25/11/2020 06:47
728 x 90

Paşinyan Ermənistanı elə bir duruma salıb ki - danışıqları rədd etdi, müharibədə isə sürətlə uduzur...

Elşən Mustafayev: “Paşinyan Ermənistan üçün bir yol qoydu, o da kapitulyasiyadır”

img

Ermənistan baş naziri Nikol Paşinyan Facebook səhifəsində etdiyi canlı yayımda deyib ki, hazırda Dağlıq Qarabağ münaqişəsinin diplomatik həll yolu yoxdur: "Biz aydın şəkildə başa düşməliyik ki, Qarabağ məsələsinin bu mərhələdən başlayaraq diplomatik həll yolu yoxdur".

Bundan başqa, Ermənistan Baş naziri Nikol Paşinyan bütün merlərə, icma və yerli özünüidarə orqanlarının rəhbərlərinə Ermənistan Silahlı Qüvvələri Baş Qərargah rəisinin ümumi rəhbərliyi altında özünümüdafiə dəstələrinin yaradılması tələbi ilə müraciət edib. O, bütün erməniləri silaha sarılmağa və axıra qədər döyüşməyə çağırıb: "Onlar, xüsusilə komandanlığın qarşılarına qoyacağı vəzifələri yerinə yetirməlidirlər".

Qeyd edək ki, Dağlıq Qarabağdakı Ermənistan ordusunun əhəmiyyətli hissəsi Azərbaycan Ordusunun uğurlu əks-hücum əməliyyatı zamanı məğlub olub. Azərbaycan Müdafiə Nazirliyindən verilən məlumata görə, Ermənistan ordusunun bölmələri artıq döyüşə getməkdən imtina edir və mövqelərini tərk edir. Azərbaycan Ordusu sürətlə irəliləyir, işğal olunmuş kəndləri və rayon mərkəzlərini bir-birinin ardınca azad edir.

Azərbaycan Xarici İşlər Nazirliyindən bildirilib ki, Ermənistan baş naziri N.Paşinyan “münaqişənin diplomatik həlli yoxdur” açıqlaması ilə çıxış edərək, Ermənistanın işğalçı siyasətini davam etdirdiyini və bu ölkənin hazırkı rəhbərliyinin münaqişənin danışıqlar yolu ilə həllində maraqlı olmadığını açıq şəkildə etiraf etmiş oldu: “Ermənistanın Azərbaycana qarşı yeni hücumuna cavab olaraq Azərbaycanın başladığı əks-həmlə tədbirləri və on illərdir ki, işğal altında olan ərazilərin Azərbaycan Silahlı Qüvvələri tərəfindən azad edilməsi ilə bağlı davamlı olaraq atəşkəs üçün yalvaran, iki dəfə humanitar atəşkəs razılaşdırıldıqdan sonra atəşin dayandırılması rejimini kobud şəkildə pozan Ermənistanın əsl niyyətinin sülhə nail olmaq deyil, yeni işğala əl atmaq olduğu baş nazirinin verdiyi bu açıqlamada aydın şəkildə görünür”.

Göründüyü kimi, hazırda hərb meydanında uduzan Paşinyan yenə müharibə istədiyini deyir.  Onun bu addımını necə izah etmək olar?

Azərbaycan Milli İstiqlal Partiyasının sədr mühavini  Elşən Mustafayev “Bakı-Xəbər”ə açıqlamasında bildirdi ki, Paşinyan bu məsələdə də hiyləgərlik edir: “İndiyə qədər nüfuzlu ölkələrə atəşkəslə bağlı yavarışlar edən Paşinyan birdən-birə müharibə etmək cəsarətini hardan aldı? Belə cəsarəti şərtləndirən heç bir yeni situasiya yetişməyib. Paşinyan gözəl bilir ki, Azərbaycan tərəfinin atəşkəslə bağlı şərtləri konkretdi və onlardan bir addım da kənara çəkilən deyil. O isə istəyir ki, şərtləri qəbul etmədən atəşkəsə nail olsun və güc yığana qədər danışıqlar prosesini uzatsın. Bu hiyləsi işləmədiyi üçün, indi çıxış yolunu müharibə ritorikasında görür. Çox gözəl anlayır ki, müharibəni uzatdıqca məğlubiyyətləri çoxalacaq. Həm də Azərbaycanın şərtlərini qəbul edib, işğal altındakı torpaqları vermək istəmir. Daha doğrusu, bunu etmək üçün məsuliyyəti kimlərləsə bölüşməyə çalışır. Onun niyyəti budur ki, müharibə davam etsin və rəqibləri də Qarabağın tam əldən çıxdığını görüb, bundan sülh danışıqlarına getməyi, daha doğrusu Azərbaycanın şərtlərini qəbul etməyi tələb etsin. Paşinyanın müharibə çağırışları cəsarətdən yox, qorxaqlıqdan, özünü sığortalamaq cəhdindən qaynaqlanır. İstənilən halda, onun bu ritorikası Azərbaycan diplomatiyası üçün də əlverişlidir. Bununla bütün dünya görür ki,  Ermənistan işğalçı olmaqla yanaşı, həm də sülh danışıqlarından yayınır. Bundan sonra Ermənistanın yalvarışlarına heç bir ölkə ciddi reaksiya verməyəcək. Çünki müharibəni özləri seçiblər. Paşinyan Ermənistan üçün bir yol qoydu, o da kapituliyasiyadır. Bu gedişlə, ona da tezlikə imza atacaqlar”.

Görünən budur ki, Paşinyan Ermənistanı daha dərin uçuruma yuvarlayır. Döyüşməyə adam tapa bilmədiyi üçün, hətta vəzifəli şəxsləri əlinə silah alıb müharibəyə getməyə səsləyir.

Məhəmmədəli QƏRİBLİ

Son xəbərlər