Paşinyanın 6 addımlıq fəaliyyət planı gülüş və etirazla qarşılandı – azı 30 nəfərlik könüllülər dəstəsi yaradın, özünüzə komandir seçin...
Son açıqlamaları sübut edir ki, Paşinyan ciddi psixoloji problemlər içərisindədir. Çünki ağlı başında olan dövlət rəhbəri belə primitiv təkliflərlə çıxış etməz. Belə ki, çıxılmaz vəziyyətdə qalan Ermənistan Baş naziri yeni “plan” hazırlayıb.
Nikol Paşinyan öz “Facebook” səhifəsində ermənilər üçün yeni fəaliyyət planıını təqdim edib.
Plan belədir: Addım 1. Könüllülər dəstəsi yaradın (ən azı 30 nəfərdən ibarət). Addım 2. Bir komandir seçin. Addım 3. Yerli hərbi komissarlıq ilə əlaqə saxlayın. Addım 4. Hərbi hissələrin birində təhsili tamamlayın. Addım 5. Vətəni qorumaq üçün cəbhə bölgəsinə gedin. Addım 6. Qələbə.
Paşinyanın yeni planı isə ermənilər tərəfindən birmənalı qarşılanmayıb. Bir çox erməni şərhlər yazaraq Paşinyanın əli silah tuta bilməyən insanları ölümə göndərdiyini bildirib: “Məsələni sülh yolu ilə həll edin! Bəsdir bizləri öldürdünüz! Əli silah tuta bilməyən insanları ölümə göndərirsiniz! Özünüz gedin savaşın. Biz hamımız vətənimizi sevirik, amma siz bizləri düşünmürsünüz, ölümə göndərirsiniz!”.
Digər tərəfdən, hərbi nöqteyi-nəzərdən sözügedən plan gülünc təsir bağışlayır. Çünki bu, heç bir parametrə görə adekvat deyil və çətin ki, Ermənistan ordusunu məğlubiyyətdən xilas etsin.
- “O üzdən, Paşinyanın fəaliyyət planı çox gülünc və primitiv addımlardır”
Məsələyə münasibət bildirən hərbi ekspert İbrahim Rüstəmlinin sözlərinə görə, Paşinyanın o müraciəti primitiv və hərbi sahə ilə əlaqəsi olmayan bir çağırışdır: “Əvvəla Paşinyandan soruşmaq lazımdır ki, o uşaqları hansı vətəni qorumağa göndərir? Azərbaycanın işğal olunmuş əraziləri onun “vətəni” sayılırsa, bu, aqressiyanın davamıdır. İndiyə kimi Ermənistan rəhbərliyi tərəfindən həyata keçirilmiş aqressiv, qeyri-konstruktiv siyasətin uzantısıdır. İkincisi, bu, suda boğulanın saman çöpündən yapışması anlamına gəlir. Bu şəkildə Azərbaycanın nizami ordusu ilə döyüşmək və işğal olunmuş əraziləri əldə saxlamaq mümkün deyil. Paşinyanın təfəkkürü digər ermənilər kimi, 90-cı illərdə ilişib qalıb. Onların təsəvvüründə Azərbaycan Ordusu 90-cı illərin ordusudur. O vaxt ordumuz yeni yaranırdı, müəyyən siyasi qüvvələrin orduya təsiri vardı. Yaranan bu boşluq və ən başlıcası, xaricdən edilən yardım hesabına Ermənistan ərazilərimizi işğal etdi. İndi də o düşüncə ilə yaşayırlar. Qəbul etmək istəmirlər ki, bizim güclü nizami ordumuz var və onun qarşısında heç bir qüvvə dayana bilməz. Bu gün ordumuz Ali Baş Komandan tərəfindən vahid mərkəzdən idarə olunur. Belə bir orduya bu şəkildə savaş açmaq Ermənistan ordusunun məhvi deməkdir. O üzdən, Paşinyanın fəaliyyət planı çox gülünc və primitiv addımlardır”.
Hərbi ekspert hesab edir ki, cəbhədə yaşananlar Paşinyan hakimiyyətinin sonunu yaxınlaşdırır.
Vidadi ORDAHALLI
