşısında duruş gətirə bilməyib qaçırlar. Ermənilər bu biabırçılığı, öz acizliklərini ört-basdır etmək üçün onlarla heç bir əlaqəsi olmayan A.Yerkatın “xaç”ından yapışırlar. Düşmən bu “xaç”ın “surət”ini Dağlıq Qarabağa gətirməklə, əslində, xristian dünyasının diqqətini özünə cəlb etmək və onlardan dəstək almaq məqsədi güdür. Dünya yaxşı bilir ki, bu xaç da saxtadır, ermənilər də xəyanətkardır, nə Qərb dünyası, nə də digər xristian ölkələri ermənilərin növbəti tryukuna aldanmır. Ermənilərə açıq dəstək verən Qərb də artıq onların saxtakarlığından, yalançı göz yaşlarından bezib. Ermənistan saxta xaçı Dağlıq Qarabağa gətirmək, ondan imdad ummaq əvəzinə, öz işğalçı ordusunu bizim torpaqlarımızdan çəkib aparsa, daha yaxşı olardı” - deyə Q.Hacıyev qeyd etdi.
İradə SARIYEVA
