Məlum olduğu kimi, BMT TŞ-nin qəbul etdiyi 4 qətnaməni Ermənistan 27 ildir ki, qulaqardına vuraraq yerinə yetirmirdi. Həmin qətnamələrdə işğalçı Ermənistan qoşunlarının işğal etdiyi ərazilərdən çıxması konkret tələb edilirdi.
Təəssüf ki, bu dövr ərzində ATƏT-in Minsk Qrupunun həmsədr ölkələri başda olmaqla, BMT və beynəlxalq ictimaiyyət tərəfindən işğalçı Ermənistana heç bir təzyiq göstərilmədi. Azərbaycan Prezidenti İlham Əliyev dəfələrlə Ermənistana sanksiyaların tətbiq olunmasının vacibliyini vurğulayıb. Azərbaycan Ordusu Zəngilan şəhərini və rayon ərazisindəki kəndləri işğaldan azad etməklə BMT Təhlükəsizlik Şurasının 884 saylı qətnaməsinin tələblərinin icra olunmasını təmin etmiş oldu. 1993-cü il noyabrın 12-də qəbul edilmiş qətnamədə Azərbaycanın Zəngilan rayonunun və Horadiz şəhərinin işğalı pislənir, işğalçı Ermənistan qoşunlarının həmin ərazilərdən çıxarılması tələb edilirdi. 27 il müddətində kağız üzərində qalan bu qətnamənin tələbləri Ali Baş komandan İlham Əliyevin və Azərbaycan Ordusunun müzəffər əməliyyatları ilə təmin edildi. Bu gedişlə Azərbaycan BMT-nin digər üç qətnaməsinin də icrasını tam təmin etmiş olacaq. Azərbaycanın bu nailiyyətini həm də BMT-nin nüfuzuna, dünyada sülhə verilən töhfə kimi qiymətləndirə bilərikmi?
Millət vəkili Fazil Mustafa “Bakı-Xəbər”ə açıqlamasında bildirdi ki, bu olduqca önəmli bir hadisədir: “Məhz buna görə Azərbaycanı BMT Təhlükəsizlik Şurasına üzv seçmək lazımdır. Çünki biz gördük ki, TŞ-nin üzvü olan ölkələr bu missiyanı həyata keçirə bilmirlər. Azərbaycan kiçik ölkə olsa da, bu böyüklükdə BMT-nin qətnaməsini icra edə bilib. Elə məsələ var ki, ABŞ İraq və Əfqanıstanda BMT qətnamələrini tam yerinə yetirə bilmədi. Bu günə qədər “Taliban” və başqa silahlı qruplaşmalarla münaqişə içindədir. Azərbaycan isə 20 gün ərzində bunu yerinə yetirə bildi. Bu səbəbdən də, BMT qətnamələrinin icrası missiyası Azərbaycana tapşırılmalıdır. Bütün dünya ölkələrinin sülməramlı silahlı birləşmələri Azərbaycanın ixtiyarına verilməlidir. Özləri bacarmırlasa, imkan versinlər biz bunu gerçəkləşdirib, dünya adına sülhü bərpa edək. Bu mənalı və anlamlı hadisəni təbliğatımızda ciddi istifadə etməliyik. Orda Kəlbəcərlə də bağlı qətnamə var, onu da tez bir zamanda həll edəcəyimizə şübhəm yoxdur. Onda bu rekord olacaq. Konkret olaraq BMT TŞ-nin müddəalar üzrə iki qətnaməsini həll etmiş oluruq. Digər ikisinin isə təmin olunması üçün ermənilər tam olaraq Ermənistanı tərk etməlidir. Çünki onlar bu çoğrafiyada sağlam yaşaya bilmirlər. ABŞ və digər ölkələrdə istedadlarını tam olaraq ortaya qoya bilirlər. Bölgədə sülhü istəyiriksə, ermənilərin yerinə burada normal xalqların yerləşməsini təmin etməliyik. Çünki bu xalq qonşularının hamısına nifrət aşılayır. Bütün qonşular sakit yaşayışlarını təmin etmək üçün ermənilərin bölgəni tam boşaltmasını təmin etməlidir. Abxaziya bu gün ermənilərin işğalı altındadır. Onlar Ermənistan hüdudlarından kənarda da xalqlara problem yaşadırlar. Abxaziyanın işğalında əsas rolu erməni batalyonu oynayıb. Bu vəziyyət bizim TŞ-nin 6-ci üzvü kimi qəbul olunmağımızın ədalətli olduğunu sübut edir”.
Azərbaycanın həm də bəşəri problemləri həll etməsi dünyada bizə olan etimadı daha da artırmış olacaq.
Məhəmmədəli QƏRİBLİ
